Mbouŋ to Yes Israela 76:3-8 in Mutu

³ Sawa to koia tigham malmal pani tonowe, ye iŋgor polpolin pane ndinatu to yab ighanghan ila matadi, toman buza todi, ve irab balagin sigeu todi. Tovenen mbeb todi to malmal, ye iwaghamun di le tisob.

⁴ O Maaron, yom ŋgurubam tiina. Yom paghunam ve izam tiina kat. Ulib pa lolooz tintina to tineep irau sawa isob.

⁵ Koiamai, ndiran ariaŋadi. Timatughez maau. Eemoghon yom uparab toman di le ulib padi. Tauto tamtoghon tiom tila tiyou mbeb todi to malmal tisob tinim ledi. Yom urab koiamŋa tisob timatmaat, ve patudi tiwaghengheen izala taan pogho. Onoon, yes ndiran ariaŋadi. Tiraua kat pa malmal. Eemoghon irau tigham mbeb eta maau.

⁶ Maaron to Yakop, yom upamatughezan di ve uyaan di. Tauto yes to tilaan pa hos toman karis, tisob titaptap tizi le timatmaat.

⁷ O Maaron, yom moghon to tamtoghon tisob timatughez payom. Pasa, ighaze atem yabyab, sei irau iyoon ila matam?

⁸ Yes to koiadi tighamgham pataŋani padi ve titatan di, yom uyoon padi, ve ugham mulin di tisob. Yom uneep izi sambam, ve aliŋam izi inim, ve usavia atia to pale iŋarua koiadi. Ve sawa to ughur atia tonenen padi, tamtoghon tisob to taan tighita, le matughezaaŋ igham di, ve neneeŋadi moghon.

³ Saawe tau koiŋa tigham malmal pani ta sewe, i iŋgoor polpolin paneegh natŋa tau yav ighanghan ila matazi na, tomania mbuzaagh toozi, ve irav valaghin sigheu toozi. Tauvene gabua toozi to malmal, i ivaghamun zi le tisov.

⁴ O Maaron, yo mbonarim tiina. Yo paghunam ve ezam tiina kat. Uliiv loloz tintiina tau tigheen irau saawe.

⁵ Koiamaiŋa, zeran ariaŋazi. Tiroiroi mako. Eemon yo uparav tomani zi le uliiv zi. Tauta tamtamon tsio tila tiyau gabua toozi to malmal isov imin lez. Yo urav koiamŋa tisov timataar, ve patazi tivaghengheen ila taan. Onoon, yes zeran ariaŋazi. Tirau kat pa ghamuuŋ malmal. Eemon irau tigham gabua eta mako.

⁶ Maaron to Yakop, yo uparoi zi ve uyaon zi, le yes tau tilandoov hos tomania karis tisov titaptap tizi le timatmaat.

⁷ O Maaron, yo mon ta tamtamon tisov tiroiroi payo. Pa ighe atem yavyav, sei irau iyooz ila naghom?

⁸ Yes tau koiazŋa tighamgham pataŋani pazi ve titatan zi na, yo uyooz pazi, ve ugham mulin zi tisov. Yo uleep sambam, ve aliŋam izilam ve usavia atuya tau pale ughuru pa koiazŋa na. Ve saawe tau ughur atuya tana pazi, tamtamon tisov to taan tighita, le roiŋ igham zi, ve tineneeŋ mon.