Mbouŋ to Yes Israela 44:1-19 in Mutu

¹ Maaron, muuŋ sawa to nditimbumai, yom ughamgham uraat tintina padi. Tauto tighamgham kamos pani inim inim, le aazne yei nilooŋa pa taumai taliŋamai paam.

² Yes ndug ndug to muuŋ tineep izi taan tonene, ila taum tapirim, yom undiir di tighau tila, ve ugham nditimbumai tinim tineep izi taan tonene, ve inim ledi kat. Yom utatan yes Kanaana le tapiridi isob kat, ve ugham nditimbumai tineep pooi izi taan tonene.

³ Onoon, nditimbumai tigham malmal pa taan tonene. Eemoghon taudi tapiridi ve buza todi igham di tilib pa koiadi ne maau. Yom uneep toman di ve matam padi, ve upatooŋ tapirim pa koiadi ve uparab toman di. Tauto nditimbumai tilib padi, ve tigham taan todi inim ledi. Pasa, yom lolom padi kat.

⁴ Yoova, yom kinik tiou, ve Maaron tiou. Yom usaav ariaŋa ughaze yei Israela to siŋ to Yakop pale nilib pa koiamai.

⁵ Ila taum tapirim, yei nitatan koiamai. Yei nighur ilat tiom, ve suŋuuŋ tiei iŋarua ghom. Tauto uul ghei ve nirab di, ve nivazag di ila aghemai samba.

⁶ You nanumeer pane tiou maau. Ve buza tiou paam, nene irau igham mulin ghou maau.

⁷ Yom moghon to uluul ghei, ve ughamgham mulin ghei ila koiamai nimadi. Yom ugham di tiwaghamgham, ve mayadi a tighau tila.

⁸ Maaron, yom uluul ghei, tauto moghon moghon nipapait ghom, ve lolomai poia payom. Yei pale nipait izam itaghoni taghoni gha ila.

⁹ Eemoghon aazne, yom upul murim payei, ve unum toman ndaaba tiei muul maau. Ve upul koiamai tilib payei le mayamai kat.

¹⁰ Yom ugham ghei tapirimai maau. Tauto nipul malmal ve niwaghaughau, ve koiamai tiyou mbeb tiei tisob.

¹¹ Yom ughur ghei nila nimadi ninimale sipsip to timbit di leso tirab di. Ve ureu ghei nimbiriis irau ndug ndug.

¹² Yei tamtoghon tiom. Eemoghon aazne, ugholia ghei nila koiamai nimadi, ve ninim mbesooŋa padi. Ve ugham mbeb tiina eta ila nimadi maau. Yom ughur atiamai izi kat, inimale yei mbeb sorok.

¹³ Yes to tineep tigharau ghei, tighita ŋgar to ugham payei, le tiŋiŋ ve tigham ŋalalaŋ payei.

¹⁴ Yes ndug ndug to tiwatag ghom maau ne, tighita ghei ninimale mogheraaŋ. Ve tiŋiŋiŋ payei, ve tililiit dabadi.

¹⁵ Ndag to naol, mboŋmaagh ila le rabrab izi, tamtoghon tipamayaŋin ghou. Tovenen matag iza maau. Mayag ve natudtud moghon.

¹⁶ Pasa, tamtoghon tighita ŋgar to koiagŋa tiyati payou, ve tipipiyaav saveeŋ velegiiŋ ve saveeŋ mayaŋiiŋa naol payou.

¹⁷ You nagham ŋgar naol naghaze pughu vena to yom upul pataŋani naol tonene tivot payei? Pasa, yei lolomai imaagh payom maau. Ve saveeŋ to nimbua toman ghom, yei nireua maau.

¹⁸ Yei nipul murimai payom maau. Ve laghooŋ tiei, niyel pa ataam tiom maau.

¹⁹ Eemoghon yom uwaghamun ghei kat le ndug tiei ŋginiŋa inimale mbeb sagsagŋa inadi to nepooŋ. Nepooŋ tiei, nene inimale ndoroom tiina ikau ghei.

¹ Mbouŋ to yes Kora Maaron, muuŋ saawe to timbumaiŋa, yo ughamgham uraat tintiina pazi. Tauta tisisinaia ilam ilam le aazne, yei nilooŋa pa taumai taliŋamai paam.

² Yes nugh nugh tau muuŋ tileep izi taan tane, ila taum tapirim, yo uziir zi tighau tila, ve upalepoghai timbumaiŋa tileep izi taan tane gha imin lezi motot. Yo utatan yes Kanaana le tapirizi isov kat, ve ugham timbumaiŋa tileep poia izi taan tane.

³ Onoon, timbumaiŋa tigham malmal pa taan tane. Eemon tauzi tapirizi ve mbuzaagh toozi igham zi tiliiv koiazŋa ne mako. Yo uleep tomani zi ve matam pazi, ve utotoi tapirim pa koiazŋa ve uparav tomani zi. Tauta timbumaiŋa tiliiv zi, ve tigham taan toozi imin lezi. Pasaa, yo lolom pazi kat.

⁴ Yoova, yo kinik tsiau ve Maaron tsiau. Yo usaav ariaaŋ ughe yei Israela tau siŋ to Yakop pale niliiv koiamaiŋa.

⁵ Ila yo tapirim, yei nitatan koiamaiŋa. Yei nighur ilat tsio, ve suŋuuŋ tsiei iŋaŋarui ghom. Tauta yo uul ghei, ve nirav zi ve nivaghaaz zi ila aghemai saamba.

⁶ Yau nanumeer paneegh tsiau mako. Ve mbuzaagh tsiau paam, ene irau igham mulin ghau mako.

⁷ Yo mon ta uluul ghei, ve ughamgham mulin ghei ila koiamaiŋa nimazi. Yo ugham zi tivaghamgham, ve tighau tila toman mayazi.

⁸ Maaron, yo uluul ghei, tauta monmon nipapakur ghom, ve lolomai poia payo. Yei aat nipait ezam taghon taghon gha ila.

⁹ Eemon aazne, yo ughur murim payei, ve upaak zaaba tsiei muul mako. Ve upul koiamaiŋa tiliiv ghei le mayamai kat.

¹⁰ Yo ugham ghei tapirimai imbool. Tauta nipul malmal ve nighawaar, ve koiamaiŋa tiyauur gabua tsiei isov.

¹¹ Yo ughur ghei nila nimazi, imin sipsip tau timbit zi pa ravuuŋ zi. Ve ureu ghei nimbiriis irau nugh nugh.

¹² Yei tamtamon tsio. Eemon aazne, ugholia ghei nila koiamaiŋa nimazi gha nimin besooŋa pazi. Ve ugham gabua tiina eta ila nimazi mako. Yo ughur atuyamai izi geeg, imin yei kaut sorok.

¹³ Yes tau tileep tigharau ghei na, tighita ŋgar tau yo ugham payei, le tiŋiŋ ve tigham ŋalalaŋ payei.

¹⁴ Yes nugh nugh tau tiwatagh ghom mako na, tighit ghei nimin mogheraaŋ. Ve tiŋiŋiŋ payei, ve tililiit dabazi.

¹⁵ Saawe isov, mboŋoozo ila le ravrav izi, tamtamon tipapamayaŋin ghau. Tauvene matag izaa mako. Mayag, ve natudtud mon.

¹⁶ Pasaa, tamtamon tighita ŋgar tau koiagŋa tiyoli payau na, ve tisiksik saveeŋ veleghiiŋ ve saveeŋ mayaŋa naol payau.

¹⁷ Yau nagham ŋgar naol naghe puughu mindai ta yo upul pataŋani naol tane ivot payei? Pasaa, yei lolomai iveghai ghom mako. Ve saveeŋ tau nimbua tomani ghom na, yei nireua mako.

¹⁸ Yei nighur murimai payo mako. Ve laghooŋ tsiei, nisosor pa eez tsio mako.

¹⁹ Eemon yo uvaghamun ghei kat, le nugh tsiei ŋginaaŋa imin gabua sagsagŋa niazi to lepoogh. Lepoogh tsiei, ene imin ndoroom tiina ikau ghei.