Mbouŋ to Yes Israela 78:32-42 in Mutu

³² Yes Israela tighita mbeb tisob tonowen. Eemoghon tinoknok ghamuuŋ sosor sone. Tikaria ghitooŋ mbeb gharatooŋadi. Eemoghon tighur ila to Maaron maau.

³³ Tauto ye iŋgor sawa todi inim tuku. Nepooŋ todi isob rikia moghon, inimale yaghuraad to ivotvot ila avood. Mateeŋ ikarmotin di, le matughezaaŋ tiina igham di.

³⁴ Onoon, sawa to Maaron irab tamtoghon todi pida, rikia moghon ve ival tiina tighilaal, ve titoor ŋgar todi imuul ila pani, ve tisuŋ pani ariaŋa tighaze lolo isamin di ve ireu sosor todi.

³⁵ Ve matadi iŋgal muul tighaze: Maaron, ye iponpoon di inimale raŋ to izala kat. Maaron Tiina To Ilib Pa Ndimaronŋa Tisob, ye to Volaaŋa todi.

³⁶ Eemoghon tipaiti pa avodi uli moghon. Saveeŋ to ivotvot ila avodi, tisavia toman lolodi maau. Tigham kaarom.

³⁷ Lolodi ineep tuŋia ila to Maaron maau. Ve saveeŋ to yesŋa Maaron timbua, matadi kisini ve titaghoni maau.

³⁸ Eemoghon Maaron lolo isasamin di, ve ireureu sosor todi. Tauto iwaghamun di kat maau. Onoon, sawa naol, ye ate yabyab padi kat. Eemoghon iyai tau, ve itatan mbalmbali toni.

³⁹ Pasa, mata iŋgal ighaze: Yes to taan moghon. Tapiridi tintina maau. Tineep ris, ve tilaledi, tinimale yaghur to talooŋ avolutu inim, ve isob.

⁴⁰ Sawa to tineep izi ndug balim, tizoor Maaron aliŋa pae katindi. Yes tilaghlaagh ila ndug to magargaar moghon, ve tighamgham Maaron lolo ipataŋan.

⁴¹ Maaron Patabuaŋ to yes Israela, yes tinoknok tovaaŋi. Tauto tipas ate, le ate yabyab kat.

⁴² Yes lolodi imaghmaagh pa Maaron tapiri. Matadi iŋgal sawa to ye igham mulin di ila koiadi nimadi ne maau.

³² Yes Israela tighita gabua naol isov tawe. Eemon tinoknok ghamuuŋ sosor soone. Tikaria ghitooŋ gabua ŋgeretazi. Eemon tighur ila to Maaron mako.

³³ Tauta i iŋgoor saawe toozi tuuku. Lepoogh toozi isov rekia mon imin yaghuraan tau ivotvot ila avoon. Mateegh ipateeŋ zi, le roiŋ tiina igham zi.

³⁴ Onoon, saawe tau Maaron irav tamtamon toozi siriv, rekia mon ve eval tiina tighilaal, ve titoor ŋgar toozi imuul ila pani, ve tisuŋ pani ariaaŋ tighe loolo isaghatin zi ve ireu sosor toozi.

³⁵ Ve matazi iŋgal muul tighe: Maaron, i iponpoon zi imin maetaaz tau izala kat. Maaron Tiina Tau Iliiv Zimaronŋa Tisov na, i ta Uleeŋa toozi.

³⁶ Eemon tipaiti pa avozi uuli mon. Saveeŋ tau ivotvot ila avozi na, tisavia toman lolozi mako. Tigham karom.

³⁷ Lolozi ikis Maaron ariaaŋ mako. Ve saveeŋ tau yesŋa Maaron timbua na, matazi kisini ve titaghoni mako.

³⁸ Eemon Maaron loolo isasaghatin zi, ve ireureu sosor toozi. Tauta ivaghamun zi kat mako. Onoon, saawe naol, i aate yavyav pazi kat. Eemon iyai ghi, ve itatan aatyavyav tooni.

³⁹ Pasaa, maata iŋgal ighe: Yes to taan mon. Tapirizi tiina mako. Tileep rig, ve tilalez, imin yaghur tau talooŋ luutu ilam, ve isov.

⁴⁰ Saawe tau tileep izi nugh ŋginaaŋa, tizoor Maaron aliiŋa pai katini. Yes tilaghlaagh ila nugh tau sausau mon, ve tighamgham Maaron loolo ipataŋan.

⁴¹ Maaron Patabuyaaŋ to yes Israela, yes tinoknok tovaaŋni. Tauta tipas aate, le aate yavyav kat.

⁴² Yes lolozi iveghveegh pa Maaron tapiri. Matazi iŋgal saawe tau i igham mulin zi ila koiazŋa nimazi na mako.