Mbouŋ to Yes Israela 68:11-32 in Mutu

¹¹ Ŋgeu Tiina ivotia malmal varu ighaze ye ilib pa koia wa. Tovenen ndiliva ival tilaan tila, ve titemtem tighaze:

¹² “Ou alooŋ! Yes kinik toman ndaaba todi tila wa! Tisob tighau tila wa! Tauto ndaaba toit tiyou mbeb to koiaad tinim, ve tigham di pa ndiliva to tineep izi paanu we, leso tiwarein di.

¹³ Ndiliva tiei tipambood di pa silva ve gol, le paghunadi kat, tinimale man mbaluuz to tigharaata pa silva, ve tipaak gol milmilia ila bage. Pughu vena to yam pida ala pa malmal maau, ve aneep sorok izi paanu toman sipsip?”

¹⁴ Sawa to Maaron ariaŋa ireu mbirisan yes kinik, ye igham ais patu patu titaptap tizi ila lolooz Zalmon. Tauto inaan di tighau tila.

¹⁵ Lolooz to ndug Basan, nene tiina ve daba izala kat, ve le mbuŋa mbuŋa ve kazimuŋa katindi. Daba izala kat, tauto ye le iza.

¹⁶ Lolooz to ndug Basan, yom lem mbuŋa mbuŋa naol. Pughu vena to ughita Maaron igham lolooz Zion inim ina to nepooŋ, ve ireu lolom? Tauto lolom isami pani ne? Onoon kat, ye pale ineep izi lolooz tonene itaghoni taghoni gha ila.

¹⁷ Ŋgeu Tiina ipul lolooz Sinai, ve ilaagh toman karis toni ndiŋndiŋ ndiŋndiŋ to malmal, le tila tivot izi ina patabuaŋ to Zion we.

¹⁸ Maaron, yom ughereb koiamŋa katindi to ulib padi ne, ve titaghon ghom, ve yamŋa azala lolooz tiom daba to sala we. Tamtoghon tigham lem mbeb popoiadi naol. Yes to tizorzoor aliŋam ne paam, tiput aghedi payom, ve tigham lem mbeb. Onoon kat, Maaron toit Yoova, moghon moghon ye inepneep izi lolooz toni tonene.

¹⁹ Tapait Ŋgeu Tiina pa poia toni! Ndag to naol ne, ye iuluul ghiit pa badooŋ pataŋani toit. Maaron toit, ye Maaron to ighamgham mulin ghiit pa pataŋani toit.

²⁰ Maaron toit, ye Maaron to ulaaŋ. Onoon kat, Maaron toit Yoova, ye ighamgham mulin ghiit. Tauto tamaat maau, ve taneep pooi.

²¹ Maaron pale irab balagin koia dabadi. Tamtoghon to titaghon ataam samia, ve tighamgham sosor, ye pale irab mbirisan dabadi rubruuba, le tisob timatmaat.

²² Ŋgeu Tiina isaav ighaze: “Koiagŋa irau tighau maau. Ighaze tineep izi lolooz to ndug Basan, ma tineep sila kat izila mazovan, nene pale nagham di tisob timuul tinim.

²³ Siŋidi pale ireer izi, le ipot inimale karoos ila taan pogho, leso awai ila. Ve ŋgavuun tiam pale tighuni le isooŋ di.”

²⁴ Maaron, yom kinik tiou. Yom ulib pa koiamŋa wa. Tauto aazne, unum toman lolom poia, ve ulooŋ ula rumai tiom patabuaŋ ila ival tiina matadi. Yom umuuŋ, ve tamtoghon tiom titaghon ghom ve yamŋa alooŋ ala.

²⁵ Yes to mbouŋ timuuŋ, ve ndiliva papaghu titoktok kakaap, ve titaghon di. Ve yes to tipambar ambam, ve yes to tivivib sab ve tavuur tilaagh muri.

²⁶ Yam Israela to avot ila to Yakop, alup gham ila Maaron nagho ve apaiti pa poia toni. Yam asob apait Yoova iza!

²⁷ Aghita. Rumai to Benyamin to ival maau ne, timuuŋ. Ghoro yes daba to Yuda toman tamtoghon todi titaghon di. Ve yes daba to Sebulun ve Naptali tilaagh muri.

²⁸ Maaron, yom usaav ariaŋa pataghaaŋ ughaze yei Israela pale lemai tapirimai tiina, ve niyoon ariaŋa. Upatooŋ tapirim payei muul, inimale muuŋ upatooŋa payei.

²⁹ Yes kinik to taan pale tinim tivot Yerusalem, ve tigham lem mbeb popoia ilooŋ ila rumai tiom patabuaŋ.

³⁰ Yes Isipa tinepneep ila vivib lolo to ya Nil dige we tinimale poghai. Ve yes kinik to ndug pida tilaghlaagh toman ndaaba todi tinimale makau ketooŋ to tiketkeet toman ndinatudi. Uyaan koiamai tonowen, leso tiput aghedi payom, ve tighur yaam silva todi inim lem pa tipakur ghom. Ndug ndug to lolodi pa ghamuuŋ malmal, ureu mbirisan di.

³¹ Kinik to yes Isipa pale imbaaŋ uraata toni tinim Yerusalem, leso yeiŋa nisavsaav pa lupuuŋ tiei. Ve tamtoghon to Etiopia paam, pale rikia tikaak nimadi iza, ve tisuŋ pa Maaron.

³² Yam kinik to taan toman tamtoghon tiam, ambou pa Maaron. Ambou pani ve apaiti.

¹¹ Ŋeer Tiina ivotia malmal vaaru ighe i iliiv koiŋa wa. Tauvene zilivaa eval tilaan tila, ve tibobaini tighe:

¹² “Ou alooŋ! Yes kinik tomania zaaba toozi tila wa. Tisov tighawaar wa! Tauta zaaba toit tiyau gabua to koiaanŋa tilam, ve tigham pa zilivaa tau tileep nughei we, leso tivarei zi.

¹³ Zilivaa tsiei tipabood zi pa silva ma gol le paghunazi kat, imin mbunumoor tau tigharaata pa silva, ve tipaak gol milmilia ila baage. Puughu mindai ta yam siriv ala pa malmal mako, ve aleep sorok nughei tomania sipsip?”

¹⁴ Saawe tau Maaron saksaki ireu mbirisai yes kinik, i igham ais paatu paatu titaptap tizi ila loloz Zalmon. Tauta inaan zi gha tighawaar.

¹⁵ Loloz to nugh Basan, ene tiina ve daaba izala kat, ve le mbua ve sapsapu katini. Daaba izala kat, tauta i le eeza.

¹⁶ Loloz to nugh Basan, yo lem mbua naol. Puughu mindai ta ughita Maaron igham loloz Zion imin niia to lepoogh, ve ireu lolom? Tauta lolom isaghat pani ne? Onoon kat, i pale ileep izi loloz tane taghon taghon gha ila.

¹⁷ Ŋeer Tiina ipul loloz Sinai, ve ilaagh tomania karis tooni ndiŋndiŋ ndiŋndiŋ to malmal, le tila tivot niia patabuyaaŋ ta Zion we.

¹⁸ Maaron, yo ugherev koiamŋa katini tau uliiv zi na, gha titaghon ghom ve yamŋa azala loloz tsio daaba ta saaŋa we. Tamtamon tigham lem gabua popoia maata maata. Yes tau tizorzoor aliŋam na paam, tiput aghezi payo, ve tigham lem gabua. Onoon kat, Maaron toit Yoova, monmon i ilepleep izi loloz tooni tane.

¹⁹ Tapait Ŋeer Tiina pa poia tooni! Saawe isov, i iuluul ghiit pa badooŋ pataŋani toit. Maaron toit, i Maaron tau ighamgham mulin ghiit pa pataŋani toit.

²⁰ Maaron toit, i Maaron to uleeŋ. Onoon kat, Maaron toit Yoova, i ighamgham mulin ghiit. Tauta tamaat mako, ve taleep poi.

²¹ Maaron pale irav valaghin koiŋa dabazi. Yes tau titaghon eez saghati ve tighamgham sosor na, i pale irav mbirisai dabazi rubruuba, le tisov timataar.

²² Ŋeer Tiina isaav ighe: “Koiagŋa irau tighau mako. Isaav ighe tileep izi loloz to nugh Basan, ma tileep siiŋa kat izila mazavan, ene aat nagham zi tisov timuul tilam.

²³ Siŋizi pale ireer izi, ve ipot ila taan paavo, leso awai ila. Ve ŋgavuun tsiam pale tighunu, le isooŋ zi.”

²⁴ Maaron, yo kinik tsiau. Yo uliiv koiamŋa wa. Tauta aazne, ulam toman lolom poia, ve uloŋ ula rumei tsio patabuyaaŋ ila eval tiina matazi. Yo umuuŋ, ve tamtamon tsio titaghon ghom gha yamŋa aloŋ ala.

²⁵ Yes to mbouŋ timuuŋ, ve zilivaa paghpaaghu tau titoktok kakaap na titaghon zi. Ve yes to ravuuŋ ambam, ve vivuuŋ mboi ve tavuur ma gabua siriv paam tilaagh murei.

²⁶ Yam Israela tau avot ila to Yakop na, alup gham ila Maaron naagho ve apaiti pa poia tooni. Yam asov apait Yoova eeza!

²⁷ Aghita. Rumei to Benyamin tau eval mako na, timuuŋ. Mako yes daaba to Yuda tomania tamtamon toozi titaghon zi. Ve yes daaba to Sebulun ve Naptali tilaagh murei.

²⁸ Maaron, yo usaav ariaaŋ pataghaaŋ ughe yei Israela aat lemai tapirimai tiina ve niyooz ariaaŋ. Utotoi tapirim payei muul, imin muuŋ utotoia payei.

²⁹ Yes kinik to taan pale tilam tivot Yerusalem, ve tigham lem gabua popoia iloŋ ila rumei tsio patabuyaaŋ.

³⁰ Yes Isipa tilepleep ila pizpiiz loolo ta yaa Nil ziige we imin poghai. Ve yes kinik to nugh siriv tilaghlaagh tomania zaaba toozi timin makau umbaal tau tiketkeet tomania natuzŋa. Uyaon koiamaiŋa tawe, leso tiput aghezi payo, ve tighur maet silva toozi imin lem to tipakur ghom. Nugh nugh tau lolozi pa ghamuuŋ malmal na, ureu mbirisai zi.

³¹ Kinik to yes Isipa pale imbaaŋ uraata tooni tilam Yerusalem, leso yeŋa nisavsaav pa lupuuŋ tsiei. Ve yes to Etiopia paam, pale rekia tiit nimazi izaa, ve tisuŋ pa Maaron.

³² Yam kinik to taan tomania tamtamon tsiam, ambou pa Maaron. Ambou mbouŋ pani ve apakuru.