Mbouŋ to Yes Israela 34:2-14 in Mutu

² You lolog poia pa Yoova, ve napaiti pa ŋgar popoia to ye igham payou. Yes to tinumeer Yoova, ve timbadbaad pataŋani, irau tilooŋ aliŋag tonene. Leso lolodi poia paam.

³ Yam anim itiŋa talup ghiit, ve tapakur Yoova. Itiŋa tapait iza. Pasa, ye iza tiina le tiina kat.

⁴ Suŋuuŋ tiou iŋarua Yoova, ve ye ilooŋ ghou. Tauto igham mulin ghou pa mbeb tisob to namatughez padi ne.

⁵ Yes to tighur matadi pani pa iuul di, nene pale lolodi poia, ve tinidi iza. Ye pale iuul di. Irau tighur matadi pani sorok ve mayadi ne maau.

⁶ Muuŋ, pataŋani tiina igham ghou. Tovenen nataŋ roran Yoova pa ulaaŋ. Ve ye ilooŋ suŋuuŋ tiou, ve igham mulin ghou pa pataŋani tiou tisob.

⁷ Yes to timatughez pa Yoova ve titaghon ŋgar toni, aŋela toni inepneep toman di, ve iŋginŋgin di. Ye ighamgham mulin di pa pataŋani todi.

⁸ Yoova, ye poia kat. Taumim atoova ve aghita. Yes to tinumeera ve tiyoŋyooŋ ila toni, poia toni izaza todi le lolodi poia kat.

⁹ Yam tamtoghon patabuaŋa to Yoova, amatughez pani ve ataghon ŋgar toni. Pasa, yes to tighamgham tovene, irau timbool pa mbeb eta maau.

¹⁰ Laion papaghu, tapiridi tintina. Eemoghon sawa pida, adi aniiŋ maau ve pitool di. Ve yes to tizuaria di pa Yoova, nene irau timbool pa mbeb poia eta maau.

¹¹ Ndinatug, anim alooŋ saveeŋ tiou tonene. You naghaze napatooŋ gham pa ataam to amatughez pa Yoova ve ataghon ŋgar toni.

¹² Vena, yom ughaze uneep pooi, ve uneep mala izi taan toman lolom poia?

¹³ Ighaze tovene, ghoro uŋgin poian avom. Saveeŋ samia, ma kaarom eta ivot ila avom malep.

¹⁴ Ve upul murim pa ŋgar samia, ve ugham ŋgar poia moghon. Uzuaria ghom pa taghoniiŋ ŋgar luuma, ve ukaal ataam pa yamŋa tamtoghon alup gham ve aneep pooi.

² Yau lolog poia pa Yoova, ve napakuru pa ŋgar popoia tau i igham payau na. Yes tau tinumeer Yoova ve tibadbaad pataŋani na, irau tilooŋ aliŋag tane, leso lolozi poia paam.

³ Yam alam itiŋa talup ghiit, ve tapakur Yoova. Itiŋa tapait eeza. Pasaa, i eeza tiina le tiina kat.

⁴ Suŋuuŋ tsiau iŋarui Yoova, ve i ilooŋ ghau. Tauta igham mulin ghau pa gabua naol isov tau naroiroi pazi na.

⁵ Yes tau tighur matazi pani to iuul zi, ene pale lolozi poia ve tintinizi. I aat iuul zi. Irau tighur matazi pani sorok ve mayazi ne mako.

⁶ Muuŋ, pataŋani tiina igham ghau. Tauvene nataŋ rarai Yoova to iuul ghau. Ve i ilooŋ suŋuuŋ tsiau, ve igham mulin ghau pa pataŋani tsiau naol isov.

⁷ Yes tau tiroi pa Yoova ve titaghon ŋgar tooni na, aŋela tooni ilepleep tomani zi, ve iŋginŋgin zi. I ighamgham mulin zi pa pataŋani toozi.

⁸ Yoova, i poia kat. Taumim atoova ve aghita. Yes tau tinumeera ve tiyoŋyooŋ ila tooni na, poia tooni izazaa toozi, le lolozi poia kat.

⁹ Yam tamtamon patabuyaaŋa to Yoova, aroi pani ve ataghon ŋgar tooni. Pa yes tau tighamgham tauvene, irau timbool pa gabua eta mako.

¹⁰ Laion paghpaaghu, tapirizi tiina. Eemon saawe siriv, lezi aniiŋ mako ve pitool zi. Ve yes tau tizuari zi pa Yoova, ene irau timbool pa gabua poia eta mako.

¹¹ Natugŋa, alam alooŋ saveeŋ tsiau tane. Yau naghe napaghazoŋai gham pa eez to aroi pa Yoova ve ataghon ŋgar tooni.

¹² Mindai, yo ughe uleep poia, ve uleep malau izi taan toman lolom poia?

¹³ Ighe tauvene, o uŋgin poghania avom. Saveeŋ saghati, ma karom eta ivot ila avom sov.

¹⁴ Ve ughur murim pa ŋgar saghati, ve ugham ŋgar poia mon. Uzuari ghom pa taghoniiŋ ŋgar luuma, ve uil eez to yamŋa tamtamon avalupu gham ve aleep poia.