1 Mbouŋ to David, besooŋa to Yoova Ŋgar to zoraaŋ Maaron aliiŋa tau igheen ila zeran sasaghati lolozi, ene isavsaav pazi, ve ighamgham pooz pazi. Tauta matazi iŋgal Maaron mako, ve tiroi pani mako.
2 Sosor toozi tawe, ikau ŋgar toozi. Tauta tipapakur tauzi, ve matazi iŋgal sorok tighe Maaron ighita sosor toozi mako, ve irau ighur atuya pazi mako.
3 Saveeŋ karom ve saveeŋ sasaghati mon ta ivotvot ila avozi. Ŋgar tau iuul ghiit to taleep poia, ene tipuli wa. Tauta tigham ŋgar poia eta mako.
4 Ŋgar toozi iyaryaaŋ kat. Tighe le tigham ŋgar saghati mon. Mboŋ ta naol ne, tighengheen ila moogh toozi, ve matazi iŋgalŋgal pa saa ŋgar saghati tau pale tighamu. Eez saghati tawe, lolozi pa tipuli mako.
5 Yoova, yo lolom isaghav tamtamon tsio, ve uluul zi irau saawe. Ŋgar tsio tana, ene tiina le tiina kat. Izala le ikis sambam saamba. Ve ŋgar to taghoniiŋ saveeŋ mbuaaŋ tsio paam. Izala le ikis taitai.
6 Ŋgar tsio duduuŋa, ene imin loloz tintiina. Ve ŋgar tsio tau ugabiiz tamtamon itaghon ŋgar duduuŋa ve ughur atuya pazi, ene paam tiina kat, imin mazavan belbeluuŋa tau izila le izila kat. Yoova, yo uŋgin tamtamon ve gabua maata maata to su ve nughei, ve uluul zi, tauta tileep poi.