Mbouŋ to Yes Israela 83:2-13 in Mutu

² Ughita. Koiamŋa tighaze tipamundigin malmal. Yes to tighur koi payom, tipakur taudi, ve tighamgham aghedi payom.

³ Tamtoghon tiom to lolom padi kat, koiamŋa tonowen tilup di, ve tikaal ataam pa tiwaghamun di.

⁴ Tighaze: “Anim tala ve tapasob yes Israela le tisob kat. Leso ledi izadi muul sob, ve tamtoghon lolodi imaagh padi.”

⁵ Onoon kat, koiamŋa tonowen tilup lolodi ve ŋgar todi inim ee moghon, ve timbua saveeŋ tighaze tizoor pooz tiom, ve tiwaghamun tamtoghon tiom. Yes tamtoghon to ndug tonene:

⁶ Yes Edoma ve Ismael papaghu toni, ve yes Moapa ve yes Agri,

⁷ ve yes to taan suruvu to Gebal toman yes Amona ve Amaleka, ve yes Pilistia ve tamtoghon to ndug Tiro.

⁸ Ve yes Asiria paam to ndiran ariaŋadi to malmal, tivool to yes Amona ve Moapa to Lot papaghu toni, leso tiuul di pa malmal.

⁹ Tovenen yei nitaŋ roran ghom nighaze ugham ŋgar raraate pa yes ndiran tonowen inimale muuŋ ugham pa yes Midiana, ve muri ugham pa Sisera yesuru Yabin izi ya Kison.

¹⁰ Sawa tonenen, yom urab di timatmaat izi ndug Endor, ve patudi tiwaghengheen ila taan ve timbuuz.

¹¹ Yes daba to koiamai, ugham ŋgar raraate padi inimale muuŋ ugham pa Oreb yesuru Zeeb. Ve yes pooza todi tovene paam. Utatan di inimale muuŋ utatan Zeba yesuru Zalmuna.

¹² Ndiran ru tonowen, muuŋ tisaav tighaze: “Maaron taan toni, le kikiliiŋ popoia. Tala taghami inim leed.”

¹³ Maaron tiou, ureu di le timbiriis tinimale ghavuur ve buzbuz to yaghur iviviira gha ilale.

² Ughita. Koiamŋa tighe tipaburigin malmal. Yes tau tighurghur koi payo na, tipakur tauzi ve tighamgham aghezi payo.

³ Tamtamon tsio tau lolom pazi kat na, koiamŋa tawe tilup zi, ve tiil eez to tivaghamun zi.

⁴ Tighe: “Alam tala ve tapasov yes Israela le tisov kat. Leso ezazi igheen muul sov, ve tamtamon lolozi iveegh pazi.”

⁵ Onoon kat, koiamŋa tawe tilup lolozi ve ŋgar toozi imin eemon, ve timbu saveeŋ tighe tigham malmal payo ve tivaghamunia tamtamon tsio. Yes tamtamon to nugh tane:

⁶ Yes Edoma tomania Ismael paaghu tooni, ve yes Moapa tomania yes Agri,

⁷ ve yes to taan sirivu to Gebal tomania yes Amona ve Amaleka, ve yes Pilistia ve tamtamon to nugh Tiro.

⁸ Ve yes Asiria paam tau zeran ariaŋazi to malmal na, tivool to yes Amona ve Moapa tau Lot paaghu tooni na, leso tiuul zi pa malmal.

⁹ Tauvene yei nitaŋ rarai ghom nighe ugham ŋgar raraate pa yes tawe imin tau muuŋ ugham pa yes Midiana, ve murei ugham pa Sisera yesuru Yabin izi yaa Kison na.

¹⁰ Saawe tana, yo urav zi timataar izi nugh Endor, ve patazi tivaghengheen taghon taan paavo gha timbuzaar.

¹¹ Yes daaba to koiamaiŋa, ugham ŋgar raraate pazi imin tau muuŋ ugham pa Oreb yesuru Zeeb na. Ve yes pooza toozi tauvene paam. Utatan zi imin tau muuŋ utatan Zeba yesuru Zalmuna na.

¹² Zeran ru tawe, muuŋ tisaav tighe: “Maaron taan tooni, le kikiliiŋ popoia. Tala taghamu imin leen.”

¹³ Maaron tsiau, ureu zi le timbiriis imin ŋgaupup ve rabrab tau yaghur ivuvuura gha ilale.