Mbouŋ to Yes Israela 78:1-8 in Mutu

¹ Yam tamtoghon tiou, aghur taliŋamim pa saveeŋ to naghaze napatoot gham pani. Saveeŋ to naghaze nasavia payam, yam asob alooŋ poiani.

² Pale avog ikaak, ve nasavia saveeŋ palelaaŋ pida payam. Pale nasavia mbeb pida to muuŋ tivot. Mbeb tonowen, pughudi iyooŋ.

³ Kamos tonene, nditimbuud tisavia payei ve nilooŋa, tauto niwatagi.

⁴ Muuŋ, Yoova ipatooŋ tapiri ivot ighazooŋ. Ye igham mbeb gharatooŋadi ve uraat tintina tivotvot. Tauto tamtoghon tipait iza pa tapiri ve poia toni. Uraat toni tonowen, irau taŋgooza pa ndinatuud maau. Tasavia padi, ghoro poia. Leso papaghu toit to pale muri tivot, tiwatagi paam.

⁵ Ataam to itiŋa Maaron talup ghiit tanim ee moghon, muuŋ ye ivotia pa nditimbuud to Yakop papaghu toni. Ye isavia tutuuŋ toni pa yes Israela, ve isaav ariaŋa pa nditimbuud ighaze tipatoot ndinatudi pani.

⁶ Leso yes paam tiwatagi, ve anadi tisavia pa ndinatudi, ve iseeŋga tovene itaghoni taghoni gha ila.

⁷ Ighaze tigham tovene, papaghu todi irau lolodi imaagh pa uraat tintina to Maaron igham di ne maau. Ve yes pale tinumeera, ve matadi iŋgal tutuuŋ toni, ve titaghoni.

⁸ Leso tigham ŋgar inimale nditimbudi sob. Pasa nditimbudi, ŋgar todi iyaryaaŋ kat. Lolodi pa titoor ŋgar todi maau. Moghon moghon tighamgham didiaaŋ, ve tizorzoor Maaron aliŋa. Lolodi ineep tuŋia ila toni maau. Ve saveeŋ to yesŋa Maaron timbua, titaghoni maau.

¹ Mbouŋ to Asap Yam tamtamon tsiau, aghur taliŋamim pa saveeŋ tau naghe napaduduuŋ gham pani ne. Saveeŋ tau naghe nasavia payam ne, yam asov alooŋ poghania.

² Yau pale nakaak avog, ve nasavia saveeŋ palelaaŋ siriv payam. Pale nasavia gabua siriv tau muuŋ tivot na. Gabua tawe, pughuzi iyooŋ.

³ Sinaiŋ tane, timbuunŋa tisavia payei gha nilooŋa, tauta niwataghi.

⁴ Muuŋ, Yoova itotoi tapiri ivot ighazooŋ. I igham gabua ŋgeretazi ve uraat tintiina ivotvot. Tauta tamtamon tipait eeza pa tapiri ve poia tooni. Uraat tooni tawe, irau taŋgooza pa natuunŋa mako. Iit aat tasavia pazi. Leso paaghu toit tau murei pale tivot na, tiwataghi paam.

⁵ Eez to itiŋa Maaron tavalupu ghiit tamin eemon, muuŋ i ivotia pa timbuunŋa tau Yakop paaghu tooni na. I isavia tutuuŋ tooni pa yes Israela, ve isaav ariaaŋ pa timbuunŋa ighe tipaduduuŋ natuzŋa pani.

⁶ Leso yes paam tiwataghi, ve anazi tisavia pa natuzŋa, ve iseeŋga tauvene taghon taghon gha ila.

⁷ Tauvene paaghu toozi irau lolozi iveegh pa uraat tintiina tau Maaron igham zi ne mako. Ve yes pale tinumeera, ve matazi iŋgal tutuuŋ tooni, ve titaghoni.

⁸ Leso tigham ŋgar imin timbuzŋa sov. Pasaa timbuzŋa, ŋgar toozi iyaryaaŋ kat. Lolozi pa titoor ŋgar toozi mako. Monmon tighamgham taliiŋzizi ve tizorzoor Maaron aliiŋa. Lolozi ikisi tuŋia mako. Ve saveeŋ tau yesŋa Maaron timbua na, titaghoni mako.