Mbouŋ to Yes Israela 85:2-11 in Mutu

² Ve sawa to tamtoghon tiom tigham sosor, yom upul sosor todi. Ŋgar todi to isosor ila matam, yom ureua isob ilale.

³ Yom utatan mbalmbali tiom, ve lolom poia padi muul.

⁴ Ve aazne, nitaŋ roran ghom muul. Maaron, yom Volaaŋa tiei. Matam imuul payei, ve uul ghei. Leso nineep poia muul. Atem yabyab payei muul malep.

⁵ Vena, pale mbalmbali tiom izaza tiei irau sawa isob? Pale inepneep tovene itaghoni taghoni gha ila?

⁶ Yei tamtoghon tiom. Tovenen matam imuul inim payei, ve upamundigin ghei muul. Leso lolomai poia payom, ve nipait ghom.

⁷ O Yoova, lolom ineep tuŋia ila to tamtoghon tiom ve uluul di. Upatooŋ ŋgar tonenen payei muul, ve ugham mulin ghei. Leso nineep pooi.

⁸ You pale naghur taliŋag pa saveeŋ to Maaron ighaze ivotia pa tamtoghon toni. Pasa, you nawatag: Yoova pale isavia saveeŋ luuma pait. Tamtoghon toni to lolodi ineep tuŋia ila toni ve titaghon ataam toni, ye pale iuul di, leso tineep poia muul. Eemoghon tipatum di. Ŋgar to borouŋa to muuŋ tighamghami, tighami muul malep.

⁹ Onoon kat. Yes to timatughez pa Maaron ve titaghon ŋgar toni, ye inepneep igharau di, ve isasaŋan pa iuul di. Ye pale ineep toman ghiit, ve ipatooŋ tapiri ve poia toni ivot ighazooŋ izi taan tiei tonene.

¹⁰ Maaron lolo ineep tuŋia ila to tamtoghon toni ve iuluul di. Ve yes titaghon tutuuŋ toni. Tauto yesŋa tilup di tinim ee moghon. Yes titaghon ŋgar deŋia, ve ye igham di tineep pooi toman lolodi luuma. Tauto lupuuŋ todi ee moghon.

¹¹ Ŋgar to taghoniiŋ saveeŋ onoon, nene ivotvot izi taan. Ve Maaron ineep izi sambam, ve mata pait itaghon ŋgar toni deŋia.

² Ve saawe tau tamtamon tsio tigham sosor, yo upul sosor toozi. Ŋgar toozi tau isosor ila yo matam na, yo ureua isov ilale.

³ Yo utatan aatyavyav tsio, ve lolom iluum pazi muul.

⁴ Ve aazne, nitaŋ rarai ghom muul. Maaron, yo Uleeŋa tsiei. Matam imuul payei ve uul ghei, leso nileep poia muul. Atem yavyav payei muul sov.

⁵ Mindai, pale aatyavyav tsio izazaa tsiei irau saawe? Pale ighengheen tauvene taghon taghon gha ila?

⁶ Yei tamtamon tsio. Tauvene matam imuul ilam payei, ve upaburigin ghei muul. Leso lolomai poia payo, ve nipait ghom.

⁷ O Yoova, lolom isaghav tamtamon tsio ariaaŋ ve uluul zi. Utotoi ŋgar tana payei muul, ve ugham mulin ghei. Leso nileep poi.

⁸ Yau aat naghur taliŋag poi pa saveeŋ tau Maaron ighe ivotia pa tamtamon tooni. Pasaa, yau nawatagh: Yoova pale isavia saveeŋ luuma pait. Tamtamon tooni tau lolozi isaghavu ariaaŋ ve titaghon eez tooni na, i pale iuul zi, leso tileep poia muul. Eemon yes aat tiyamaan zi. Ŋgar to borauŋa tau muuŋ tighamghamu na, tighamu muul sov.

⁹ Onoon kat. Yes tau tiroi pa Maaron ve titaghon ŋgar tooni na, i ilepleep igharau zi ve isasaŋan pa uleeŋ zi. I aat ileep tomani ghiit, ve itotoi tapiri ve poia tooni ivot ighazooŋ izi taan tsiei tane

¹⁰ Maaron loolo isaghav tamtamon tooni ariaaŋ ve iuluul zi, ve yes titaghon tutuuŋ tooni. Tauta yesŋa tilup zi timin eemon. Yes titaghon ŋgar duduuŋa, ve i igham zi tileep poia toman lolozi luuma. Tauta lupuuŋ toozi eemon.

¹¹ Ŋgar to taghoniiŋ saveeŋ onoon, ene ivotvot izi taan. Ve Maaron ileep izi sambam, ve maata pait itaghon ŋgar tooni duduuŋa.