Mbouŋ to Yes Israela 63:1-10 in Mutu

¹ O Maaron, yom Maaron tiou. Mboŋmaagh kat, suŋuuŋ tiou iŋarua ghom naghaze unum uneep digeg. You nakausim payom naghaze nalat nagharau ghom, ghoro poia. Pasa aazne, naneep saguan payom. You lolog payom kat, nanimale ŋgeu to ilaghlaagh ila ndug to le ya maau, ve murun matini.

² Pasa, matag iŋgal imuul ila pa sawa to naghita ghom ila rumai tiom patabuaŋ lolo, ve naghita katin tapirim toman ŋgurubam.

³ Nepooŋag to taan, nene poia. Eemoghon naghita naghaze ŋgar to lolom ineep tuŋia ila to tamtoghon tiom ve uluul di, nene mbeb to poia le poia kat. Tovenen you pale nalool, ve napait izam ve napakur ghom.

⁴ Pale napait izam pa poia tiom ila ila le nepooŋ tiou to taan isob. Pale nakaak nimag iza, ve nasuŋ payom.

⁵ Pasa, yom ugham lolog poia kat inimale naneep ila ghanghaniiŋ, ve naghan aniiŋ to poia ve ŋgoreeŋa kat le isooŋ katin ghou. Tauto lolog poia kat, ve nambou pa napait ghom.

⁶ Sawa to nazi nagheen, matag iŋgalŋgal ghom. Naghamgham ŋgar payom pa mboŋ ila ila le ndugizau.

⁷ Pasa, yom to Ulaaŋa tiou. You naneep pooi ila nimam samba inimale tatareek ndinatu tiyooŋ ila tinandi bage samba. Tauto tinig iza, ve namboumbou.

⁸ You lolog ineep tuŋia ilat tiom, ve nimam waan ipapalot ghou.

⁹ Yes to tizuaria di tighaze tirab ghou namaat, taudi pale timaat ve tizila ndug to mateeŋa.

¹⁰ Pale buza ighan di timatmaat, ve ŋgavuun sagsag tighan patudi.

¹ Mbouŋ to David Mbouŋ tane iŋarui saawe tau David ileep izi nugh ŋginaaŋa to Yudea O Maaron, yo Maaron tsiau. Mboŋoozo geeg, suŋuuŋ tsiau iŋarui ghom naghe ulam uleep zigege. Yau napasawal naghe le nalat nagharau ghom, o poi. Pasaa, aazne naleep soghan payo. Yau lolog payo kat, imin ŋeer tau ilaghlaagh ila nugh tau le yaa mako na, ve murun matini.

² Pasaa, matag iŋgal imuul ila pa saawe tau naghit ghom ila rumei tsio patabuyaaŋ loolo, ve naghit katin tapirim tomania mbonarim.

³ Lepoghag to taan, ene poia. Eemon naghita naghe ŋgar to lolom isaghav tamtamon tsio ve uluul zi, ene gabua tau poia le poia kat. Tauvene yau aat nayoor ezam ve napait ghom.

⁴ Pale napait ezam pa poia tsio ila ila le lepoogh tsiau to taan isov. Pale nait nimag izaa, ve nasuŋ payo.

⁵ Pasaa, yo ugham lolog poia kat, imin naleep ila ghanghaniiŋ, ve naghan aniiŋ tau poia ve ŋgoreeŋa kat le isooŋ ghau kat. Tauta lolog poia kat, ve nambou mbouŋ to napait ghom.

⁶ Saawe tau nazi nagheen, matag iŋgalŋgal ghom. Naghamgham ŋgar payo mboŋ ila le nughizau.

⁷ Pasaa, yo ta Uleeŋa tsiau. Yau naleep poi ila nimam saamba imin tatareek natŋa tiyooŋ ila baage saamba. Tauta namboumbou toman tintinig.

⁸ Yau lolog isaghav ghom kat, ve nimam tapir ipapalot ghau.

⁹ Yes tau tizuari zi pa ravuuŋ ghau namaat na, tauzi pale timaat ve tizila nugh to mateegha.

¹⁰ Pale mbuzaagh ighan zi gha timatmaat, ve ŋgavuun sagsagŋa tighan patazi.