Mbouŋ to Yes Israela 62:1-8 in Mutu

¹ You lolog imbumbu maau. Ateg izi, ve nasaŋan Maaron pa iuul ghou. Pasa, you nawatag: Ye moghon to irau igham mulin ghou pa pataŋani tiou.

² Onoon kat, ye moghon, to Volaaŋa tiou ariaŋa. Ye iponpoon ghou inimale raŋ to izala kat, ve inim ruum ariaŋa pa nayooŋ ila lolo. Tovenen mbeb eta irau iwaghamun ghou maau.

³ Yam to aghaze awaghamun ghou ne, ŋeez o apul ŋgar tiam samia tonanan? Yam asob azuaria gham pa aghaze arab ghou pasa? Aghita. Tapirig isob wa. You nanimale sirsiir muŋgina to pughu imbuuz ve ighaze imatit.

⁴ You leg izag. Tauto ireu lolomim, ve azuaria gham aghaze atatan ghou nazi. Yam ndiran to kaarom kat! Agham kaarom, ghoro lolomim poia. Yam asavsaav ila avomim uli aghaze Maaron ighur poia toni iza tiou. Ve lolomim, aghaze Maaron iwaghamun ghou.

⁵ Eemoghon you lolog imbumbu maau. Ateg izi, ve nasaŋan Maaron pa iuul ghou. You naghur matag pani moghon.

⁶ Onoon kat, ye moghon, to Volaaŋa tiou. Ye iponpoon ghou pa koiagŋa inimale raŋ to izala kat, ve inim ruum ariaŋa pa nayooŋ ila lolo. Tovenen mbeb eta irau itok ghou ve natap ne maau.

⁷ You nanumeer Maaron naghaze pale igham mulin ghou pa pataŋani tiou, ve igham izag ivot inim tiina. Irau namatughez maau. Pasa, ye to inim inag to yoŋgaaŋ, ve iponpoon ghou inimale raŋ ariaŋa.

⁸ Yam tamtoghon to Maaron, anumeera irau sawa isob. Avotia lolomim pani, ve asavia pataŋani tiam tisob tila toni. Pasa, ye to inim inaad to yoŋgaaŋ.

¹ Mbouŋ to David Timbou mbouŋ tane itaghon ŋgar to Yedutun, i ŋeer tau imuŋmuuŋ pa mbouŋ Yau lolog bubu mako. Ateg izi, ve nasaŋan Maaron to iuul ghau. Pasaa, yau nawatagh: I mon ta irau igham mulin ghau pa pataŋani tsiau.

² Onoon kat, i mon ta Uleeŋa tsiau ariaaŋa. I iponpoon ghau imin maetaaz tau izala kat, ve imin ruum ariaaŋa to nayooŋ ila loolo. Tauvene gabua eta irau ivaghamun ghau mako.

³ Yam tau aghe avaghamun ghau ne, ŋeez o apul ŋgar tsiam saghati tana? Yam asov azuari gham pa ravuuŋ ghau pasaa? Aghita. Tapirig isov wa. Yau namin olol muŋgaana tau puughu imbuuz ve ighe imatit.

⁴ Yau leg ezag. Tauta ireu lolomim ve azuari gham aghe atatan ghau nazi. Yam zeran to karom kat! Agham karom, o lolomim poia. Yam asavsaav ila avomim uuli aghe Maaron ighur poia tooni izaa tsiau. Ve lolomim, aghe Maaron ivaghamun ghau.

⁵ Eemon yau lolog bubu mako. Ateg izi ve nasaŋan Maaron to iuul ghau. Yau naghurghur matag pani mon.

⁶ Onoon kat, i mon ta Uleeŋa tsiau. I iponpoon ghau pa koiagŋa imin maetaaz tau izala kat, ve imin ruum ariaaŋa to nayooŋ ila loolo. Tauvene gabua eta irau igham ghau narur ne mako.

⁷ Yau nanumeer Maaron naghe i pale igham mulin ghau pa pataŋani tsiau, ve igham ezag ivot imin tiina. Irau naroi mako. Pasaa, i ta imin niag to yoŋgaaŋ, ve iponpoon ghau imin maetaaz ariaaŋa.

⁸ Yam tamtamon to Maaron, anumeera irau saawe. Avotia lolomim pani, ve asavia pataŋani tsiam isov ila tooni. Pa i ta imin niaan to yoŋgaaŋ.