Mbouŋ to Yes Israela 71:1-9 in Mutu

¹ Yoova, you nanumeer ghom, ve nayooŋ ilat tiom. Upul koiagŋa titatan ghou malep. Pasa, ighaze tilib payou, pale mayag.

² Yom utataghon ŋgar deŋia. Tovenen uul ghou, ve upas ghou navot pa pataŋani tiou tonene. Ughur taliŋam payou ve uul ghou lak.

³ Yom Volaaŋa tiou ariaŋa. Uponpoon ghou pa koiagŋa unumale raŋ to izala kat. Ve unum ruum ariaŋa pa nayooŋ ila lolo. Sawa isob, you irau naŋarua ghom, leso mbeb eta iwaghamun ghou sob, ve naneep pooi. Aliŋam inim pataghaaŋ wa ughaze yom pale ugham mulin ghou.

⁴ Maaron tiou, ugham mulin ghou ila ndiran samsamia nimadi. Pasa yes ndiran to sosor, ve lolodi isamin tamtoghon eta maau. Ighaze tikis ghou, nene pale tiwaghamun ghou kat.

⁵ Yoova, you naghur matag payom pa uul ghou. Tiina tiou, sawa to pain ghou ve inim, you nanumeer ghom.

⁶ Sawa to naneep ila tinaŋ apo ve inim, you naneep ila nimam. Tovenen sawa to tinaŋ ipoop ghou, yom uŋgin ghou. Tauto moghon moghon napapait ghom pa poia tiom.

⁷ Ival tiina tigham ŋgar naol payou. Pasa, tighita ŋgar to ivotvot payou ne, le tighilaal katin ghom. Yom unum inag ariaŋa to yoŋgaaŋ.

⁸ Tovenen mboŋmaagh ila le rabrab izi, lolog poia kat payom, ve avog ipapait izam pa tapirim ve poia tiom.

⁹ Aazne, nanim olman waat wa. Eemoghon ughita ghou nanimale mbeb samia to tamtoghon tipiyaava ilale ne malep. Tapirig isob wa. Upul murim payou malep.

¹ Yoova, yau nanumeer ghom ve nayooŋ ilat tsio. Upul koiagŋa titatan ghau sov. Pa ighe tiliiv ghau, ene pale mayag.

² Yo utataghon ŋgar duduuŋa. Tauvene uul ghau ve upas ghau navot pa pataŋani tsiau tane. Ughur taliŋam payau ve uul ghau lak.

³ Yo Uleeŋa tsiau ariaaŋa. Uponpoon ghau pa koiagŋa imin maetaaz tau izala kat. Ve umin ruum ariaaŋa to nayooŋ ila loolo. Saawe isov, yau irau naŋarui ghom, leso gabua eta ivaghamun ghau sov, ve naleep poia. Aliŋam ilam pataghaaŋ wa ughe yo pale ugham mulin ghau.

⁴ Maaron tsiau, ugham mulin ghau ila zeran sasaghati nimazi. Pa yes zeran to sosor, ve lolozi isaghatin tamtamon eta mako. Isaav ighe tikis ghau, ene pale tivaghamun ghau kat.

⁵ Yoova, yau naghurghur matag payo to uul ghau. Tiina tsiau, saawe tau kukuag ve ilam, yau nanumeer ghom.

⁶ Saawe tau naleep ila tinaŋ aapo ve ilam, yau naleep ila yo nimam. Tauvene saawe tau tinaŋ ipoop ghau, yo uŋgin ghau. Tauta monmon napapait ghom pa poia tsio.

⁷ Eval tiina tigham ŋgar naol payau. Pasaa, tighita ŋgar tau ivotvot payau ne, le tighilaal katin ghom. Yo umin niag ariaaŋa to yoŋgaaŋ.

⁸ Tauvene mboŋoozo ila le ravrav izi, lolog poia kat payo, ve avog ipapait ezam pa tapirim ve poia tsio.

⁹ Aazne, namin kooŋ wa. Eemon ughit ghau namin gabua saghati tau tamtamon tisiki ilale na sov. Tapirig imbool wa. Ughur murim payau sov.