Mbouŋ to Yes Israela 78:3-15 in Mutu

³ Kamos tonene, nditimbuud tisavia payei ve nilooŋa, tauto niwatagi.

⁴ Muuŋ, Yoova ipatooŋ tapiri ivot ighazooŋ. Ye igham mbeb gharatooŋadi ve uraat tintina tivotvot. Tauto tamtoghon tipait iza pa tapiri ve poia toni. Uraat toni tonowen, irau taŋgooza pa ndinatuud maau. Tasavia padi, ghoro poia. Leso papaghu toit to pale muri tivot, tiwatagi paam.

⁵ Ataam to itiŋa Maaron talup ghiit tanim ee moghon, muuŋ ye ivotia pa nditimbuud to Yakop papaghu toni. Ye isavia tutuuŋ toni pa yes Israela, ve isaav ariaŋa pa nditimbuud ighaze tipatoot ndinatudi pani.

⁶ Leso yes paam tiwatagi, ve anadi tisavia pa ndinatudi, ve iseeŋga tovene itaghoni taghoni gha ila.

⁷ Ighaze tigham tovene, papaghu todi irau lolodi imaagh pa uraat tintina to Maaron igham di ne maau. Ve yes pale tinumeera, ve matadi iŋgal tutuuŋ toni, ve titaghoni.

⁸ Leso tigham ŋgar inimale nditimbudi sob. Pasa nditimbudi, ŋgar todi iyaryaaŋ kat. Lolodi pa titoor ŋgar todi maau. Moghon moghon tighamgham didiaaŋ, ve tizorzoor Maaron aliŋa. Lolodi ineep tuŋia ila toni maau. Ve saveeŋ to yesŋa Maaron timbua, titaghoni maau.

⁹ Papaghu to Epraim, yes tiraua kat pa tivaneg pa pane. Eemoghon sawa to malmal imundig, timatughez ve tighau.

¹⁰ Ve saveeŋ to yesŋa Maaron timbua, matadi kisini ve titaghoni maau. Laghooŋ todi, lolodi pa titaghon tutuuŋ toni maau.

¹¹ Ve uraat tintina toman mbeb gharatooŋadi to muuŋ Maaron ighamgham di ila matadi, lolodi imaagh pani kat.

¹² Sawa to nditimbudi tineep izi Isip, Maaron igham mbeb gharatooŋadi tintina izi taan raapa to Zoan, ve tighita pa taudi matadi.

¹³ Ve sawa to tila tivot izi Te Kaviaaŋa, ye ivalag te le pida ila pa ŋas, ve pida ila pa waan. Ye igham te iyoon inimale didiiŋ. Tauto ataam ivot padi, ve titaghoni tivool tila pa dige ite.

¹⁴ Ndag, ye igham yaghur tae ivot, leso ipatooŋ di pa ataam. Ve mboŋ, ye igham yab ivot, leso imuuŋ padi ve titaghoni.

¹⁵ Sawa to tineep izi ndug balim, Maaron irab balagin yaam, ve igham ya ireer ivot pani. Ye igham ya ireer tiina, leso tighun.

³ Sinaiŋ tane, timbuunŋa tisavia payei gha nilooŋa, tauta niwataghi.

⁴ Muuŋ, Yoova itotoi tapiri ivot ighazooŋ. I igham gabua ŋgeretazi ve uraat tintiina ivotvot. Tauta tamtamon tipait eeza pa tapiri ve poia tooni. Uraat tooni tawe, irau taŋgooza pa natuunŋa mako. Iit aat tasavia pazi. Leso paaghu toit tau murei pale tivot na, tiwataghi paam.

⁵ Eez to itiŋa Maaron tavalupu ghiit tamin eemon, muuŋ i ivotia pa timbuunŋa tau Yakop paaghu tooni na. I isavia tutuuŋ tooni pa yes Israela, ve isaav ariaaŋ pa timbuunŋa ighe tipaduduuŋ natuzŋa pani.

⁶ Leso yes paam tiwataghi, ve anazi tisavia pa natuzŋa, ve iseeŋga tauvene taghon taghon gha ila.

⁷ Tauvene paaghu toozi irau lolozi iveegh pa uraat tintiina tau Maaron igham zi ne mako. Ve yes pale tinumeera, ve matazi iŋgal tutuuŋ tooni, ve titaghoni.

⁸ Leso tigham ŋgar imin timbuzŋa sov. Pasaa timbuzŋa, ŋgar toozi iyaryaaŋ kat. Lolozi pa titoor ŋgar toozi mako. Monmon tighamgham taliiŋzizi ve tizorzoor Maaron aliiŋa. Lolozi ikisi tuŋia mako. Ve saveeŋ tau yesŋa Maaron timbua na, titaghoni mako.

⁹ Paaghu to Epraim, yes tirao pa vaneghuuŋ pa paneegh. Eemon saawe tau malmal iburig, tiroi ve tighawaar.

¹⁰ Ve saveeŋ tau yesŋa Maaron timbua na, matazi kisini ve titaghoni mako. Laghooŋ toozi, lolozi pa taghoniiŋ tutuuŋ tooni mako.

¹¹ Ve uraat tintiina tomania gabua ŋgeretazi tau muuŋ Maaron igham zi ila matazi na, yes lolozi iveghaini kat.

¹² Saawe tau timbuzŋa tileep izi Isip, Maaron igham gabua ŋgeretazi tintiina izi taan raraate to Zoan, ve tighita pa tauzi matazi.

¹³ Ve saawe tau tila tivot Te Siŋsiŋai, i ivalagh te, le sirivu ila pa ŋas, ve sirivu ila pa tapir. I igham te iyooz imin didiiŋ. Tauta eez ivot pazi, ve titaghoni tila tivool pa ziige ite.

¹⁴ Mataaz, i igham taitai ivot, leso itotoi eez pazi. Ve mboŋ, i igham yav ivot, leso imuuŋ pazi ve titaghoni.

¹⁵ Saawe tau tileep izi nugh ŋginaaŋa, Maaron irav valaghin maet, ve igham yaa ivot pani. I igham yaa ireer tiina, leso tighun.