11 Eemoghon Yoova, ighaze mata iŋgal ŋgar eta, nene pale ŋgar tonenen ineep tovene irau sawa isob. Sa ŋgar to ighaze lolo ighur pani, nene pale inepneep tovene itaghoni taghoni gha ila.
12 Yes Israela Maaron todi, nene Yoova. Tauto tinidi iza pa poia toni to izaza todi. Ye tau isia di, ve igham di tinim le kat.
13 Yoova ineep izi sambam, ve mata izizi pa ival tiina to taan.
14 Ye ineep ila ina to ghamuuŋ pooz, ve ighita tamtoghon tisob to tineep izi taan.
15 Ye to ighurghur ŋgar ila tamtoghon eŋaeŋa lolodi. Ve ŋgar naol to tamtoghon tighamgham di, ye iwatag di tisob.
16 Ighaze kinik eta le ndaaba katindi, irau ndaaba tonenen eŋgendi tilib pa malmal maau. Ndaaba ariaŋadi paam. Irau taudi tapiridi, ve tilib pa koiadi maau.
17 Ve hos to ndaaba tilaan padi pa malmal, tovene paam. Ighaze tighur matadi padi pa tiuul di ve tilib pa koiadi, nene pale tighur matadi padi sorok. Onoon, hos tapiridi. Eemoghon irau tiuul di maau.
18 Onoon kat, yes to timatughez pa Yoova ve titaghon ŋgar toni, ye mata padi. Yes to tinumeer Yoova tighaze ye lolo ineep tuŋia ila to tamtoghon toni ve iuluul di, ye iŋgin di tineep pooi.
19 Ye iuluul di, ve igham mulin di pa pataŋani todi. Leso tineep pooi. Ve ighaze pitool tiina ivot, ye pale iuul di, ve igham adi aniiŋ ve tineep pooi.
20 Tovenen iit tanumeer Yoova, ve taghur mataad pani. Pasa, ye Ulaaŋa toit, ve inim sigeu pait.