Mbouŋ to Yes Israela 45:2-13 in Mutu

² O kinik, yom paghunam kat ulib pa tamtoghon tisob. Ve saveeŋ popoia to ivotvot ila avom, nene igham poian tamtoghon. Tovenen poia to Maaron pale ineep toman ghom irau sawa isob.

³ Yom ariaŋam, ve uraua kat pa ghamuuŋ malmal. Izam tiina, ve upambood taum le paghunam kat. Ugham buza tiom, ve ugharaat ghom pa malmal.

⁴ Yom izam tiina kat. Uza hos tiom, ve ula uparab toman koiamŋa le ulib padi. Uparab ariaŋa pa saveeŋ onoon, ŋgar to tatatan tauud, ve ŋgar deŋia. Nimam waan pale igham uraat tintina. Leso koiamŋa tighita ve timatughez.

⁵ Kinik tiei, pane tiom ndinatu matadi kat. Tauto tiŋgal koiamŋa le tiyamaan katin di. Tovenen yes ndug ndug pale tinim ve titaptap tizi ila aghem samba.

⁶ Maaron, pooz tiom irau isob ne maau. Pale uneep ila inam to ghamuuŋ pooz itaghoni taghoni gha ila. Ŋgar deŋia to ughamgham pa tamtoghon, nene inim ghilalooŋ pa pooz tiom.

⁷ Pasa, yom lolom pa ŋgar deŋia, ve ughurghur koi pa ŋgar samia. Tovenen Maaron tiom ipakur ghom le ulib pa nditam pida, ve iliŋ ŋgoreeŋ izala poghom pa ighur ghom unum kinik. Tauto igham ghom lolom poia le poia kat.

⁸ Nonogiiŋa tiom, tighur naunauŋ vuzi popoia naol ila. Ruum tiom, tipambooda pa mbeb popoia to tigharaat di pa mbeb ndoŋadi. Yes to rabuuŋ gita ve mbeb pida to aliŋadi popoia ne, tineep toman ghom ila ruum tiom lolo, ve mbouŋ todi igham ghom lolom poia kat.

⁹ Ndiliva to ledi izadi tinim tineep toman ghom ila ruum tiom paam. Ve todi pida, nene kinik ndinatudi liva. Liva paghu to iyoon ila pa nimam waan ve ughaze uvaii, ye garawaat tidi. Ye itiktiik tau pa mbeb popoia le paghuna kat. Mbeb tonowen, tigharaat di pa gol poia kat to inim pa taan suruvu to Opir.

¹⁰ Natug liva, yom ughaze uvai kinik. Tovenen ughur poian taliŋam, ve ulooŋ aliŋag tonene. Ugham ŋgar pa tamtoghon tiom ve siŋ tiom muul malep.

¹¹ Yom paghunam kat. Pale usad kinik ate. Ye to inim tiina tiom. Tovenen yom irau ulooŋ aliŋa, ve uneep ila samba.

¹² Tamtoghon to ndug Tiro pale tigham lem mbeb popoia katindi. Yes to mbaliiŋ taudi kat, pale tigham lem mbeb popoia naol. Leso matam iŋgal di ve lolom poia padi.

¹³ Garawaat tidi to ighaze ivai kinik, ineep ila ruum toni lolo. Ye paghuna le paghuna kat. Nonogiiŋa toni, tisaii pa teret to tigharaata pa gol.

² O kinik, yo paghunam kat uliiv tamtamon tisov. Ve saveeŋ popoia tau ivotvot ila avom, ene igham poghania tamtamon. Tauvene poia to Maaron aat igheen tomani ghom irau saawe.

³ Yo ariaŋam ve urau kat pa ghamuuŋ malmal. Ezam tiina, ve upabood taum le paghunam kat. Ugham mbuzaagh tsio, ve ugharaat ghom pa malmal.

⁴ Yo ezam tiina kat. Uzaa hos tsio, ve ula uparav tomania koiamŋa le uliiv zi. Uparav ariaaŋ pa saveeŋ onoon, ŋgar to tatatan tauun, ve ŋgar duduuŋa. Nimam tapir pale igham uraat tintiina. Leso koiamŋa tighita ve tiroi.

⁵ Kinik tsiei, paneegh tsio natŋa matazi kat. Tauta tiŋgal koiamŋa le tiyamaan katini. Tauvene yes nugh nugh pale tilam ve titaptap izi aghem saamba.

⁶ Maaron, pooz tsio irau isov ne mako. Pale uleep ila niam to ghamuuŋ pooz irau saawe. Ŋgar duduuŋa tau ughamgham pa tamtamon na, ene imin ilaal pa pooz tsio.

⁷ Pasaa, yo lolom pa ŋgar duduuŋa, ve ughurghur koi pa ŋgar saghati. Tauvene Maaron tsio ipakur ghom le uliiv zetamŋa siriv, ve iliŋ ŋgoreeŋ izala pavom to ighur ghom umin kinik. Tauta igham ghom lolom poia le poia kat.

⁸ Nonoghiiŋa tsio mamalaua, ene tighur naunauŋ vaazi popoia maata maata ila. Ruum tsio, tipaboode pa gabua popoia tau tigharaat zi pa gabua zoŋazi. Yes to ravuuŋ gita ve gabua siriv tau lutuzi popoia na, tileep tomani ghom ila ruum tsio loolo, ve mbouŋ toozi igham ghom lolom poia kat.

⁹ Zilivaa tau lezi ezazi na tilam tileep tomani ghom ila ruum tsio paam. Ve toozi siriv, ene kinik natuzlivaŋa. Livaa paaghu tau iyooz ila pa nimam tapir ve ughe uvaii, i garwaat. I itiik tauu pa gabua popoia le paghuuna kat. Gabua tawe, tigharaat zi pa gol poia kat tau ilam pa taan sirivu to Opir na.

¹⁰ Natugliva, yo ughe uvai kinik. Tauvene ughur taliŋam poi ve ulooŋ aliŋag tane. Ugham ŋgar pa tamtamon tsio ve ziiri waaro tsio muul sov.

¹¹ Yo paghunam kat. Pale usan kinik aate. I ta imin tiina tsio. Tauvene yo aat ulooŋ aliiŋa ve uleep ila i saamba.

¹² Tamtamon to nugh Tiro pale tigham lem gabua popoia katini. Yes tau kuaz tauŋa kat na, pale tigham lem gabua popoia maata maata. Leso matam iŋgal zi ve lolom poia pazi.

¹³ Livaa garwaat tau ighe ivai kinik na, ileep ila ruum tooni loolo. I paghuuna le paghuuna kat. Nonoghiiŋa tooni, ene tisaii pa teret tau tigharaata pa gol.