Mbouŋ to Yes Israela 74:11-22 in Mutu

¹¹ Pughu vena to nimam ila murim, ve umbabatut ghei moghon? Irau uul ghei maau?

¹² Maaron, muuŋ ve inim, yom kinik tiei ve Volaaŋa tiei. Ve yom ughamgham uraat tintina izi taan pa uul ghei.

¹³ Muuŋ, taum tapirim to uvalag te, le pida ila pa ŋas, ve pida ila pa waan. Ve mbeb samsamia pida to tinepneep ila te lolo, yom urab balagin dabadi.

¹⁴ Leviatan paam, mbeb samia tiina to inepneep ila te lolo, yom urab balagin daba to naol ne, ve ugham anoŋa, ve upan mbeb sagsagŋa to tineep ndug balim ne pani.

¹⁵ Ndug pida, yom ugham ya ivotvot pa taan ve ireer. Ve ya tintina to ndug pida to tirereer irau sawa isob, yom ugham di timakmaak.

¹⁶ Yom to ughur mboŋ ve ndag, ve uŋgin di. Ve yom ughur ndag ve kaiyo tineep ila inadi.

¹⁷ Yom ughur taan seŋgaŋa, ve ughur sawa to ndug tuntunu, ve sawa to ndug yauŋa.

¹⁸ Yoova, matam iŋgal saveeŋ velegiiŋ to koiamŋa tipiyaava payom. Aazne, yes kankanooŋa to tiwatag ghom maau ne, tiwaghamun izam, ve tighita ghom unumale mbeb sorok.

¹⁹ Koiamai ŋgar todi inimale mbeb sagsag. Lolodi isamin tamtoghon eta maau. Ve yei tamtoghon tiom tapirimai irau mbeb eta maau. Tovenen upul ghei nila nimadi malep. Lolom imaagh payei malep. Pasa, yes titatan ghei le nineep sami kat.

²⁰ Muuŋ, yom umbua saveeŋ toman ghei ughaze yom pale unum Maaron tiei, ve yei ninim tamtoghon tiom. Matam iŋgal saveeŋ mbuaaŋ tiom tonenen, ve uul ghei. Ughita. Aazne, taan tiei ivon pa ndiran samsamia to tiyoŋyooŋ ila ndoroom lolo, ve tisasaŋan pa tigham malmal pa tamtoghon.

²¹ Upul ndiran samsamia titatan tamtoghon, ve tipamayaŋin di malep. Uul yes mbolaaŋa ve yes to tineep sami, leso tipait izam.

²² Maaron, yei tamtoghon tiom. Umundig ve uyoon payei lak! Koiamŋa tipakur di toman aliŋadi tiina. Ndag to naol ne, mboŋmaagh ila le rabrab izi, yes kankanooŋa to tiwatag ghom maau ne, tighamgham oroor tiina, ve tiveveleg ghom. Lolom imaagh malep. Matam iŋgal ŋgar to tighamghami ne, ve ughur atia padi.

¹¹ Puughu mindai ta ughur nimam ila murim, ve umamarar ghei mon? Irau uul ghei mako?

¹² Maaron, muuŋ ve ilam, yo kinik tsiei ve Uleeŋa tsiei. Ve yo ughamgham uraat tintiina izi taan to uul ghei.

¹³ Muuŋ, taum tapirim ta uvalagh te gha sirivu ila pa ŋas, ve sirivu ila pa tapir. Ve gabua sasaghati siriv tau tilepleep ila te loolo na, yo urav valaghin dabazi.

¹⁴ Leviatan paam, gabua saghati tiina tau ilepleep ila te loolo na, yo urav valaghin daaba ta naol ne, ve ugham anooŋa, ve upan gabua sagsagŋa tau tileep nugh ŋginaaŋa na pani.

¹⁵ Nugh siriv, yo ugham yaa ivotvot pa taan ve irereer. Ve yaa tintiina to nugh siriv tau tirereer irau saawe na, yo ugham zi timakmaak.

¹⁶ Yo ta ughur mboŋ ve mataaz, ve uŋginŋgin zi. Ve yo ughur aaz ve kaiyo tigheen ila niazi.

¹⁷ Yo ughur taan seŋgaaŋa, ve ughur saawe to nugh tuntunu, ve saawe to nugh yauŋa.

¹⁸ Yoova, matam iŋgal saveeŋ veleghiiŋ tau koiamŋa tisiksiki payo na. Aazne, yes kankanooŋa tau tiwatagh ghom mako na, tivavaghamunia ezam, ve tighit ghom umin kaut sorok.

¹⁹ Koiamaiŋa ŋgar toozi imin gabua sagsagŋa. Lolozi isaghatin tamtamon eta mako. Ve yei tamtamon tsio tapirimai irau gabua eta mako Tauvene upul ghei nila nimazi sov. Lolom iveegh payei sov. Pa yes titatan ghei le nileep saghat kat.

²⁰ Muuŋ, yo umbu saveeŋ tomani ghei ughe yo pale umin Maaron tsiei, ve yei nimin tamtamon tsio. Matam iŋgal saveeŋ mbuaaŋ tsio tana, ve uul ghei. Ughita. Aazne, taan tsiei ivon pa zeran sasaghati tau tiyoŋyooŋ ila ndoroom loolo, ve tisasaŋan pa liŋiiŋ siŋ pa tamtamon.

²¹ Upul zeran sasaghati titatan tamtamon ve tipamayaŋin zi sov. Uul yes mbolaaŋa ve yes tau tileep saghat na. Leso tipait ezam.

²² Maaron, yei tamtamon tsio. Uburig ve uyooz payei lak! Koiamŋa tipapakur tauzi toman aliŋazi tiina. Mataaz ta naol ne, mboŋoozo ila le ravrav izi, yes kankanooŋa tau tiwatagh ghom mako na, tighamgham oroor tiina ve tivevelegh ghom. Lolom iveegh sov. Matam iŋgal ŋgar tau tighamghamu na, ve ughur atuya pazi.