Mbouŋ to Yes Israela 34:6-22 in Mutu

⁶ Muuŋ, pataŋani tiina igham ghou. Tovenen nataŋ roran Yoova pa ulaaŋ. Ve ye ilooŋ suŋuuŋ tiou, ve igham mulin ghou pa pataŋani tiou tisob.

⁷ Yes to timatughez pa Yoova ve titaghon ŋgar toni, aŋela toni inepneep toman di, ve iŋginŋgin di. Ye ighamgham mulin di pa pataŋani todi.

⁸ Yoova, ye poia kat. Taumim atoova ve aghita. Yes to tinumeera ve tiyoŋyooŋ ila toni, poia toni izaza todi le lolodi poia kat.

⁹ Yam tamtoghon patabuaŋa to Yoova, amatughez pani ve ataghon ŋgar toni. Pasa, yes to tighamgham tovene, irau timbool pa mbeb eta maau.

¹⁰ Laion papaghu, tapiridi tintina. Eemoghon sawa pida, adi aniiŋ maau ve pitool di. Ve yes to tizuaria di pa Yoova, nene irau timbool pa mbeb poia eta maau.

¹¹ Ndinatug, anim alooŋ saveeŋ tiou tonene. You naghaze napatooŋ gham pa ataam to amatughez pa Yoova ve ataghon ŋgar toni.

¹² Vena, yom ughaze uneep pooi, ve uneep mala izi taan toman lolom poia?

¹³ Ighaze tovene, ghoro uŋgin poian avom. Saveeŋ samia, ma kaarom eta ivot ila avom malep.

¹⁴ Ve upul murim pa ŋgar samia, ve ugham ŋgar poia moghon. Uzuaria ghom pa taghoniiŋ ŋgar luuma, ve ukaal ataam pa yamŋa tamtoghon alup gham ve aneep pooi.

¹⁵ Tamtoghon deŋiadi, Yoova mata padi, ve ighurghur taliŋa pa taŋiiz todi.

¹⁶ Eemoghon ndiran samsamia, ye ighurghur koi padi. Pale ipasob di pa taan le tisob kat. Muri pale tamtoghon matadi iŋgal di muul maau.

¹⁷ Sawa to tamtoghon deŋiadi titaŋ roran Yoova pa ulaaŋ, ye iloŋlooŋ di, ve ighamgham mulin di pa pataŋani todi tisob.

¹⁸ Yes to pataŋani igham di le lolodi isami kat, Yoova ineep igharau di. Tamtoghon to ighaze pataŋani itatani le tapiri isob, nene pale Yoova iuuli.

¹⁹ Onoon, tamtoghon deŋiadi, pataŋani naol ivotvot padi. Eemoghon Yoova pale igham mulin di pa pataŋani todi to naol.

²⁰ Pale iŋgin poian di kat. Irau tuadi eta ipol maau.

²¹ Eemoghon yes to tizorzoor Yoova aliŋa, ŋgar todi samsamia pale imuul pa taudi, ve irab di timaat. Yes to tighurghur koi pa tamtoghon deŋiadi, nene pale Yoova ighur atia padi, leso iyat ŋgar todi tonowen.

²² Yoova ighamgham mulin mbesooŋa toni pa pataŋani todi, leso tineep pooi. Yes to tinumeera ve tiyoŋyooŋ ila toni, ye irau ighur atia padi maau.

⁶ Muuŋ, pataŋani tiina igham ghau. Tauvene nataŋ rarai Yoova to iuul ghau. Ve i ilooŋ suŋuuŋ tsiau, ve igham mulin ghau pa pataŋani tsiau naol isov.

⁷ Yes tau tiroi pa Yoova ve titaghon ŋgar tooni na, aŋela tooni ilepleep tomani zi, ve iŋginŋgin zi. I ighamgham mulin zi pa pataŋani toozi.

⁸ Yoova, i poia kat. Taumim atoova ve aghita. Yes tau tinumeera ve tiyoŋyooŋ ila tooni na, poia tooni izazaa toozi, le lolozi poia kat.

⁹ Yam tamtamon patabuyaaŋa to Yoova, aroi pani ve ataghon ŋgar tooni. Pa yes tau tighamgham tauvene, irau timbool pa gabua eta mako.

¹⁰ Laion paghpaaghu, tapirizi tiina. Eemon saawe siriv, lezi aniiŋ mako ve pitool zi. Ve yes tau tizuari zi pa Yoova, ene irau timbool pa gabua poia eta mako.

¹¹ Natugŋa, alam alooŋ saveeŋ tsiau tane. Yau naghe napaghazoŋai gham pa eez to aroi pa Yoova ve ataghon ŋgar tooni.

¹² Mindai, yo ughe uleep poia, ve uleep malau izi taan toman lolom poia?

¹³ Ighe tauvene, o uŋgin poghania avom. Saveeŋ saghati, ma karom eta ivot ila avom sov.

¹⁴ Ve ughur murim pa ŋgar saghati, ve ugham ŋgar poia mon. Uzuari ghom pa taghoniiŋ ŋgar luuma, ve uil eez to yamŋa tamtamon avalupu gham ve aleep poia.

¹⁵ Tamtamon duduŋazi, Yoova maata pazi, ve ighurghur taliiŋa pa taŋiiz toozi.

¹⁶ Eemon zeran sasaghati, i ighurghur koi pazi. I pale ipasov zi pa taan le tisov kat. Murei pale tamtamon matazi iŋgal zi muul mako.

¹⁷ Saawe tau tamtamon duduŋazi titaŋ rarai Yoova pa uleeŋ, i iloŋlooŋ zi ve ighamgham mulin zi pa pataŋani toozi naol isov.

¹⁸ Yes tau pataŋani igham zi le lolozi isaghat kat na, Yoova ileep igharau zi. Tamtamon tau ighe pataŋani itatani le tapiri isov, ene pale Yoova iuule.

¹⁹ Onoon, tamtamon duduŋazi, pataŋani naol ivotvot pazi. Eemon Yoova pale igham mulin zi pa pataŋani toozi ta naol ne.

²⁰ I pale iŋgin poghani zi kat. Irau tuazi eta ipol mako.

²¹ Eemon yes tau tizorzoor Yoova aliiŋa na, ŋgar toozi sasaghati pale imuul pa tauzi, ve irav zi timaat. Yes tau tighurghur koi pa tamtamon duduŋazi, ene pale Yoova ighur atuya pazi, leso iyat ŋgar toozi tawe.

²² Yoova ighamgham mulin besooŋa tooni pa pataŋani toozi, leso tileep poia. Yes tau tinumeera ve tiyoŋyooŋ ila tooni na, i irau ighur atuya pazi mako.