Mbouŋ to Yes Israela 33:6-18 in Mutu

⁶ Muuŋ, saveeŋ to Yoova moghon, tauto mbeb to sambam paroŋania tisob tivot. Avo isaav, ve ndag, kaiyo, ve pitum tisob tivot ila sambam paroŋania.

⁷ Ye igham te ila ilupi ila dige ee moghon. Mazovan to muuŋ kat itatab taan, ye ighur poiani ila ina.

⁸ Yam to aneep irau taan, amatughez pa Yoova ve ataghon ŋgar toni. Yam ndug ndug, aroron pani, ve apakuri.

⁹ Pasa, ye isaav moghon, ve sambam ve taan tivot titaghon tau aliŋa. Ye isaav ariaŋa, ve mbeb tisob tivot ve tineep tuŋia ila inadi.

¹⁰ Ndug ndug matadi iŋgal ŋgar naol tighaze tigham di. Eemoghon Yoova iponpoon ataam padi. Tauto ŋgar todi tonowen inim mbeb sorok, ve le anoŋa maau.

¹¹ Eemoghon Yoova, ighaze mata iŋgal ŋgar eta, nene pale ŋgar tonenen ineep tovene irau sawa isob. Sa ŋgar to ighaze lolo ighur pani, nene pale inepneep tovene itaghoni taghoni gha ila.

¹² Yes Israela Maaron todi, nene Yoova. Tauto tinidi iza pa poia toni to izaza todi. Ye tau isia di, ve igham di tinim le kat.

¹³ Yoova ineep izi sambam, ve mata izizi pa ival tiina to taan.

¹⁴ Ye ineep ila ina to ghamuuŋ pooz, ve ighita tamtoghon tisob to tineep izi taan.

¹⁵ Ye to ighurghur ŋgar ila tamtoghon eŋaeŋa lolodi. Ve ŋgar naol to tamtoghon tighamgham di, ye iwatag di tisob.

¹⁶ Ighaze kinik eta le ndaaba katindi, irau ndaaba tonenen eŋgendi tilib pa malmal maau. Ndaaba ariaŋadi paam. Irau taudi tapiridi, ve tilib pa koiadi maau.

¹⁷ Ve hos to ndaaba tilaan padi pa malmal, tovene paam. Ighaze tighur matadi padi pa tiuul di ve tilib pa koiadi, nene pale tighur matadi padi sorok. Onoon, hos tapiridi. Eemoghon irau tiuul di maau.

¹⁸ Onoon kat, yes to timatughez pa Yoova ve titaghon ŋgar toni, ye mata padi. Yes to tinumeer Yoova tighaze ye lolo ineep tuŋia ila to tamtoghon toni ve iuluul di, ye iŋgin di tineep pooi.

⁶ Muuŋ, saveeŋ to Yoova mon, tauta gabua to sambam saamba tisov tivot. Aavo isaav, ve aaz, kaiyo, ve pitum tisov tivot ila sambam saamba.

⁷ I igham te ila ilup ghi ila niia eemon. Mazavan tau muuŋ geeg itav taan na, ene i ighur poghania ila niia.

⁸ Yam tau aleep irau taan na, aroi pa Yoova ve ataghon ŋgar tooni. Yam nughmariŋ, aroi pani ve apakuru.

⁹ Pa i isaav mon, ve sambam ve taan tivot itaghon i tauu aliiŋa. I isaav ariaaŋ, ve gabua tisov tivot ve tigheen tuŋia ila niazi niazi.

¹⁰ Nugh nugh matazi iŋgal ŋgar katini tighe tigham zi. Eemon Yoova iponpoon eez pazi. Tauta ŋgar toozi tawe imin kaut sorok, ve le anooŋa mako.

¹¹ Eemon Yoova, isaav ighe maata iŋgal ŋgar eta, ene pale ŋgar tana iyooz tauvene irau saawe. Saa ŋgar tau ighe loolo ighur pani, ene pale ighengheen tauvene taghon taghon gha ila.

¹² Yes Israela Maaron toozi, ene Yoova. Tauta tintinizi pa poia tooni tau izazaa toozi. I tauu isiigh zi, ve igham zi timin le motot.

¹³ Yoova ileep izi sambam, ve maata izizi pa eval tiina to taan.

¹⁴ I ileep ila niia to ghamuuŋ pooz, ve ighitghita tamtamon tisov tau tileep izi taan.

¹⁵ I ta ighurghur ŋgar ila tamtamon eŋaeŋa lolozi. Ve ŋgar naol tau tamtamon tighamgham zi na, i iwatagh zi tisov.

¹⁶ Isaav ighe kinik eta le zaaba katini, irau zaaba tana zigazi tiliiv pa malmal mako. Zaaba ariaŋazi paam. Irau tauzi tapirizi ve tiliiv koiazŋa mako.

¹⁷ Ve hos tau zaaba tilandoov zi pa malmal na, tauvene paam. Isaav ighe tighur matazi pazi to tiuul zi ve tiliiv koiazŋa, ene aat tighur matazi pazi sorok. Onoon, hos tapirizi. Eemon irau tiuul zi mako.

¹⁸ Onoon kat, yes tau tiroi pa Yoova ve titaghon ŋgar tooni na, i maata pazi. Yes tau tinumeer Yoova tighe i loolo isaghav tamtamon tooni ariaaŋ ve iuluul zi na, i iŋgin zi tileep poi.