Mbouŋ to Yes Israela 75:2-10 in Mutu

² Ve Maaron isaav ighaze: “You taug naghur sawa pa naŋgabiiz tamtoghon ve naghur atia padi. Ve gabizooŋ tiou, pale deŋia moghon.

³ Ighaze yoŋgyoog itok taan, ve tamtoghon tisob tisaŋeeŋ, you pale nakis taan pughu, leso ineep tuŋia.

⁴ Yes to tipapait taudi izadi, you nasaav padi naghaze: ‘Apait taumim iraua!’ Ve nasaav pa ndiran samsamia naghaze: ‘Aparim taumim malep. Tapirimim ineep sine?

⁵ Tovenen apait taumim malep, ve apiyaav saveeŋ velegiiŋ payou malep!’”

⁶ Pasa, tamtoghon to ndag iza, ma tamtoghon to ndag izila, ma tamtoghon to ndug pida paam, tirau tigham tamtoghon eta iza ivot inim tiina ne maau.

⁷ Maaron moghon, to igham tamtoghon izadi tivot tinim tiina. Pasa, ye to iŋgagabiiz tamtoghon ve ighurghur atia padi. Tamtoghon pida, ye itatan di. Ve pida, ye ipakur di le izadi tintina.

⁸ Yoova ikis rubruub eez ila nima. Rubruub tonowen ivon pa vaen ariaŋa. Vaen tonowen, nene mbalmbali toni. Ndiran samsamia to tineep izi taan, ye pale iliŋ vaen tonowen, ve ipaghun di pani, le tisob tighun suvuni. Ŋgiira to ineep ila rubruub mbole, pale tighuni paam.

⁹ Eemoghon you navovotia uraat tintina to Yoova irau sawa isob. Pale namboumbou, ve napapait Maaron to Yakop iza.

¹⁰ Pasa, ye isaav ighaze: “Ndiran samsamia, you pale napasob tapiridi. Ve ndiran deŋiadi, you pale napakur di ve napalot di, leso tapiridi ivot inim tiina.”

² Ve Maaron isaav ighe: “Yau taug naghur saawe to nagabiiz tamtamon ve naghur atuya pazi. Ve gabizooŋ tsiau, ene pale iduduuŋ mon.

³ Isaav ighe yogyoog itok taan ve tamtamon tisov tisaŋeeŋ, yau aat nakis taan puughu, leso igheen tuŋia.

⁴ Yes tau tipapait tauzi ezazi na, yau nasaav pazi naghe: ‘Apait taumim irao!’ Ve nasaav pa zeran sasaghati naghe: ‘Tapirimim igheen sindei? Apait tapirimim irao!

⁵ Tauvene apakur taumim sov, ve asik saveeŋ veleghiiŋ payau sov!’”

⁶ Pa tamtamon to aaz izaa, ma tamtamon to aaz izila, ma tamtamon to nugh siriv paam, ene irau tigham tamtamon eta eeza ivot imin tiina ne mako.

⁷ Maaron mon ta igham tamtamon ezazi ivot imin tiina. Pasaa, i ta igagabiiz tamtamon ve ighurghur atuya pazi. Tamtamon siriv, i itatan zi. Ve siriv, i ipakur zi le ezazi tintiina.

⁸ Yoova ikis rubruub ee ila niima. Rubruub tawe ivon pa vaen ariaaŋa. Vaen tawe, ene aatyavyav tooni. Zeran sasaghati tau tileep izi taan ne, i pale iliŋ vaen tawe, ve ipaghun zi pani, le tisov tighunu le isov. Rabrab tau igheen ila rubruub mboole na, pale tighunu paam.

⁹ Eemon yau navovotia uraat tintiina to Yoova irau saawe. Pale namboumbou mbouŋ, ve napapait Maaron to Yakop eeza.

¹⁰ Pasaa, i isaav ighe: “Zeran sasaghati, yau aat napasov tapirizi. Ve zeran duduŋazi, yau aat napakur zi ve napalot zi, leso tapirizi ivot imin tiina.”