Mbouŋ to Yes Israela 71:16-21 in Mutu

¹⁶ Yoova, yom upatooŋ tapirim ila uraat tintina. Tovenen you pale nala ve navotia uraat tiom tonenen pa tamtoghon, leso matadi iŋgali. Naghaze nasavia ŋgar deŋia to yom ughamghami. Lolog pa nasavia mbeb ite paam maau. Naghaze nasavia ŋgar tiom deŋia moghon.

¹⁷ Sawa to pain ghou ve inim imuul aazne, yom upaghazoŋan ghou pa ŋgar tiom. Tauto navovotia uraat tiom gharatooŋadi pa tamtoghon. Uraat tonowen, ite kat.

¹⁸ O Maaron, aazne nanim olman waat, ve moom iza pa dabag wa. Eemoghon upul murim payou malep! Uneep toman ghou le irau navotia tapirim ve uraat tiom tintina pa ndinatumai, nditimbumai, ve iseeŋga taghoni gha ila.

¹⁹ Maaron, tapirim ve ŋgar tiom deŋia, nene tiina le tiina kat. Izala izala le ikis sambam. Ve uraat naol to yom ughamgham di ne, tovene paam. Nene tintina kat. Sei to pale irau ghom? Eta maau.

²⁰ Onoon, yom upul pataŋani naol tivot, ve tiwaghamun ghou. Eemoghon yom pale ugham ghou naneep pooi muul. Paam namaat nazila naal. Eemoghon yom pale ugham mulin ghou. Irau namaat maau.

²¹ Ve yom pale upakur ghou, ve ugham izag ivot inim tiina, ve urab ateg, leso lolog poia muul.

¹⁶ Yoova, yo utotoi tapirim ila uraat tintiina. Tauvene yau aat nala ve navotia uraat tsio tana pa tamtamon leso matazi iŋgali. Naghe nasavia ŋgar duduuŋa tau yo ughamghamu na. Lolog pa nasavia gabua ite paam mako. Naghe nasavia ŋgar tsio duduuŋa mon.

¹⁷ Saawe tau kukuag ve ilam aazne, yo upaghazoŋai ghau pa ŋgar tsio. Tauta navovotia uraat tsio ŋgeretazi pa tamtamon. Uraat tawe, maata ite.

¹⁸ O Maaron, aazne namin kooŋ, ve moom igham dabag wa. Eemon ughur murim payau sov! Uleep tomani ghau le irau navotia tapirim ve uraat tsio tintiina pa natmaiŋa, timbumaiŋa, ve iseeŋga taghon gha ila.

¹⁹ Maaron, tapirim ve ŋgar tsio duduuŋa, ene tiina le tiina kat. Izala izala le ikis sambam. Ve uraat naol tau yo ughamgham zi na, tauvene paam. Ene tintiina kat. Sei irau ghom? Eta mako.

²⁰ Onoon, yo upul pataŋani naol ivot ve ivaghamun ghau. Eemon yo pale ugham ghau naleep poia muul. Paita namaat gha nazila naal tane. Eemon yo pale ugham mulin ghau. Irau namaat mako.

²¹ Ve yo pale upakur ghau, ve ugham ezag ivot imin tiina, ve urav ateg, leso lolog poia muul.