2 Apambar ambam, ve arab gita, ve apakur Yoova. Arab mbeb naol, ve apaiti ila mbouŋ to popoia kat.
3 Ambou mbouŋ paghu pani, ve arab poian gita. Leso mbouŋ tiam paghuna. Ambou tiina, ve apaiti toman lolomim poia!
4 Pasa saveeŋ to Yoova, nene onoon ve deŋia moghon. Uraat naol to ighamgham di, nene ipatooŋa ighaze ye itataghon saveeŋ mbuaaŋ toni.
5 Ye lolo pa ŋgar deŋia ve ŋgar to gharatooŋ pataŋani to tamtoghon le deŋia. Ve lolo ineep tuŋia ila to tamtoghon toni ve iuluul di. Ŋgar tonene, ye ipatooŋa irau taan isob.
6 Muuŋ, saveeŋ to Yoova moghon, tauto mbeb to sambam paroŋania tisob tivot. Avo isaav, ve ndag, kaiyo, ve pitum tisob tivot ila sambam paroŋania.
7 Ye igham te ila ilupi ila dige ee moghon. Mazovan to muuŋ kat itatab taan, ye ighur poiani ila ina.
8 Yam to aneep irau taan, amatughez pa Yoova ve ataghon ŋgar toni. Yam ndug ndug, aroron pani, ve apakuri.
9 Pasa, ye isaav moghon, ve sambam ve taan tivot titaghon tau aliŋa. Ye isaav ariaŋa, ve mbeb tisob tivot ve tineep tuŋia ila inadi.
10 Ndug ndug matadi iŋgal ŋgar naol tighaze tigham di. Eemoghon Yoova iponpoon ataam padi. Tauto ŋgar todi tonowen inim mbeb sorok, ve le anoŋa maau.
11 Eemoghon Yoova, ighaze mata iŋgal ŋgar eta, nene pale ŋgar tonenen ineep tovene irau sawa isob. Sa ŋgar to ighaze lolo ighur pani, nene pale inepneep tovene itaghoni taghoni gha ila.