Mbouŋ to Yes Israela 55:11-23 in Mutu

¹¹ Onoon kat, tamtoghon tiwaghamun nepooŋ to ndug le isami kat. Tamtoghon to sualen, ighaze tilup di izi maran pa tigharaat saveeŋ, ma tiraukol, nene moghon moghon titatan nditadi ve titombaan di, leso tiyub mbeb todi. Ŋgar todi tonowen, tipuli rita maau.

¹² Inimale koiag eta iveleg ghou, tone poia. Pataŋani tovene, you irau nambaada. Ve inimale tamtoghon ite paam to ighur koi payou ne, mata izi payou, tone poia. Pasa, tamtoghon tovene, you irau nayooŋ pani.

¹³ Eemoghon maau. Yom to muuŋ naghita ghom naghaze ituru ŋgar toit ee moghon. Ve naghaze pa yom ŋgeu tiou, ve itag ite kat.

¹⁴ Ve tinig imot ilat tiom, ve naghita ituru lupuuŋ toit poia. Ve muuŋ, itiŋa ival tiina taluplup ghiit pa suŋuuŋ ila Maaron rumai toni lolo. Eemoghon aazne, yom uzi ve unum koiag.

¹⁵ Maaron, koiagŋa lolodi ve ruum todi tivon pa ŋgar samsamia naol. Ukarmotin di pa mateeŋ, ghoro poia. Naghaze tineep matadi iyaryaar, ve tizila ndug to mateeŋa.

¹⁶ Tovenen you pale napoi Maaron pa iuul ghou. You nawatag: Yoova pale igham mulin ghou pa pataŋani tiou.

¹⁷ Sawa isob, you nataŋ rorani pa mboŋmaagh, ndag maatu, ve rabrab, ve navotia pataŋani tiou pani. Ve ye pale ilooŋ aliŋag, ve iuul ghou.

¹⁸ Onoon, koiagŋa katindi tilup di tighaze tigham malmal payou, ve titatan ghou. Eemoghon Maaron pale ipas ghou ila nimadi, ve naneep pooi.

¹⁹ Pale ilooŋ suŋuuŋ tiou, ve itatan di. Pasa, muuŋ kat ve inim, ye inepneep ila ina to ghamuuŋ pooz. Ve itortoor ŋgar toni maau. Tovenen yes to timatughez pani maau, ve ŋgar todi iyaryaaŋ tighaze tizoor aliŋa, ye pale itatan di.

²⁰ Itag ite to muuŋ yeru niluplup ghei, ighita saveeŋ mbuaaŋ toni inimale mbeb sorok. Tauto ireu saveeŋ toni, ve igham malmal pa ndita to muuŋ yesŋa lupuuŋ todi ee moghon.

²¹ Saveeŋ toni, nene poia ve ŋgoreeŋa kat. Eemoghon ila lolo, ye ighaze igham malmal. Talooŋ saveeŋ toni, ve taghaze pa ye ighaze igham lolood poia. Eemoghon maau. Saveeŋ to ivot ila avo, iŋgal tamtoghon inimale buza.

²² Sa mbeb ma pataŋani to ighaze ivot payom, ughuri ila Yoova nima. Ye pale ipariaaŋ ghom, ve ikis ghom uneep pooi. Pasa, mata iŋgalŋgal ndiran deŋiadi. Irau ipul di titap pa tovaaŋ eta ne maau.

²³ Eemoghon ndiran kaaromŋa ve yes to tirab tamtoghon timatmaat, Maaron, yom pale uŋgor sawa todi inim tuku, ve upiyaav di tizila ndug to mateeŋa. Ve you, ghoro nanumeer ghom naghaze pale uul ghou.

¹¹ Onoon kat, tamtamon tivaghamunia lepoogh to nugh le isaghat kat. Tamtamon to nugh tane, isaav ighe tilup zi izi maaran to tigharaat saveeŋ, ma tiraukol, ene monmon titatan zetazŋa ve titombaan zi, leso tium gabua toozi. Ŋgar toozi tawe, tipulpuli mako.

¹² Imin ta koiag eta ivelegh ghau, kanaŋ poia. Pataŋani tauvene, yau irau nabaado. Ve imin ta tamtamon ite paam tau ighur koi payau na, maata tatanin ghau, kanaŋ poia. Pasaa, tamtamon tauvene, yau irau nayooŋ pani.

¹³ Eemon mako. Ena yo ta muuŋ, naghit ghom naghe ituru ŋgar toit eemon. Ve naghe pa yo ŋeer tsiau, ve etag duduuŋ.

¹⁴ Ve tinig irav ilat tsio, ve naghita ituru lupuuŋ toit poia. Ve muuŋ, itiŋa eval tiina taluplup ghiit pa suŋuuŋ ila Maaron rumei tooni loolo. Eemon aazne, yo uzi gha umin koiag.

¹⁵ Maaron, koiagŋa lolozi ve ruum toozi, ene ivon pa ŋgar sasaghati naol. Upateeŋ zi pa mateegh, o poia. Naghe tileep matazi yaryaare ve tizila nugh to mateegha.

¹⁶ Tauvene yau aat napoi Maaron to iuul ghau. Yau nawatagh: Yoova pale igham mulin ghau pa pataŋani tsiau.

¹⁷ Saawe isov, yau nataŋ raraini pa mboŋoozo, zegmatuugh, ve ravrav, ve navotia pataŋani tsiau pani. Ve i pale ilooŋ aliŋag, ve iuul ghau.

¹⁸ Onoon, koiagŋa katini tilup zi tighe tigham malmal payau, ve titatan ghau. Eemon Maaron pale ipas ghau ila nimazi, ve naleep poi.

¹⁹ I pale ilooŋ suŋuuŋ tsiau, ve itatan zi. Pasaa, muuŋ geeg ve ilam, i ilepleep ila niia to ghamuuŋ pooz. Ve itortoor ŋgar tooni mako. Tauvene yes tau tiroi pani mako, ve ŋgar toozi iyaryaaŋ tighe tizoor i aliiŋa na, i pale itatan zi.

²⁰ Etag tau muuŋ yeiru niluplup ghei na, ighita saveeŋ mbuaaŋ tooni imin kaut sorok. Tauta ireu saveeŋ tooni, ve igham malmal pa zeetŋa tau muuŋ yesŋa lupuuŋ toozi eemon na.

²¹ Saveeŋ tooni, ene poia ve ŋgoreeŋa kat. Eemon ila loolo, i ighe igham malmal. Talooŋ saveeŋ tooni tawe, ve taghe pa i ighe igham loloon poia. Eemon mako. Saveeŋ tau ivot ila aavo na, iŋgal tamtamon imin mbuzaagh.

²² Saa gabua ma pataŋani tau ighe ivot payo na, ughur zi tila Yoova niima. I pale ipariaaŋ ghom, ve ikis ghom uleep poi. Pasaa, i maata iŋgalŋgal zeran duduŋazi. Irau ipul zi titap pa tovaaŋ eta ne mako.

²³ Eemon zeran karomŋa, ve yes tau tiliŋliŋ siŋ pa tamtamon na, Maaron, yo pale urav motin saawe toozi tuuku, ve usik zi tizila nugh to mateegha. Ve yau, o nanumeer ghom naghe pale uul ghau.