Mbouŋ to Yes Israela 40:3-13 in Mutu

³ Ve ipamundigin ghou ve nambou mbouŋ paghu. Nene mbouŋ to tapait Maaron toit iza. Ŋgar to Yoova igham payou, pale igham ival tiina tighilaal. Tovenen yes pale timatughez, ve tighur ila toni.

⁴ Tamtoghon to ighaze inumeer Yoova, nene pale tini iza, ve poia to Yoova iza toni. Tamtoghon tovene, ye ilup toman yes to tipait taudi izadi ne maau. Ve yes to tipul ataam to Maaron, ve timbesmbees pa maaron kaaromŋa, ye ineep saguan padi.

⁵ Yoova, yom Maaron tiou. Eta irau ghom maau. Pasa, yom ughamgham uraat gharatooŋadi naol pa uul ghei. Uraat tonanan, ite kat. Ve lolom ighur pa ŋgar popoia naol to ughaze ugham payei. Ighaze natoova pa nanin di tisob ve nasavia di, nene pale naraua maau.

⁶ Ŋgar to rabuuŋ mbeb inim watooŋrau payom, toman ŋgar to nigham aniiŋ payom pa nipait ghom, nene yom lolom pani maau. Ve ŋgar to ghuruuŋ mbeb izala artaal leso yab ighan suvuni, toman ŋgar to rabuuŋ mbeb pa rewaaŋ sosor to tamtoghon, nene paam, yom ughur matam pani maau. Yom ukaak taliŋag, leso nataghon aliŋam.

⁷ Tauto nasaav payom naghaze: “Maaron, taug nene. Nataghon saveeŋ to timbooda iŋarua ghou ila rau tiom, tauto nanim.”

⁸ Maaron tiou, ighaze nataghon katin lolom, nene igham lolog poia kat. Pasa, tutuuŋ to yom ugham payei, nene ineep ariaŋa ila lolog.

⁹ Yoova, yom uwatag: Ulaaŋ to ugham payei, you neneeŋag pani maau. Sawa to ival tiina tilup di pa suŋuuŋ, you nasasavia varum padi.

¹⁰ Onoon kat, ulaaŋ ve ŋgar deŋia to upatooŋa payou, you naŋgooza ineep to taug moghon maau. Ve gabuam to lolom ineep tuŋia ila to tamtoghon tiom ve uluul di, nene paam, naŋgooza pa tamtoghon tiom maau. Sawa to tilup di pa suŋuuŋ, you nasasavia gabuam tonenen padi. Ŋgar tiom to uluul tamtoghon itaghon saveeŋ mbuaaŋ tiom, nene navovotia padi.

¹¹ Yoova, matam kisin sosor tiou malep. Lolom isamin ghou ve upul sosor tiou. Ŋgar tiom to lolom ineep tuŋia ila to tamtoghon tiom, ve utataghon saveeŋ mbuaaŋ tiom, nene pale inim sigeu payou.

¹² Ughita. Aazne, pataŋani naol tiluvut ghou. Irau nanin di maau. Ŋgar tiou samsamia atia, tauto iŋarua ghou. Tovenen naghita naghaze leg ataam eta muul maau. Sosor tiou, katindi kat. Tilib pa dabag raua. Tovenen namatughez, ve tapirig isob kat.

¹³ O Yoova, lolom isamin ghou, ve ugham mulin ghou pa pataŋani tonene! Unum rikia moghon ve uul ghou!

³ Ve ipaburigin ghau ve nambou mbouŋ paaghu. Ene mbouŋ to tapait Maaron toit eeza. Ŋgar tau Yoova igham payau na, pale igham eval tiina tighilaal. Tauvene yes pale tiroi, ve tighur ila tooni.

⁴ Tamtamon tau ighe inumeer Yoova, ene pale tintini ve poia to Yoova izazaa tooni. Tamtamon tauvene, i ipaak yes tau tipapait tauzi ezazi ne mako. Ve yes tau tipul eez to Maaron, ve tibesbees pa maaron karomŋa na, i ileep soghan pazi.

⁵ Yoova, yo Maaron tsiau. Eta irau ghom mako. Pasaa, yo ughamgham uraat ŋgeretazi naol to uul ghei. Uraat tana, maata ite kat. Ve lolom ighur pa ŋgar popoia naol tau ughe ugham payei. Isaav ighe natoova to nanin zi tisov ve nasavi zi, ene aat narao mako.

⁶ Ŋgar to ravuuŋ gabua imin watooŋrau payo, tomania ŋgar to ghamuuŋ aniiŋ payo imin paitooŋ, ene yo lolom pani mako. Ve ŋgar to ghuruuŋ gabua izala artaal leso yav ighan dodolini, tomania ŋgar to ravuuŋ gabua pa rewaaŋ sosor to tamtamon, ene paam, yo ughur matam pani mako. Yo ugham taliŋag ikaak, leso nalooŋ aliŋam.

⁷ Tauta nasaav payo naghe: “Maaron, yau taug ene. Nataghon saveeŋ tau tiboode iŋarui ghau ila rau tsio, tauta nalam.”

⁸ Maaron tsiau, isaav ighe nataghon duduŋai yo lolom, ene igham ghau lolog poia le poia kat. Pasaa, tutuuŋ tau yo ugham payei na, igheen ariaaŋ ila lolog.

⁹ Yoova, yo uwatagh: Uleeŋ ve ŋgar tsio duduuŋa, yau naneneeŋ pani mako. Saawe tau eval tiina tilup zi pa suŋuuŋ, nasasavia varum pazi.

¹⁰ Onoon kat, uleeŋ ve ŋgar duduuŋa tau utotoia payau na, yau naŋgooza igheen to taug mon mako. Ve gabuam tau lolom isaghav tamtamon tsio ariaaŋ ve uluul zi, ene paam, naŋgooza pa tamtamon tsio mako. Saawe tau tilup zi pa suŋuuŋ, yau nasasavia gabuam tana pazi. Ŋgar tsio tau uluul tamtamon itaghon saveeŋ mbuaaŋ tsio, ene navovotia pazi.

¹¹ Yoova, matam kisin sosor tsiau sov. Lolom isaghatin ghau ve upul sosor tsiau. Ŋgar tsio tau lolom isaghav tamtamon tsio ariaaŋ ve utataghon saveeŋ mbuaaŋ tsio, ene aat imin sigheu payau.

¹² Ughita. Aazne, pataŋani naol tilivutin ghau. Irau nanin zi mako. Ŋgar tsiau sasaghati atuya, tauta iŋarui ghau ne. Tauvene naghita naghe leg eez eta muul mako. Sosor tsiau, katini kat. Iliiv dabag rau. Tauvene naroi ve tapirig isov kat.

¹³ O Yoova, lolom isaghatin ghau ve ugham mulin ghau pa pataŋani tane! Ulam rekia mon ve uul ghau!