Mbouŋ to Yes Israela 73:5-18 in Mutu

⁵ Pataŋani naol to taan to tighamgham tamtoghon pida, nene tigham di maau. Yes ledi pataŋani eta maau.

⁶ Ŋgar to paitooŋ taudi, nene tipatooŋa ivot ighazooŋ ila tamtoghon matadi, inimale namatavub to tamtoghon tighuri ila luadi. Ve ŋgar todi to ghamuuŋ malmal, yes tipulpuli maau, inimale nonogiiŋa to moghon moghon tindud di pani.

⁷ Nepooŋ todi, poia moghon. Tovenen titub le paŋadi isarsar. Lolodi ivon pa ŋgar samsamia naol, ve moghon moghon tikalkaal ataam pa tiwaghamun tamtoghon.

⁸ Yes tiveveleg tamtoghon, ve tipipiyaav saveeŋ samsamia padi. Ve tipapait taudi izadi, ve tipamatughezan tamtoghon tighaze pale titatan di.

⁹ Yes tipakur taudi, ve tisasavia saveeŋ velegiiŋ pa Maaron to sambam. Ve nditadi to tineep izi taan ne, ndiran tonowen matadi velegin di, ve tighaze titatan di.

¹⁰ Yes tiweu tamtoghon to Maaron paam, ve titaghon di pa ŋgar todi tonowen. Ival tiina tighaze le tiloŋlooŋ saveeŋ todi.

¹¹ Ndiran samsamia tonowen tisavsaav tighaze: “Ah, Maaron to ineep sala kat we, ye le ŋgar? Ŋgar to nighamghami ne, Maaron iwatagi maau.”

¹² Aghita. Ndiran samsamia, nepooŋadi tovene. Ledi pataŋani eta maau, ve tindoundou ledi mbeb katindi.

¹³ Muuŋ, you nagham ŋgar tovene pa nepooŋadi. Tauto nasaav pa taug naghaze: “You tonene, nazuaria ghou naghaze le leg sosor eta sob, ve ŋgar ŋgalaaŋa moghon ineep ila lolog. Eemoghon ŋgar to nataghoni ne, anoŋa eta maau. Naghamghami sorok.

¹⁴ Pasa ndag to naol ne, mboŋmaagh ila le rabrab izi, Maaron ighurghur pataŋani payou. Mboŋmaagh to naol ne, ye iloslos ghou.”

¹⁵ Maaron, ŋgar tiou samia tonene, inimale nasavia ivot ighazooŋ ve tamtoghon tilooŋa, tone nagham kaarom pa tamtoghon tiom, ve naghamun ŋgar todi. Tauto ineep to taug moghon.

¹⁶ You nagham ŋgar naol pa nepooŋ poia to ndiran samsamia, ve nakaal pughu. Eemoghon naraua maau. Tauto igham lolog ipataŋan kat.

¹⁷ Muri ghoro, nalooŋ nala rumai patabuaŋ to Maaron, ve nasuŋ. Sawa tonenen, ghoro naghilaal, ve ŋgar tiou ivot pa mbeb to muri pale ivot pa ndiran samsamia.

¹⁸ Onoon kat, yom pale ugham di tilaagh ila ataam to kirikirikia. Leso ugham di titap, ve tisami.

⁵ Pataŋani naol to taan tau ighamgham tamtamon siriv na, igham zi mako. Yes lezi pataŋani eta mako.

⁶ Ŋgar to pakuruuŋ tauzi, ene titotoia ivot ighazooŋ ila tamtamon matazi, imin namatabub tau tamtamon tighuru ila luazi. Ve ŋgar toozi to ghamuuŋ malmal, yes tipulpuli mako, imin nonoghiiŋa tau monmon tinonogh zi pani.

⁷ Lepoogh toozi, poia mon. Tauvene titum kat. Lolozi ivon pa ŋgar sasaghati naol, ve monmon tiliil eez to tivaghamun tamtamon.

⁸ Monmon tivevelegh tamtamon, ve tisiksik saveeŋ sasaghati pazi. Ve tipapait tauzi ezazi, ve tiparoi tamtamon tighe yes pale titatan zi.

⁹ Yes tipakur tauzi, ve tisiksik saveeŋ veleghiiŋ pa Maaron to sambam. Ve zetazŋa tau tileep izi taan ne, zeran tawe matazi veleghin zi, ve tighe titatan zi.

¹⁰ Yes tigherev tamtamon to Maaron paam, gha titaghon zi pa ŋgar toozi tawe. Eval tiina tighe le tiloŋlooŋ saveeŋ toozi.

¹¹ Zeran sasaghati tawe tisavsaav tighe: “Ah, Maaron tau ileep saaŋa kat na, i le ŋgar? Ŋgar tau nighamghamu ne, Maaron iwataghi mako.”

¹² Aghita. Zeran sasaghati, lepoogh toozi tauvene. Lezi pataŋani eta mako, ve tindoundou lezi gabua katini.

¹³ Muuŋ, yau nagham ŋgar tauvene pa lepoogh toozi. Tauta nasaav pa taug naghe: “Yau tane, nazuari ghau naghe le leg sosor eta sov, ve ŋgar ŋgalaaŋa mon igheen ila lolog. Eemon ŋgar tau nataghoni ne, anooŋa eta mako. Naghamghamu sorok.

¹⁴ Pasaa saawe isov, ta mboŋoozo ila le ravrav izi, Maaron ighurghur pataŋani payau. Mboŋoozo ta naol ne, i iloslos ghau.”

¹⁵ Maaron, ŋgar tsiau saghati tane, imin ta nasavia ivot ighazooŋ gha tamtamon tilooŋa, kanaŋ nagham karom pa tamtamon tsio, ve nakau ŋgar toozi. Tauta igheen to taug mon.

¹⁶ Yau nagham ŋgar naol pa lepoogh poia to zeran sasaghati, ve nail puughu. Eemon narao mako. Tauta igham lolog ipataŋan kat.

¹⁷ Murei ra, naloŋ nala rumei patabuyaaŋ to Maaron ve nasuŋ. Saawe tana ra, naghilaal ve ŋgar tsiau ivot pa gabua tau murei pale ivot pa zeran sasaghati.

¹⁸ Onoon kat, yo pale ugham zi tilaagh ila eez tau pusukpusukia. Leso ugham zi titap, ve saghatiiŋ tiina igham zi.