Mbouŋ to Yes Israela 35:16-27 in Mutu

¹⁶ Ve tipiyaav saveeŋ velegiiŋ naol payou. Atedi yabyab payou kat, ve tiŋaaŋ mareer tighaze le tiwaghamun ghou.

¹⁷ Yoova, pughu vena to umbabatut di, ve tighamgham ŋgar tovene payou? Pale ŋeez o uul ghou? Yes tinimale laion to tisasaŋan pa tisaas ghou. Tovenen ugham mulin ghou ila nimadi, leso naneep pooi.

¹⁸ Ighaze uul ghou, sawa to tamtoghon tiom tilup di pa suŋuuŋ, you pale nala toman di, ve napait ghom toman lolog poia. Pale napait varum ila ival tiina tonowen naghodi.

¹⁹ Koiagŋa, muuŋ yeiŋa lupuuŋ tiei ee moghon. Eemoghon aazne, tighur koi payou sorok. Tovenen uul ghou lak! Pa vene, tilib payou ve tipakur di. Yes tighan matadi payou, ve tighaze: “Aa, ŋgeu to iwaghamgham wa!” O Yoova, ŋgar tovene ivot malep!

²⁰ Yes tisavia saveeŋ luuma eta pa tilup tamtoghon ve tineep pooi ne maau. Tiŋgalŋgal saveeŋ naol pa tamtoghon to orodi maate to tineep izi taan tonene.

²¹ Ve aliŋadi izaza sorok, ve tisavsaav ila matag tighaze: “Aa, ghara nighita ghom!”

²² Yoova, ŋgar todi samsamia to naol ne, yom ughita di wa. Neneeŋam padi malep! Tiina tiou, uneep saguan payou malep.

²³ Maaron, yom Tiina tiou. Umundig ve uvool tiou. Uyoon payou, ve utatan di.

²⁴ Yoova, Maaron tiou, ŋgar tiom deŋia moghon. Tovenen uyoon payou, ve upaghazoŋan ghou ila tamtoghon matadi ughaze you leg sosor eta maau. Uul ghou. Pa vene, koiagŋa tipakur di pa pataŋani to igham ghou ne.

²⁵ Ghoro lolodi poia, ve tisaav tighaze: “Aa, isob! Ŋgar to taghaze tagham pani, tauto ivot pani ve isami wa!”

²⁶ Yoova, yes to tipakur di pa pataŋani to igham ghou ne, ugham di tiwaghamgham, ve tighau tila toman mayadi. Yes to tipapait taudi ve tiveleg ghou, upamayaŋin di le mayadi kat.

²⁷ Eemoghon yes to tighaze yom uul ghou ve upaghazoŋan ghou ila tamtoghon matadi ughaze you leg sosor eta maau, yes pale lolodi poia ve tinidi iza, ve tilool ve tipait izam. Ve tisavsaav tighaze: “Yoova iza tiina kat! Ighaze mbesooŋa toni ineep pooi, pale ye paam lolo poia.”

¹⁶ Ve tisiksik saveeŋ veleghiiŋ naol payau. Atezi yavyav payau kat, ve tiŋaaŋ maripazi tighe le tikari ghau.

¹⁷ Yoova, puughu mindai ta umamarar zi ve tighamgham ŋgar tauvene payau? Pale ŋeez o uul ghau? Yes timin laion tau tisasaŋan pa raŋgatiiŋ ghau. Tauvene ugham mulin ghau ila nimazi, leso naleep poi.

¹⁸ Ve ighe uul ghau, mako saawe tau tamtamon tsio tilup zi pa suŋuuŋ, yau aat nala tomani zi, ve napait ghom toman lolog poia. Pale napait varum ila eval tiina tawe naghozi.

¹⁹ Koiagŋa, muuŋ yeŋa lupuuŋ tsiei eemon. Eemon aazne, tighur koi payau sorok. Tauvene uul ghau lak! Mako pale tiliiv ghau ve tipakur zi. Ve tighan matazi payau, ve tighe: “Aa, ŋeer ta ivaghamgham wa!” O Yoova, ŋgar tauvene ivot sov!

²⁰ Yes tisavia saveeŋ luuma eta to tilup tamtamon ve tileep poi ne mako. Tiŋgalŋgal saveeŋ naol pa tamtamon marowa to taan tane.

²¹ Ve aliŋazi izazaa sorok, ve tisavsaav ila matag tighe: “Aa, ŋgarig gha nighit ghom!”

²² Yoova, ŋgar toozi sasaghati ta naol ne, yo ughit zi wa. Uneneeŋ pazi sov! Tiina tsiau, uleep soghan payau sov.

²³ Maaron, yo Tiina tsiau. Uburig ve uvool tsiau. Uyooz payau, ve utatan zi.

²⁴ Yoova, Maaron tsiau, ŋgar tsio iduduuŋ mon. Tauvene uyooz payau, ve upaghazoŋai ghau ila tamtamon matazi ughe yau leg sosor eta mako. Uul ghau. Mako pale koiagŋa tipakur zi pa pataŋani tau igham ghau ne.

²⁵ Mako lolozi poia ve tisaav tighe: “Aa, isov! Ŋgar tau taghe tagham pani, tauta ivot pani gha isaghat wa!”

²⁶ Yoova, yes tau tipakur zi pa pataŋani tau igham ghau ne, ugham zi tivaghamgham, ve tighau tila toman mayazi. Yes tau tivelegh ghau ve tipapait tauzi na, upamayaŋin zi le mayazi kat.

²⁷ Eemon yes tau tighe yo uul ghau ve upaghazoŋai ghau ila tamtamon matazi ughe yau leg sosor eta mako na, yes pale lolozi poia ve tintinizi, ve tiyoor ezam toman aliŋazi tiina. Ve tisavsaav tighe: “Yoova eeza tiina kat! Isaav ighe besooŋa tooni ileep poi, ene pale i paam loolo poia.”