Mbouŋ to Yes Israela 80:3-12 in Mutu

³ O Maaron, uul ghei ve upalot ghei. Lolom poia payei, ve ugham poian ghei. Leso nineep poia muul.

⁴ O Yoova, yom Maaron ariaŋam kat, ve uŋgin mbeb tisob. Yei tamtoghon tiom. Eemoghon atem yabyab payei, ve ulooŋ suŋuuŋ tiei maau. Pale ŋeez o mbalmbali tiom isob?

⁵ Yom ugham ghei nimbaad pataŋani tiina le isooŋ katin ghei. Tovenen nitaŋ tiina, ve nighun matamai suru inim ya payei.

⁶ Yom upul murim payei. Tovenen ndug ndug to tineep tigharau ghei, tiwazoran di pa taan tiei tighaze tighami inim ledi. Ve koiamai tiveveleg ghei, ve tiŋiŋiŋ payei.

⁷ Yom Maaron ariaŋam kat, ve uŋgin mbeb tisob. Uul ghei ve upalot ghei. Lolom poia payei, ve ugham poian ghei. Leso nineep poia muul.

⁸ Muuŋ, ai vaen eez iyoon ila taan to yes Isipa. Yom ugheli iza, ve ughami inim sualen, ve undiir ndug tonene tamtoghona tighau, ve uvazogi ila taan todi.

⁹ Ve undeeb pughu, leso itub pooi. Tovenen waria izila taan lolo kat, ve boga titub tila mamala, le titatab taan tonene isob.

¹⁰ Ai vaen tonene itub iza iza, le itatab lolooz to ndug tonene paam, ve inim yavyaav padi. Ve ai mendepur tintina tiyoon ila samba paam.

¹¹ Boga pida titub tivot tila mala, le tivot naari to te Mediterenian. Ve pida titub tila le peria ila ya tiina Euprates.

¹² Pughu vena to aazne ureu didiiŋ to muuŋ iluvut uum vaen tiom? Ughita. Tamtoghon to tilaghlaagh sorok, tisob tinim tilooŋ tila, ve tiyubyub anoŋa.

³ O Maaron, uul ghei ve upalot ghei. Lolom poia payei, ve ugham poghani ghei. Leso nileep poia muul.

⁴ O Yoova, yo Maaron saksakim ve uŋgin gabua naol isov. Yei tamtamon tsio. Eemon atem yavyav payei, ve ulooŋ suŋuuŋ tsiei mako. Pale ŋeez o aatyavyav tsio isov?

⁵ Yo ugham ghei nibaad pataŋani tiina le isooŋ katin ghei. Tauvene nitaŋ tiina, ve nighun matamai suuru imin lemai yaa.

⁶ Yo ughur murim payei. Tauvene nugh nugh tau tileep tigharau ghei ne, tivazorai zi pa taan tsiei tighe tighamu imin lezi. Ve koiamaiŋa tivevelegh ghei, ve tiŋiŋiŋ payei.

⁷ Yo Maaron saksakim ve uŋgin gabua naol isov. Uul ghei ve upalot ghei. Lolom poia payei, ve ugham poghani ghei. Leso nileep poia muul.

⁸ Muuŋ, ai vaen ee iyooz ila taan to yes Isipa. Yo usuru, ve ughamu ilam ta sene, ve uziir nugh tane tamtamona tighau, ve uvazoghi ila taan toozi.

⁹ Ve uzavaan puughu, leso itum poi. Tauvene waria izila taan loolo kat, ve booga titum tila mamalau, le titav taan tane isov.

¹⁰ Ai vaen tane itum izaa izaa, le itav loloz to nugh tane, ve imin yavyaav pazi. Ve ai mezepur tintiina tiyooz ila saamba paam.

¹¹ Booga siriv tiraraav zi tila le tivot nari to te Mediterenian. Ve siriv tiraraav zi tila le peria yaa tiina Euprates.

¹² Mindai ta aazne ureu didiiŋ tau muuŋ ilivutin uum vaen tsio na? Ughita. Tamtamon tau tilaghlaagh sorok na, tisov tilam tiloŋ tila ve tiyumyum anooŋa.