Mbouŋ to Yes Israela 41:2-13 in Mutu

² Yoova tau pale inim sigeu pani ve iŋgini. Leso imaat sob, ve ineep pooi. Pale ineep izi taan to Yoova igham pa tamtoghon toni, ve poia to Yoova izaza toni. Yoova irau ipuli ila koia nimadi ne maau.

³ Ve ighaze ye imorooŋ ve ighengheen, nene pale Yoova tau iŋgini, ve ipasob moroghooŋ toni.

⁴ You nasaav naghaze: “Yoova, you nagham sosor payom wa. Lolom isamin ghou ve upasob moroghooŋ tiou. Pasa, you mbesooŋa tiom.”

⁵ Koiagŋa tisasavia saveeŋ samsamia iŋarua ghou tighaze: “Ŋgeu tonowen, ŋeez o imaat? Leso iza isob, ve lolood imaagh pani?”

⁶ Ve sawa to tamtoghon tinim tiŋgig ghou, tisavia saveeŋ toman lolodi maau. Yes tinim pa tiŋgig ghou pa moroghooŋ tiou moghon. Ve sawa to timuul tila, tisasavia varug sorok irau ndug tighaze: “Paam imaat.”

⁷ Yes to tighur koi payou ne, tisob tighaze le nasami kat. Tovenen tikakamuun payou tighaze:

⁸ “Aa, ŋgeu tonowen, moroghooŋ samia kat ighami. Irau mata pakia ve imundig muul ne maau. Paam imaat.”

⁹ Ve itag ite to nanumeera kat naghaze yeru lupuuŋ tiei ee moghon, ve niluplup ghei pa ghanghaniiŋ, ye paam ipul muri payou, ve inim koiag.

¹⁰ Yoova, lolom isamin ghou ve uul ghou. Pasa, you mbesooŋa tiom. Upasob moroghooŋ tiou, ve ugham tinig poia muul. Leso nayat ŋgar samia to koiagŋa tigham payou.

¹¹ Yoova, aazne you nawatag naghaze yom lolom poia payou. Pasa, koiagŋa titatan ghou maau. Tovenen irau aliŋadi iza sorok tighaze yes tilib payou ne maau.

¹² You nataghon ŋgar deŋia moghon. Tauto upalot ghou ve nayoon ariaŋa. Ve yom pale ugham ghou naneep toman ghom itaghoni taghoni gha ila.

¹³ Tapait Yoova pa poia toni! Ye Maaron to iit Israela. Tapait iza to aazne, ve itaghoni taghoni gha ila. Onoon le onoon kat.

² Yoova tauu pale imin sigheu pani ve iŋgini. Leso imaat sov, ve ileep poia. I pale ileep izi taan tau Yoova igham pa tamtamon tooni na, ve poia to Yoova izazaa tooni. Yoova irau ipuli ila koiŋa nimazi mako.

³ Ve isaav ighe i imorooŋ ve ighengheen, ene pale Yoova tauu iŋgini, ve ipasov moroghooŋ tooni.

⁴ Yau nasaav naghe: “Yoova, yau nagham sosor payo wa. Lolom isaghatin ghau ve upasov moroghooŋ tsiau. Pa yau besooŋa tsio.”

⁵ Koiagŋa tisasavia saveeŋ sasaghati iŋarui ghau tighe: “Ŋeer tawe, ŋeez o imaat leso eeza ilale ve loloon iveegh pani?”

⁶ Ve saawe tau tamtamon tilam tigig ghau, tisavia saveeŋ toman lolozi mako. Yes tilam to tigig ghau pa moroghooŋ tsiau mon. Ve saawe tau timuul tila, tisasavia varug sorok irau nugh tighe: “Paita imaat.”

⁷ Yes tau tighur koi payau ne, tisov tighe le nasaghat kat. Tauvene tikakamuun payau tighe:

⁸ “Aa, ŋeer tawe, moroghooŋ saghati kat ighamu. Irau maata pakia ve iburig muul ne mako. Paita imaat.”

⁹ Ve etag ite tau nanumeera kat naghe yeiru lupuuŋ tsiei eemon, ve niluplup ghei pa ghanghaniiŋ na, i paam ighur muuri payau, ve imin koiag.

¹⁰ Yoova, lolom isaghatin ghau ve uul ghau. Pa yau besooŋa tsio. Upasov moroghooŋ tsiau ve ugham tinig poia muul. Leso nayat ŋgar saghati tau koiagŋa tigham payau ne.

¹¹ Yoova, aazne yau nawatagh naghe yo lolom poia payau. Pasaa, koiagŋa titatan ghau mako. Tauvene irau aliŋazi izaa sorok tighe yes tiliiv ghau ne mako.

¹² Yau nataghon ŋgar duduuŋa mon. Tauta yo upalot ghau ve nayooz ariaaŋ. Ve yo pale ugham ghau naleep tomani ghom taghon taghon gha ila.

¹³ Tapait Yoova pa poia tooni! I Maaron to iit Israela. Tapait eeza ta aazne, ve taghon taghon gha ila. Onoon le onoon kat.