Mbouŋ to Yes Israela 69:7-33 in Mutu

⁷ You nambesmbees payom, tauto tamtoghon tipiyaav saveeŋ velegiiŋ naol payou. Yes tigham ghou mayag, ve natudtud moghon.

⁸ Taug siŋ tiou tighita ghou nanimale you ŋgeu sumbu. Ve toŋvetaz tiou kat to tinamai ee moghon, yes tipul muridi payou inimale you to ndug ite.

⁹ Ŋgar tiou iyaryaaŋ naghaze le nagharaat rumai tiom. Eemoghon ŋgar tonene, to aazne inim pughu pa nambaad pataŋani tiina inimale yab ighan ghou. Yes to tiveleg ghom, tiveleg ghou paam.

¹⁰ Sawa to natatan taug, ve naŋgun taug pa ghaniiŋ aniiŋ, tamtoghon matadi velegin ghou.

¹¹ Ve sawa to lolog ipataŋan, ve nagharaat taug maau, ve nandud uli to moŋiiŋ, yes tiŋiŋ payou.

¹² Yes to tiluplup di izi maran ate, tininin avodi payou. Ve yes ghunuuŋa timboumbou ghou inimale ŋalalaŋ.

¹³ Eemoghon suŋuuŋ tiou iŋaŋarua ghom moghon. Yoova, poia tiom, nene tiina kat. Lolom isamin ghou, ve uul ghou lak! Lolom ineep tuŋia ila to tamtoghon tiom ve uluul di. Tovenen sawa sine to ughita poia, ulooŋ suŋuuŋ tiou tonene, ve uul ghou.

¹⁴ Upas ghou navot pa pataŋani tiina tonene. Pa vene, agheg putukia ila tiiŋ le malmalig nazila. Ugham mulin ghou ila koiagŋa nimadi. Undae ghou naza pa mazovan lolo.

¹⁵ Uul ghou. Pa vene, yawaaŋa izugua ghou, ve iweu ghou nalaleg. Ughita. Paam nandal nazila mazovan lolo. Aazne, you naneep izila saambu to yes mateeŋa, ve avo ighaze iŋgup tonene. Upas ghou navot.

¹⁶ Yoova, yom poiam. Lolom ineep tuŋia ila to tamtoghon tiom ve uluul di irau sawa isob. Tovenen ulooŋ suŋuuŋ tiou tonene, ve uul ghou. Yom lolom isamin ghei kat. Tovenen matam imuul inim payou.

¹⁷ You mbesooŋa tiom. Uŋgooz matam payou malep. Pasa, aazne naneep ila pataŋani tiina lolo. Tovenen ulooŋ suŋuuŋ tiou, ve uul ghou rikia.

¹⁸ Unum uyoon ila digeg, ve uul ghou. Ugham mulin ghou ila koiagŋa nimadi.

¹⁹ Ŋgar to koiagŋa tigham payou ne, yom uwatagi wa. Yes tiveveleg ghou, ve tipamayaŋin ghou, ve tiwaghamun izag kat.

²⁰ Saveeŋ velegiiŋ to tipiyaava payou, nene igham lolog ipataŋan kat. Naghita naghaze irau poiag muul maau. You naghaze pale tamtoghon lolodi isamin ghou, ve tinim tirab ateg. Eemoghon maau. Eta inim peria tiou maau.

²¹ Sawa to pitool ghou, koiagŋa tighur mbeb lili ila aniiŋ tiou. Ve sawa to murun ghou, tigham ag vaen papaii.

²² Tovenen suŋuuŋ tiou iŋarua ghom naghaze: Sawa to koiagŋa yesŋa nditadi tilup di ve tighanghan, ugham toŋ to aniiŋ todi ineep izala, inim liis padi, ve iwaghamun di.

²³ Ugham matadi ipis, leso tighita ndug muul sob. Ve ugham tapiridi isob, ve aghedi ipaspas.

²⁴ Naghaze uŋgal matadi, ve tiyamaan katin mbalmbali tiom. Mbalmbali tiom iza todi, ve iwaghamun di kat, ghoro poia!

²⁵ Inadi to nepooŋ pale balim. Tamtoghon eta irau ineep ila mbeez todi muul maau.

²⁶ Pasa, tamtoghon to yom ulosi ve ughur pataŋani pani, ndiran samsamia tonowen tighur pataŋani iza toni muul, ve tinin avodi pa pataŋani to ivot pani.

²⁷ Sosor to ndiran tonowen, lolom imaagh pani malep. Matam kisini, ve ughur atia padi le tiyamaana kat! Ughurghur di malep.

²⁸ Umus izadi pa rau to nepooŋ mataad yaryaara. Rau to tamtoghon deŋiadi izadi tineep ila, ndiran tonowen izadi ila toman di malep.

²⁹ O Maaron, aazne nambaad pataŋani ve nayamaan yabyabuuŋ tiina. Tovenen unum uul ghou. Uŋguaaz ghou nazala sala. Leso naneep pooi.

³⁰ You pale nambou ve napait Maaron iza. Pasa, ye igham lolog poia kat. Tovenen you naghaze napaiti.

³¹ Ŋgar tovene, nene igham Yoova lolo poia kat le ilib pa makau katindi to tighamgham di pa watooŋrau.

³² Yes to tinumeer Maaron ve timbadbaad pataŋani, ighaze tighita Maaron iuul ghou, nene pale tinidi iza. Ve yes to tizuaria di pa Maaron ne paam. Ighaze tighita ulaaŋ to ye igham payou, nene pale ipalot di.

³³ Pasa, yes to timbadbaad pataŋani ve tinumeer Yoova, ye iloŋlooŋ suŋuuŋ todi. Tamtoghon toni to tineep ila koiadi nimadi, ye irau lolo imaagh padi maau.

⁷ Yau nabesbees payo, tauta tamtamon tisiksik saveeŋ veleghiiŋ payau. Yes tigham ghau mayag ve natudtud mon.

⁸ Taug siŋ tsiau tighit ghau imin yau ŋeer suumbu. Ve toŋvetaz tsiau duduuŋ tau tinamai eemon na, tighur murizi payau imin yau to nugh ite.

⁹ Ŋgar tsiau iyaryaaŋ naghe le nagharaat rumei tsio. Eemon ŋgar tane, ta aazne imin puughu pa nabaad pataŋani tiina imin yav ighan ghau. Yes tau tivelegh ghom na, tivelegh ghau paam.

¹⁰ Saawe tau natatan taug, ve naŋgun taug pa ghaniiŋ aniiŋ, tamtamon matazi veleghin ghau.

¹¹ Ve saawe tau lolog ipataŋan, ve nagharaat taug mako, ve nanonogh ghau pa uuli to moŋiiŋ, tiŋiŋ payau.

¹² Yes tau tiluplup zi ila maaran aate na, tisisinai ghau. Ve yes ghunuuŋa timboumbou ghau imin ŋalalaŋ.

¹³ Eemon suŋuuŋ tsiau iŋaŋarui ghom mon. Yoova, poia tsio, ene tiina le tiina kat. Lolom isaghatin ghau ve uul ghau lak! Lolom isaghav tamtamon tsio, ve uluul zi irau saawe. Tauvene saawe sindei tau ughita poia, na ulooŋ suŋuuŋ tsiau tane, ve uul ghau.

¹⁴ Upas ghau navot pa pataŋani tiina tane. Mako pale agheg brusia ila tiiŋ ve malmalig nazila! Ugham mulin ghau ila koiagŋa nimazi. Uit ghau nazaa pa mazavan loolo.

¹⁵ Uul ghau. Mako pale yaa ivot toman tapiri ve izugh ghau, ve igherev ghau gha nalaleg! Ughita. Paita nazal nazila mazavan loolo tane. Aazne, yau naleep izila puura to yes mateegha, ve aavo ighe ivool tane. Upas ghau navot.

¹⁶ Yoova, yo poiam. Lolom isaghav tamtamon tsio ve uluul zi irau saawe. Tauvene ulooŋ suŋuuŋ tsiau tane ve uul ghau. Yo lolom isaghatin ghei kat. Tauvene matam imuul ilam payau.

¹⁷ Yau besooŋa tsio. Uŋgooz naghom payau sov. Pa aazne naleep ila pataŋani tiina loolo. Tauvene ulooŋ suŋuuŋ tsiau, ve uul ghau rekia.

¹⁸ Ulam uyooz ila zigeg, ve uul ghau. Ugham mulin ghau ila koiagŋa nimazi.

¹⁹ Ŋgar tau koiagŋa tighamgham payau ne, yo uwataghi wa. Yes tivevelegh ghau, ve tipamayaŋin ghau, ve tivaghamunia ezag kat.

²⁰ Saveeŋ veleghiiŋ tau tisiksiki payau, ene igham lolog ipataŋan kat. Naghita naghe irau poiag muul mako. Yau naghe pale tamtamon lolozi isaghatin ghau, ve tilam tirav ateg. Eemon mako. Eta ilam peria tsiau mako.

²¹ Saawe tau pitool ghau, koiagŋa tighur gabua lilia ila aniiŋ tsiau. Ve saawe tau murun ghau, tigham leg vaen papaii.

²² Tauvene suŋuuŋ tsiau iŋarui ghom naghe: Saawe tau koiagŋa yesŋa zetazŋa tilup zi pa ghanghaniiŋ, na ugham boor tau aniiŋ toozi igheen izala na, imin liis pazi ve ivaghamun zi.

²³ Ugham matazi ikumkuum, leso tighita nugh muul sov. Ve ugham tapirizi isov, ve aghezi imatmaat.

²⁴ Naghe uŋgal matazi ve tiyamaan katin aatyavyav tsio. Aatyavyav tsio tana izaa toozi ve ivaghamun zi kat, o poi!

²⁵ Upasov zi le nugh toozi balim. Balbaal toozi ta naol ne, tamtamon eta ileep ila muul sov.

²⁶ Pasaa, tamtamon tau yo ulosi ve ughur pataŋani pani na, zeran sasaghati tawe tighur pataŋani izaa tooni muul, ve tisisinaii pa pataŋani tau ivot pani na.

²⁷ Sosor to zeran tawe, lolom iveegh pani sov. Matam kisini, ve ughur atuya pazi le tiyamaana kat! Ughurghur zi sov.

²⁸ Umus ezazi pa rau to lepoogh maata yaryaare. Rau tau zeran duduŋazi ezazi igheen ila na, yes tawe ezazi ila tomani zi sov.

²⁹ O Maaron, aazne nabaad pataŋani ve nayamaan yavyavuuŋ tiina. Tauvene ulam uul ghau. Uŋguaaz ghau nazala saaŋa. Leso naleep poi.

³⁰ Yau aat nambou ve napait Maaron eeza. Pasaa, i igham ghau lolog poia kat. Tauvene yau naghe napakuru.

³¹ Ŋgar tauvene, ene igham Yoova loolo poia kat le iliiv makau katini tau tighamgham zi pa watooŋrau na.

³² Yes tau tinumeer Maaron ve tibadbaad pataŋani na, isaav ighe tighita Maaron iuul ghau, ene pale tintinizi. Ve yes tau tizuzuari zi pa Maaron na paam. Ighe tighita uleeŋ tau i igham payau ne, ene pale ipalot zi.

³³ Pasaa, yes tau tibadbaad pataŋani ve tinumeer Yoova na, i iloŋlooŋ suŋuuŋ toozi. Tamtamon tooni tau tileep ila koiazŋa nimazi na, i irau loolo iveegh pazi mako.