Mbouŋ to Yes Israela 50:4-18 in Mutu

⁴ Ye ipoi sambam ve taan tinim, leso tighita iŋgabiiz tamtoghon toni ve ighur atia padi.

⁵ Ve isaav ighaze: “Tamtoghon tiou to lolodi ineep tiou ve titaghon ŋgar tiou, ayou di tisob tinim tilup di ila naghog. Nene yes to tigham watooŋrau payom, ve timbua saveeŋ toman ghou tighaze yeiŋa nilup ghei ninim ee moghon.”

⁶ Maaron iŋgagabiiz tamtoghon ve ighurghur atia padi. Ve mbeb to sambam paroŋania tipatooŋa tighaze gabizooŋ toni, nene deŋia moghon.

⁷ “Yam tamtoghon tiou Israel, alooŋ saveeŋ to naghaze nasavia payam. Pasa, you to Maaron tiam. Aazne, you pale nasaav ila matamim, ve navotia sosor tiam.

⁸ Watooŋrau to aghamgham di payou ne, you nayaan gham padi maau. Moghon moghon naghita gham aghurghur watooŋrau tizala artaal, leso yab ighan suvun di. Nene poia.

⁹ Eemoghon you irau nagham makau, ma mekmek to tineep ila sirsiir tiam lolo ne maau.

¹⁰ Pasa, you nambool pa mbeb eta maau. Mbeb tisob to tilaghlaagh ila su lolo, ve makau to tineep irau lolooz to naol ne, nene tiou moghon.

¹¹ Ve man to tirovroov ila tata paroŋania, you nawatag di tisob ve naŋgin di. Ve mbeb tisob to tilaghlaagh ila reg lolo ne paam, nene tiou.

¹² Ighaze pitool ghou, irau nasaav payam maau. Pasa, taan toman mbeb tisob to tineep ila, nene tiou moghon.

¹³ Vena, yam aghaze you naghanghan makau minda, ma naghunghun mekmek siŋi? Maau.

¹⁴ Watooŋrau to lolog pani, nene vene: Lolomim poia payou, ve apait ghou pa poia tiou. Ve saveeŋ to ambua toman Maaron tiam to ineep sala le sala kat ne, agham uraata le anoŋa ivot.

¹⁵ Ve ighaze pataŋani igham gham, ghoro ataŋ roran ghou pa ulaaŋ. Leso nagham mulin gham, ve apait izag pa tapirig ve poia tiou.”

¹⁶ Eemoghon ndiran samsamia, Maaron isaav padi ighaze: “Tutuuŋ tiou to naghur di pataghaaŋ, yam awatwaat di sorok pasa? Ve pughu vena to asasavia saveeŋ to nambua toman tamtoghon tiou?”

¹⁷ Pasa, sawa to you napasaluŋgan gham, yam ayasiil pa aliŋag. Ve azorzoor saveeŋ tiou, ve avelegi inimale mbeb sorok.

¹⁸ Ighaze aghita yubyub eta, yam lolomim poia pani, ve aghami inim itamim. Ve yes to tighurghur maat, yam ala toman di ve yamŋa alaghlaagh.

⁴ I ipoi sambam ve taan ighe tilam, leso tighita igabiiz tamtamon tooni ve ighur atuya pazi.

⁵ Ve isaav ighe: “Tamtamon tsiau tau lolozi isaghav ghau ve titaghon ŋgar tsiau na, ayau zi tisov tilam tilup zi ila naghog. Ene yes tau tigham watooŋrau payo, ve timbu saveeŋ tomani ghau tighe yeŋa nivalupu ghei nimin eemon.”

⁶ Maaron igagabiiz tamtamon ve ighurghur atuya pazi. Ve gabua to sambam saamba tipaghazoŋaini tighe gabizooŋ tooni, ene iduduuŋ mon.

⁷ “Yam tamtamon tsiau Israel, alooŋ saveeŋ tau naghe nasavia payam. Pasaa, yau ta Maaron tsiam. Aazne, yau aat nasaav ila matamim, ve navotia sosor tsiam.

⁸ Watooŋrau tau aghamgham zi payau ne, yau nayaon gham pani mako. Monmon naghit gham aghurghur watooŋrau izala artaal, leso yav ighan dodolin zi. Ene poia.

⁹ Eemon yau irau nagham makau, ma mekmek tau tileep ila olol tsiam loolo ne mako.

¹⁰ Pasaa, yau nambool pa gabua eta mako. Gabua naol isov tau tilaghlaagh ila su loolo, ve makau tau tileep irau loloz ta naol ne, ene tsiau mon.

¹¹ Ve man tau tirovroov ila taitai saamba na, yau nawatagh zi tisov ve naŋgin zi. Ve gabua naol isov tau tilaghlaagh ila regh loolo na paam, ene yau tsiau.

¹² Isaav ighe pitool ghau, ene irau nasaav payam mako. Pasaa, taan tomania gabua naol isov tau tileep ve tigheen ila na, ene yau tsiau mon.

¹³ Mindai, yam aghe yau naghanghan makau miiza, ma naghunghun mekmek siiŋi? Mako.

¹⁴ Watooŋrau tau yau lolog pani, ene tauvene: Lolomim poia payau, ve apait ghau pa poia tsiau. Ve saveeŋ tau ambua tomania Maaron tsiam tau ileep saaŋa le saaŋa kat na, agham uratoini le anooŋa ivot.

¹⁵ Ve isaav ighe pataŋani igham gham, na ataŋ rarai ghau pa uleeŋ. Leso nagham mulin gham, ve apait ezag pa tapirig ve poia tsiau.”

¹⁶ Eemon yes zeran sasaghati, Maaron isaav pazi ighe: “Tutuuŋ tsiau tau naghur zi pataghaaŋ na, yam awatwaat zi sorok pasaa? Ve puughu mindai ta asasavia saveeŋ tau nambua tomania tamtamon tsiau ne?”

¹⁷ Pa saawe tau yau napaduduuŋ gham, yam ambuzir pa aliŋag. Ve azorzoor saveeŋ tsiau ve aveleghi imin kaut sorok.

¹⁸ Isaav ighe aghita umbuuŋa eta, na yam lolomim poia pani, ve aghamu imin etamim. Ve yes tau tighurghur boog na, yam apaak zi ve yamŋa alaghlaagh.