Mbouŋ to Yes Israela 32:1-11 in Mutu

¹ Tamtoghon to ighaze izoor Maaron aliŋa ve iyel pa ataam toni, ighaze Maaron ireu sosor toni ilale, ye pale tini iza pa poia to Maaron to iza toni.

² Onoon kat, tamtoghon to ighaze ŋgar to kaarom eta ineep ila lolo maau, ve Yoova ighita ighaze ye le sosor eta maau, ye pale tini iza pa poia to Maaron to iza toni.

³ Sawa to naŋgooz sosor tiou, tuag tisob tiyabyab le tapirig isob. Ve nayakyak irau mboŋ ve ndag.

⁴ O Yoova, onoon kat, sawa tonenen, nayamaan katin nimam irau mboŋ ve ndag. Tauto igham tapirig isob kat nanimale ya to ndag ighaaz le imaak.

⁵ Naneep le maau, ghoro navotia sosor tiou payom. Ŋgar tiou samia, naŋgooza muul maau. Sawa tonenen, you naghaze: “Ŋgar tiou to zoraaŋ Yoova aliŋa, you pale navotia ila toni.” Tovenen navotia sosor tiou payom, ve ureua ilale.

⁶ Tovenen tamtoghon tisob to lolodi ineep tuŋia ilat tiom, ve titaghon ataam tiom, ighaze pataŋani eta igham di, yes irau tisuŋ payom. Ighaze pataŋani tiina kat ivot padi inimale yawaaŋa to ivot toman tapiri, yom pale uul di, leso pataŋani itatan di sob.

⁷ Maaron, yom unum inag to yoŋgaaŋ. Yom upoon ghou pa pataŋani, ve ugham mulin ghou. Tauto ival tiina to tiluvut ghou ne, timbou ve tipait izam toman aliŋadi tiina.

⁸ Ve Yoova isaav payou ighaze: “You pale napaghazoŋan ŋgar tiom, ve napatooŋ ghom pa ataam to naghaze utaghoni. You pale matag payom, ve nauul ghom pa ŋgar poia.

⁹ Tovenen ugham ŋgar pooi. Dabam ariaŋa inimale hos ma esele malep. Yes ledi ŋgar maau. Tauto tamtoghon tighurghur ain suruvu toman waar ila avodi, leso tipasaluŋgan di pa laghooŋ, ve titaghon ŋgar todi.”

¹⁰ Ndiran samsamia, pataŋani naol pale igham di. Ve yes to tinumeer Yoova, ye pale lolo ineep tuŋia ila todi, ve tineep ila poia toni lolo.

¹¹ Yam ndiran to ataghon ŋgar deŋia, lolomim poia, ve tinimim iza pa poia to Yoova. Yam to ŋgar poia ineep ariaŋa ila lolomim, asob lolomim poia pa Yoova ve alool ve apaiti!

¹ Mbouŋ to David Tamtamon tau ighe izoor Maaron aliiŋa ve isosor pa eez tooni, ighe Maaron ireu sosor tooni ilale, i aat tintini pa poia to Maaron tau izaa tooni.

² Onoon kat, tamtamon tau ighe ŋgar to karom eta igheen ila loolo mako, ve Yoova ighita ighe i le sosor eta mako, i aat tintini pa poia to Maaron tau izaa tooni.

³ Saawe tau naŋgooz sosor tsiau, tuag tisov tiparyavyav le tapirig isov. Ve nayakyak irau mboŋ ve mataaz.

⁴ O Yoova, onoon kat, saawe tana, nayamaan katin nimam irau mboŋ ve mataaz. Tauta igham ghau tapirig isov kat imin yaa tau aaz ighaaz le imaak.

⁵ Naleep le mako, ra navotia sosor tsiau payo. Ŋgar tsiau saghati, naŋgooza muul mako. Saawe tana, yau naghe: “Ŋgar tsiau to zoraaŋ Yoova aliiŋa, yau aat navotia ila tooni.” Tauvene navotia sosor tsiau payo, ve ureua ilale.

⁶ Tauvene tamtamon tisov tau lolozi isaghav ghom ariaaŋ ve titaghon eez tsio na, isaav ighe pataŋani eta igham zi, ene yes aat tisuŋ payo. Isaav ighe pataŋani tiina kat ivot pazi imin yaa tau ivot toman tapiri, yo pale uul zi, leso pataŋani itatan zi sov.

⁷ Maaron, yo umin niag to yoŋgaaŋ. Yo uponpoon ghau pa pataŋani naol isov, ve ugham mulin ghau. Tauta eval tiina tau tilivut ghau ne, timbou ve tipait ezam toman aliŋazi tiina.

⁸ Ve Yoova isaav payau ighe: “Yau aat napaghazoŋai ŋgar tsio, ve natotoi ghom pa eez to utaghoni. Yau aat matag payo, ve napaduduuŋ ghom pa ŋgar poia.

⁹ Tauvene ugham ŋgar poi. Dabam iyaryaaŋ imin hos ma doŋki sov. Yes lezi ŋgar mako. Tauta tamtamon tighurghur ain sirivu tomania waar ila avozi, leso tipaduduuŋ zi pa laghooŋ, ve titaghon ŋgar toozi.”

¹⁰ Zeran sasaghati, pataŋani naol pale igham zi. Ve yes tau tinumeer Yoova na, i pale loolo isaghav zi ariaaŋ, ve tileep ila poia tooni loolo.

¹¹ Yam zeran tau ataghon ŋgar duduuŋa, lolomim poia ve tintinmim pa poia to Yoova. Yam tau ŋgar poia igheen ariaaŋ ila lolomim na, asov lolomim poia pa Yoova ve ayoor eeza toman aliŋamim tiina!