Mbouŋ to Yes Israela 77:7-17 in Mutu

⁷ “Vena, pale Maaron ipul muri payei, ve ipul ghei nineep sami itaghoni taghoni gha ila? Irau lolo poia payei muul maau?

⁸ Ŋgar to lolo ineep tuŋia ila to tamtoghon toni ve iuluul di, nene isob wa? Ve saveeŋ to ye imbua toman ghei, pale izi inim mbeb sorok itaghoni taghoni gha ila?

⁹ Ma Maaron ate yabyab kat, le ighami lolo imaagh pa poia toni? Tauto lolo isamin ghei muul maau ne?”

¹⁰ Nagham ŋgar tovene, tauto nasaav pa taug naghaze: “Lolog ipataŋan kat pasa, Maaron to ineep sala le sala kat ne, itoor ŋgar toni wa. Taghita tapiri inim inim le aazne, taghita muul maau.”

¹¹ Yoova, you pale matag iŋgal imuul ila pa uraat tiom tintina, ve mbeb gharatooŋadi to muuŋ ughamgham di.

¹² Pale matag iŋgal uraat tiom ariaŋadi to naol ne, ve nagham ŋgar padi pooi.

¹³ O Maaron, yom ughamgham ŋgar patabuaŋ moghon. Ŋgar tiom ve gabuam, nene ite kat. Maaron ite paam iza tiina inimale yom ne maau.

¹⁴ Yom Maaron to ughamgham mbeb gharatooŋadi tintina. Upatooŋ tapirim ivot ighazooŋ ila ndug ndug matadi ve tighita katini wa.

¹⁵ Yakop ve Yosep papaghu todi, yes tamtoghon tiom. Muuŋ, ila taum tapirim, yom upas yes Israela tivot pa pataŋani todi.

¹⁶ O Maaron, sawa to ya tintina tighita ghom, matughezaaŋ tiina igham di. Ve te to ineep izila sila we, imatughez paam, ve imbeluuta izaza.

¹⁷ Sawa tonenen, yaghur tae iyasosooŋ, ve uman tiina izi. Ve ndug ighani milia, ve lalaav kiliŋia.

⁷ “Mindai, pale Maaron ighur muuri payei, ve ipul ghei nileep saghat taghon taghon gha ila? Irau loolo poia payei muul mako?

⁸ Ŋgar to loolo isaghav tamtamon tooni ve iuluul zi, ene isov wa? Ve saveeŋ katini tau i imbua tomani ghei na, pale izi imin kaut sorok taghon taghon gha ila?

⁹ Ma Maaron aate yavyav kat, le ighamu loolo iveghai poia tooni? Tauta loolo isaghatin ghei muul mako ne?”

¹⁰ Nagham ŋgar tauvene, tauta nasaav pa taug naghe: “Lolog ipataŋan kat pasaa, Maaron tau ileep saaŋa le saaŋa kat na, itoor ŋgar tooni wa. Taghita tapiri ilam ilam le aazne, taghita muul mako.”

¹¹ Yoova, yau aat matag iŋgal imuul ila pa uraat tsio tintiina, ve gabua ŋgeretazi tau muuŋ ughamgham zi na.

¹² Yau aat matag iŋgal uraat tsio ariaŋazi ta naol ne, ve nagham ŋgar pazi poi.

¹³ O Maaron, yo ughamgham ŋgar patabuyaaŋ mon. Ŋgar tsio ve gabuam, ene maata ite kat. Maaron ite paam eeza tiina imin yo ne mako.

¹⁴ Yo Maaron tau ughamgham gabua ŋgeretazi tintiina. Utotoi tapirim ivot ighazooŋ ila nugh nugh matazi gha tighit katini wa.

¹⁵ Yakop ve Yosep paaghu toozi, ene tamtamon tsio. Muuŋ, ila taum tapirim, yo upas yes Israela tivot pa pataŋani toozi wa.

¹⁶ O Maaron, saawe tau yaa tintiina tighit ghom, roiŋ tiina igham zi. Ve te tau igheen izila siiŋa we, iroi paam, ve imbelmbeluut ghi ilala ilamlam.

¹⁷ Saawe tana, taitai gabgabuuŋ ve uman tiina izi. Ve lalaav lutluutu tiina, ve ighani milmilia ilala ilamlam.