Mbouŋ to Yes Israela 38:3-14 in Mutu

³ Atem yabyab payou kat. Tauto tinig isob isami wa. Anoŋag, babaŋa eta ineep pooi maau. Sosor tiou, tauto tuag tisob tiyabyab ve nasami.

⁴ Pataŋani to sosor tiou itatan ghou kat inimale dibom tintina tipolpol izala poghog. Tauto igham pataŋani tiina payou le irau nambaada maau.

⁵ You nagham ŋgar to yes borouŋa ve nazoor aliŋam. Tauto aazne, mbotmboot toman nanag to vuzi samia ne igham ghou.

⁶ Yabyabuuŋ tiina igham ghou, ve natudtud ve nayakyak. Tovenen mboŋmaagh ila le rabrab izi, lolog ipataŋan ve nataŋtaŋ.

⁷ Tinig ituntun kat, ve anoŋag isob isami wa. Anoŋag, babaŋa eta ineep pooi maau.

⁸ Moroghooŋ tonene igham katin ghou le tapirig isob kat. Tovenen lolog ipataŋan ve nayakyak.

⁹ Yoova, yom uwatag: You naghaze uul ghou leso tinig poia. You lolog ipataŋan ve nataŋtaŋ. Mbeb tonene iyooŋ payom maau.

¹⁰ Aazne, ateg imbumbu ve tapirig isob. Tovenen naghog poia muul maau.

¹¹ Nditag ve yes to ruum todi tigharau ghou ne, tighita moroghooŋ tiou tonene, le tineep saguan payou. Tigharau ghou muul maau. Ve siŋ tiou tovene paam. Tinim tiŋgig ghou rita maau.

¹² Koiagŋa to tizuaria di tighaze tirab ghou namaat, tighur liis katindi payou. Mboŋmaagh ila le rabrab izi, yes tisavsaav pa ataam to tiwaghamun ghou. Lolodi ighurghur pa ataam yoŋgaaŋ pa tiwaghamun ghou.

¹³ Eemoghon matag ila pa saveeŋ todi tonowen maau. Neneeŋag moghon nanimale tamtoghon to avo maau ve taliŋa ipam, ve irau isavsaav maau, ve ilooŋ saveeŋ maau.

¹⁴ Onoon kat, you nanimale tamtoghon to taliŋa ipam ve ilooŋ saveeŋ maau, ve irau ipamuul saveeŋ eta maau.

³ Atem yavyav payau kat. Tauta tinig isov isaghat wa. Anoŋag sirivu eta igheen poi mako. Sosor tsiau, tauta tuag isov iyavyav gha nasaghat.

⁴ Pataŋani to sosor tsiau itatan ghau kat imin dibom tintiina tipolpol izala pavog. Tauta igham pataŋani tiina payau le irau nabaado mako.

⁵ Yau nagham ŋgar imin yes borauŋa ve nazoor aliŋam. Tauta aazne, mbotmboot toman nanagh tau vaazi saghati ne igham ghau.

⁶ Yavyavuuŋ tiina igham ghau, ve natudtud ve nayakyak. Tauvene mboŋoozo ila le rabrab izi, lolog ipataŋan ve nataŋtaŋ.

⁷ Tinig ituntun kat, ve anoŋag isov isaghat wa. Anoŋag sirivu eta igheen poi mako.

⁸ Moroghooŋ tane iŋgoor katin ghau le tapirig isov kat. Tauvene lolog ipataŋan ve nayakyak.

⁹ Yoova, yo uwatagh: Yau naghe yo uul ghau leso tinig poia. Yau lolog ipataŋan ve nataŋtaŋ. Gabua tane iyooŋ payo mako.

¹⁰ Aazne, ateg ipaparav ve tapirig imbool. Tauvene naghog poia muul mako.

¹¹ Zetagŋa ve yes tau ruum toozi igharau ghau ne, tighita moroghooŋ tsiau tane, le tileep soghan payau. Tigharau ghau muul mako. Ve ziiri waaro tsiau tauvene paam. Tilam tigig ghau rigta mako.

¹² Koiagŋa tau tizuari zi pa ravuuŋ ghau namaat na, tighur liis katini payau. Mboŋoozo ila le ravrav izi, yes tisavsaav pa eez to tivaghamun ghau, Lolozi ighurghur pa eez yoŋgaaŋa to tikari ghau.

¹³ Eemon matag ila pa saveeŋ toozi tawe mako. Yau naneneeŋ mon imin tamtamon tau aavo ve taliiŋa ivool, ve irau isavsaav mako, ve iloŋlooŋ saveeŋ mako.

¹⁴ Onoon kat, yau namin tamtamon tau taliiŋa ivool ve iloŋlooŋ saveeŋ mako, ve irau iyol saveeŋ eta mako.