Mbouŋ to Yes Israela 37:8-35 in Mutu

⁸ Tovenen atem yabyab ve ugham ŋgar naol malep. Uyai ghom ve utatan atem. Pa vene, atem yabyab, ve ugham sosor.

⁹ Pasa, Yoova pale ipasob ndiran samsamia ve tilaledi. Eemoghon tamtoghon to tinumeer Yoova ve tighur matadi pani, yes pale tineep pooi ila taan to ye igham pa tamtoghon toni.

¹⁰ Mala maau pale ndiran samsamia tisob tilaledi. Ighaze ukaal naghodi, nene pale irau ughita di muul maau.

¹¹ Eemoghon yes to titatan taudi ve tinumeer Yoova, yes pale tineep pooi ila taan to ye igham pa tamtoghon toni. Pale igham di tineep poia kat toman tinidi iza.

¹² Ndiran samsamia tilup di, ve tikaal ataam pa tiwaghamun tamtoghon deŋiadi. Atedi yabyab kat, ve tiŋaaŋ mareer ila padi.

¹³ Eemoghon Yoova iŋiŋ padi. Pasa, ye iwatag: Mala maau pale sawa todi ivot ve tilaledi.

¹⁴ Ndiran samsamia tipas buza todi tighaze timbut yes mbolaaŋa to tirau mbeb eta maau. Ve tindaad pane todi pa tivaneg di. Tighaze tirab yes to titaghon ataam deŋia.

¹⁵ Eemoghon Yoova pale ipamuul buza todi imuul pa taudi. Ve pane todi pale ipolpol.

¹⁶ Ighaze tamtoghon deŋia eta le mbeb rismoghon, nene iraua. Nepooŋ toni pale poia le ilib pa ndiran samsamia naol to ledi mbeb katindi.

¹⁷ Pasa, Yoova pale ipasob ndiran samsamia tapiridi. Eemoghon ye ipapalot tamtoghon deŋiadi, ve iŋgin di tineep pooi.

¹⁸ Yes to ledi sosor eta ila Maaron mata maau, Yoova iwatag nepooŋadi, ve mata padi. Ve mbeb popoia to ye igham di tinim ledi, nene pale tineep todi itaghoni taghoni gha ila.

¹⁹ Sawa to ighaze pataŋani ivot, yes pale tineep pooi. Ighaze pitool ivot, nene pale tiraua kat pa aniiŋ.

²⁰ Eemoghon ndiran samsamia pale tisob tilaledi. Yoova koia pale timatmaat tinimale kananaŋ ruŋgu to timalai ve kurukia tizi. Pale tisob tinimale yab mbuasa to iza ve imbiriis.

²¹ Ndiran samsamia tighamgham bun, ve tiyatyat di maau. Eemoghon tamtoghon deŋiadi, yes tireirei mbeb todi pa yes mbolaaŋa.

²² Yes to poia to Yoova izaza todi, pale tineep pooi ila taan to ye igham pa tamtoghon toni. Eemoghon yes to mbalmbali toni inepneep todi, ye pale ipasob di ve tilaledi.

²³ Yes to titaghon ataam to Yoova, tighami lolo poia kat. Ve ye pale ipatooŋ di pa ataam, ve ipalot di pa laghooŋ todi.

²⁴ Tamtoghon tovene, ighaze aghe ilot pa mbeb eta, nene irau itap maau. Pasa, Yoova ikiskis nima ve ipapaloti.

²⁵ Sawa to pain ghou, ve inim aazne nanim olman waat, you naghita Yoova ipul muri pa tamtoghon deŋiadi pa eta sone. Ve naghita todi eta natu pitoola ve isuŋsuŋ tamtoghon pa a aniiŋ sone.

²⁶ Tamtoghon deŋiadi matadi reiŋ mbeb, ve tiyokyok pa tamtoghon tigham bun ila todi. Ve ndinatudi paam, tinim ataam pa poia to Yoova iza to tamtoghon.

²⁷ Upul murim pa ŋgar samia, ve ugham ŋgar poia moghon. Leso uneep pooi ila taan to Yoova igham payom itaghoni taghoni gha ila.

²⁸ Pasa, Yoova lolo pa ŋgar deŋia. Tovenen tamtoghon toni to lolodi ineep tuŋia ila toni ve titaghon ataam toni, ye irau ipul muri padi maau. Pale iŋgin poian di itaghoni taghoni gha ila. Eemoghon ndiran samsamia ndinatudi, ye pale ipasob di ve tilaledi.

²⁹ Ndiran deŋiadi pale tigham taan to Yoova igham pa tamtoghon toni, ve tineep pooi tonowe irau sawa isob.

³⁰ Saveeŋ to ivotvot ila tamtoghon deŋiadi avodi, nene ŋgar poia ineep ila. Yes tisasavia ŋgar deŋia moghon.

³¹ Tutuuŋ to Maaron todi, ineep ariaŋa ila lolodi ve ŋgar todi. Tauto irau titap maau.

³² Ndiran samsamia tighamgham lilin tamtoghon deŋiadi. Tizuaria di tighaze le tirab di timaat.

³³ Eemoghon Yoova ivolvool to tamtoghon toni. Irau ipul di tineep ila koiadi nimadi ne maau. Ve ighaze tamtoghon tipayoon di pa savsaveeŋ, nene pale Yoova tau iyoon ila muridi, ve ipaghazoŋan di ighaze ledi sosor maau.

³⁴ Tovenen atem izi, ughur matam pa Yoova, ve utaghon katin ataam toni. Leso ipait ghom, ve izam pa taan to ye igham pa tamtoghon toni. Ve yom pale ughita Yoova iwaghamun ndiran samsamia ve tilaledi.

³⁵ Muuŋ, you nawatag ŋgeu samia eez. Sawa naol, ye ipamatughezan tamtoghon, ve itatan di le tineep sami. Ŋgeu tonowen tapiri tiina kat. Ye inimale ai mendepur tiina to Lebanon. Eemoghon muri, nalaagh izi ndug toni, ve naghita ŋgeu tonowen ineep muul maau. Nakaal nagho le maau. Ila vena?

⁸ Tauvene atem yavyav ve ugham ŋgar naol sov. Uyai ghom ve utatan atem. Mako pale aate yavyav tsio tana igherev ghom, ve ugham sosor.

⁹ Pasaa, Yoova pale ipasov zeran sasaghati gha tilalez. Eemon yes tau tinumeer Yoova ve tighur matazi pani na, pale tileep poia ila taan tau i igham pa tamtamon tooni.

¹⁰ Malau mako pale zeran sasaghati tisov tilalez. Isaav ighe uil naghozi, ene pale irau ughit zi muul mako.

¹¹ Eemon yes tau titatan tauzi ezazi ve tinumeer Yoova, yes pale tileep poia ila taan tau i igham pa tamtamon tooni. I pale igham zi tileep poia kat toman tintinizi.

¹² Zeran sasaghati tilup zi ve tiil eez to tivaghamunia tamtamon duduŋazi. Atezi yavyav kat ve tiŋaaŋ maripazi ila pazi.

¹³ Eemon Yoova, i iŋiŋ pazi. Pasaa, i iwatagh: Malau mako pale saawe toozi ivot gha tilalez.

¹⁴ Zeran sasaghati tipas mbuzaagh toozi to tirav yes mbolaaŋa tau tirau gabua eta mako na. Ve tidaad paneegh toozi to tivanegh zi. Tighe tirav yes tau titaghon eez duduuŋa na.

¹⁵ Eemon Yoova pale ipamuul mbuzaagh toozi imuul pa tauzi. Ve paneegh toozi pale ipolpol.

¹⁶ Isaav ighe tamtamon duduuŋa eta le gabua ŋgiira mon, ene irau. Lepoogh tooni pale poia iliiv zeran sasaghati naol tau lezi gabua katini.

¹⁷ Pasaa, Yoova pale ipasov zeran sasaghati tapirizi. Eemon i ipapalot tamtamon duduŋazi, ve iŋgin zi tileep poi.

¹⁸ Yes tau lezi sosor ila Maaron maata mako na, Yoova iwatagh lepoogh toozi, ve maata pazi. Ve gabua tau i igham pazi motot na, ene pale igheen toozi taghon taghon gha ila.

¹⁹ Saawe tau ighe pataŋani ivot, yes pale tileep poi. Isaav ighe pitool ivot, ene pale tirau kat pa aniiŋ.

²⁰ Eemon zeran sasaghati pale tisov tilalez. Yoova koiŋa pale timatmaat imin manman ruuŋgu tau timalai ve timburur tizi. Pale tisov imin yav mbuasa tau imbuŋ izaa, ve imbiriis gha ilale.

²¹ Zeran sasaghati tighamgham bun, ve tiyatu mako. Eemon tamtamon duduŋazi, yes tireirei gabua toozi pa yes mbolaaŋa.

²² Yes tau poia to Yoova izazaa toozi na, pale tileep poia ila taan tau i igham pa tamtamon tooni. Eemon yes tau aatyavyav tooni igheen toozi na, i pale ipasov zi gha tilalez.

²³ Yes tau titaghon eez to Yoova na, tighamu loolo poia kat. Ve i pale itotoi eez pazi, ve ipalot zi pa laghooŋ toozi.

²⁴ Tamtamon tauvene, isaav ighe aaghe ilot pa gabua eta, ene irau itap mako. Pasaa, Yoova ikiskis niima ve ipapaloti.

²⁵ Saawe tau yau kukuag gha ilam aazne namin kooŋ ne, yau naghita Yoova ighur muuri pa tamtamon duduŋazi pai eta soone. Ve naghita toozi eta naatu pitoola, ve isuŋsuŋ tamtamon pa le aniiŋ soone.

²⁶ Tamtamon duduŋazi matazi reiŋ gabua, ve tiyokyok pa tamtamon to tigham bun ila toozi. Ve natuzŋa paam timin eez to tamazŋa tighita poia to Yoova izaa to tamtamon.

²⁷ Ughur murim pa ŋgar saghati, ve ugham ŋgar poia mon. Leso uleep poi ila taan tau Yoova igham payo na taghon taghon gha ila.

²⁸ Pasaa, Yoova loolo pa ŋgar duduuŋa. Tauvene tamtamon tooni tau lolozi isaghavu ariaaŋ ve titaghon eez tooni na, i irau ighur muuri pazi mako. I pale iŋgin poghani zi taghon taghon gha ila. Eemon zeran sasaghati natuzŋa, i pale ipasov zi gha tilalez.

²⁹ Zeran duduŋazi pale tigham taan tau Yoova igham pa tamtamon tooni na, ve tileep poia ta sewe irau saawe.

³⁰ Saveeŋ tau ivotvot ila tamtamon duduŋazi avozi, ene ŋgar poia igheen ila. Yes tisasavia ŋgar duduuŋa mon.

³¹ Tutuuŋ to Maaron toozi igheen ariaaŋ ila lolozi ve ŋgar toozi. Tauta irau titap mako.

³² Zeran sasaghati tighamgham lilin tamtamon duduŋazi. Tizuari zi tighe le tirav zi timaat.

³³ Eemon Yoova ivolvool to tamtamon tooni. Irau ipul zi tileep ila koiazŋa nimazi ne mako. Ve isaav ighe tamtamon tipayooz zi pa savsaveeŋ, ene pale Yoova tauu iyooz ila murizi, ve ipaghazoŋai zi ighe lezi sosor mako.

³⁴ Tauvene atem izi, ughur matam pa Yoova, ve utaghon duduŋai eez tooni. Leso ipakur ghom, ve ezam pa taan tau i igham pa tamtamon tooni na. Ve yo pale ughita Yoova ivaghamunia zeran sasaghati gha tilalez.

³⁵ Muuŋ, yau nawatagh ŋeer saghati ee. Saawe isov, i ipaparoi tamtamon, ve itatan zi le tileep saghat. Ŋeer tawe tapiri tiina kat. I imin ai mezepur tiina to Lebanon. Eemon murei, nalaagh izi nugh tooni, ve naghita ŋeer tana ileep muul mako. Nail naagho le mako. Aat ila mindai?