Mbouŋ to Yes Israela 57:5-11 in Mutu

⁵ Maaron, ugham mbeb eta ivot ila sambam samba inim ghilalooŋ pa tamtoghon. Leso tighita ve tighilaal ghom tighaze izam tiina kat. Ve upatooŋ tapirim ve poia tiom le irau taan isob paam!

⁶ Pataŋani tonene itatan ghou kat. Pasa, koiagŋa tiraar malum payou tighaze tisavag ghou. Ve titai saambu ila ataam tiou, leso natap nazila. Eemoghon maau. Taudi titap tizila.

⁷ Maaron, lolog ru payom maau. Lolog ineep tuŋia ilat tiom. Tovenen you pale nambou, ve narab gita pa napait ghom.

⁸ Lolog ighur naghaze ndugitun, ghoro namundig ve nagharaat taug, ve napambar ambam tiou, ve narab gita ila ila le ndag pusukia iza.

⁹ Tiina tiou, you pale napait ghom pa poia tiom ila tamtoghon to ndug ndug matadi. Pale yeiŋa tamtoghon to ndug tisob nilup ghei pa suŋuuŋ, ve nait mbouŋ pa napait ghom.

¹⁰ O Yoova, lolom ineep tuŋia ila to tamtoghon tiom ve uluul di. Ŋgar tiom tonanan, nene tiina le tiina kat. Izala izala le ikis sambam. Ve ŋgar to taghoniiŋ saveeŋ mbuaaŋ tiom tovene paam. Izala le ikis tata.

¹¹ Maaron, ugham mbeb eta ivot ila sambam paroŋania inim ghilalooŋ pa tamtoghon. Leso tighita, ve tipait izam izala le izala kat. Ve upatooŋ tapirim ve poia tiom irau taan isob!

⁵ Maaron, ugham ilaal eta ivot ila sambam saamba. Leso tamtamon tighita ve tighilaal ghom tighe yo ezam tiina kat. Ve utotoi tapirim ve poia tsio le irau taan isov paam!

⁶ Pataŋani tane itatan ghau kat. Pasaa, koiagŋa tiraar puugh payau tighe tisaghav ghau. Ve titai puura ila eez tsiau, leso natap nazila. Eemon mako. Tauzi titap tizila.

⁷ Maaron, lolog ruru payo mako. Lolog isaghav ghom ariaaŋ. Tauvene yau aat nambou ve narav gita to napakur ghom.

⁸ Lolog ighur naghe nughitun, o naburig, ve nagharaat taug, ve narav ambam tsiau ve gita ila ila le aaz pisikia izaa.

⁹ Tiina tsiau, yau aat napait ghom pa poia tsio ila tamtamon to nugh nugh matazi. Pale yeŋa tamtamon to nughmariŋ nilup ghei pa suŋuuŋ, ve nait mbouŋ to napait ghom.

¹⁰ O Yoova, yo lolom isaghav tamtamon tsio, ve uluul zi. Ŋgar tsio tana, ene tiina le tiina kat. Izala izala le ikis sambam. Ve ŋgar to taghoniiŋ saveeŋ mbuaaŋ tsio tauvene paam. Izala le ikis taitai.

¹¹ Maaron, ugham gabua eta ivot ila sambam saamba imin ilaal pa tamtamon. Leso tighita, ve tipait ezam izala le izala kat. Ve utotoi tapirim ve poia tsio irau taan isov!