Mbouŋ to Yes Israela 31:2-19 in Mutu

² Ughur taliŋam pa suŋuuŋ tiou, ve rikia uul ghou! Yom Volaaŋa tiou ariaŋa. Yom uponpoon ghou unumale raŋ to izala kat. Ve unum ruum ariaŋa pa nayooŋ ila lolo. Leso mbeb eta iwaghamun ghou sob, ve naneep pooi.

³ Onoon kat. Yom Volaaŋa tiou ariaŋa. Yom uponpoon ghou unumale raŋ to izala kat. Ve unum ruum ariaŋa pa nayooŋ ila lolo. Umuuŋ payou ve upatooŋ ataam payou, leso upaghazoŋan izam tiina ivot ighazooŋ.

⁴ Ughita liis to koiagŋa tighuri payou, ve upaghau ghou pani. Pasa, yom to unum inag to yoŋgaaŋ.

⁵ Yoova, yom Maaron to utataghon saveeŋ mbuaaŋ tiom. Aazne, you naghur taug ilat nimam. Ugham mulin ghou pa pataŋani tonene.

⁶ You nanumeer Yoova moghon. Tovenen yes to tighurghur mbeb soroksorok tinim maaron padi ve timbesmbees padi, you naghur koi padi.

⁷ You tinig iza ve lolog poia payom. Pasa, lolom ineep tuŋia ila to tamtoghon tiom ve uluul di. Sawa to lolog ipataŋan kat, ve ateg imbumbu, yom ughita pataŋani tiou ve uul ghou.

⁸ Yom upul ghou nala koiagŋa nimadi maau. Yom upas ghou navot pa pataŋani tiou, ve ughur ghou naneep pooi ila ndug ghazooŋa.

⁹ Yoova, you mbesooŋa tiom. Lolom isamin ghou ve uul ghou lak! Pasa aazne, pataŋani tiina igham ghou le lolog ipataŋan. You nataŋ tiina le matag isarsar, ve tapirig isob kat.

¹⁰ Lolog ipataŋan kat ve nayakyak irau sawa isob. Pataŋani tonene pale iŋgoor sawa tiou inim tuku. Igham ghou nayamaan taug naghaze tapirig isob. You nakoŋkoŋ kat le tuag tisob timareer.

¹¹ Koiagŋa tisob tigham ŋalalaŋ payou. Ve yes to tineep tigharau ghou ne paam, tipamogheran di payou. Nditag lolodi pa tinim tigharau ghou maau. Ve yes to tighita ghou izi ataam, timatughez ve tilaagh pa ataam dige ite.

¹² Tamtoghon matadi iŋgal ghou muul maau. Tighita ghou nanimale namaat wa. You nanimale uur to ivavaal, ve tipiyaava ilale.

¹³ You nalooŋ ival tiina tikakamuun payou. Koiagŋa tilup di, ve tikaal ataam pa tirab ghou namaat. Tovenen pataŋani naol tiluvut ghou, le matughezaaŋ tiina igham ghou.

¹⁴ Eemoghon Yoova, you nanumeer ghom. Tauto nasaav payom naghaze: “Yom moghon to Maaron tiou.”

¹⁵ Sawa to naneep izi taan, sa mbeb ma ŋgar to ighaze ivot payou, you naneep ila nimam. Upas ghou ila koiagŋa nimadi, ve upoon ghou pa yes to tighamgham lilin ghou.

¹⁶ You mbesooŋa tiom. Lolom poia payou, ve ugham poian ghou. Yom lolom ineep tuŋia ila to tamtoghon tiom ve uluul di. Tovenen ugham mulin ghou pa pataŋani tonene.

¹⁷ Yoova, you nataŋ roran ghom pa ulaaŋ. Upul koiagŋa titatan ghou malep. Pa vene, tigham ghou mayag. Utatan ndiran samsamia tonowen tapiridi, leso mayadi. Ve upiyaav di tizila ndug to mateeŋa, leso neneeŋadi.

¹⁸ Upoon avodi. Pasa, yes ndiran to kaarom. Tipapait taudi, ve tiveveleg tamtoghon deŋiadi, ve tipiyaav saveeŋ samsamia naol padi.

¹⁹ O Yoova, poia tiom, nene tiina le tiina kat. Yes to timatughez payom, ve titaghon ataam tiom, yom ughur ledi mbeb popoia naol tisasaŋan di. Yes to tinumeer ghom, ve tiyoŋyooŋ ilat tiom, yom pale ugham poian di ila ival tiina matadi.

² Ughur taliŋam pa suŋuuŋ tsiau, ve rekia uul ghau! Yo Uleeŋa tsiau ariaaŋa. Yo uponpoon ghau imin maetaaz tau izala kat. Ve umin ruum ariaaŋa to nayooŋ ila loolo. Leso gabua eta ivaghamun ghau sov, ve naleep poi.

³ Onoon kat. Yo Uleeŋa tsiau ariaaŋa. Yo uponpoon ghau imin maetaaz tau izala kat. Ve umin ruum ariaaŋa to nayooŋ ila loolo. Umuuŋ payau ve utotoi eez payau, leso upaghazoŋai ezam tiina ivot ighazooŋ.

⁴ Ughita liis tau koiagŋa tighuru payau na, ve upasali ghau pani. Pa yo ta umin niag to yoŋgaaŋ.

⁵ Yoova, yo Maaron tau utataghon saveeŋ mbuaaŋ tsio. Aazne, yau naghur taug ila nimam. Ugham mulin ghau pa pataŋani tane.

⁶ Yau nanumeer Yoova mon. Tauvene yes tau tighurghur gabua soroksorok imin maaron pazi ve tibesbees pazi, na yau naghurghur koi pazi.

⁷ Yau tintinig ve lolog poia payo. Pasaa, yo lolom isaghav tamtamon tsio ariaaŋ ve uluul zi. Saawe tau lolog ipataŋan kat, ve ateg ipaparav, yo ughita pataŋani tsiau ve uul ghau.

⁸ Yo upul ghau nala koiagŋa nimazi mako. Yo upas ghau navot pa pataŋani tsiau, ve ughur ghau naleep poia ila nugh ghazooŋa.

⁹ Yoova, yau besooŋa tsio. Lolom isaghatin ghau ve uul ghau lak! Pa aazne, pataŋani tiina igham ghau le lolog ipataŋan. Yau nataŋ tiina le matag isarsar, ve tapirig isov kat.

¹⁰ Lolog ipataŋan kat ve nayakyak irau saawe. Pataŋani tane aat iŋgoor saawe tsiau ilam tuuku. Igham ghau nayamaan taug naghe tapirig isov. Yau nakoŋkoŋ kat le tuag isov peria.

¹¹ Koiagŋa tisov tigham ŋalalaŋ payau. Ve yes tau tileep tigharau ghau ne paam, tipaŋiŋizai ghau. Zetagŋa lolozi pa tilam tigharau ghau mako. Ve yes tau tighit ghau izi eeze na, tiroi ve tilaagh eez ziige ite.

¹² Tamtamon matazi iŋgal ghau muul mako. Tighit ghau imin ta namaat wa. Yau namin uur tau ivavaal ve tisiki ilale.

¹³ Yau nalooŋ eval tiina tivakamunai zi payau. Koiagŋa tilup zi ve tiil eez to tirav ghau namaat. Tauvene pataŋani naol ilivutin ghau le roiŋ tiina igham ghau.

¹⁴ Eemon Yoova, yau nanumeer ghom. Tauta nasaav payo naghe: “Yo mon ta Maaron tsiau.”

¹⁵ Saawe tau naleep izi taan, saa gabua ma ŋgar tau ighe ivot payau, ene yau naleep ila yo nimam. Upas ghau ila koiagŋa nimazi, ve upoon ghau pa yes tau tighamgham lilin ghau ne.

¹⁶ Yau besooŋa tsio. Lolom poia payau ve ugham poghani ghau. Yo lolom isaghav tamtamon tsio ariaaŋ ve uluul zi. Tauvene ugham mulin ghau pa pataŋani tane.

¹⁷ Yoova, yau nataŋ rarai ghom to uul ghau. Upul koiagŋa tiliiv ghau ve tipamayaŋin ghau sov. Utatan zeran sasaghati tawe tapirizi, leso mayazi. Ve usik zi tizila mateegha niazi, leso tineneeŋ.

¹⁸ Upoon avozi. Pa yes zeran to karom. Tipapait tauzi, ve tivevelegh tamtamon duduŋazi, ve tisiksik saveeŋ sasaghati naol pazi.

¹⁹ O Yoova, poia tsio, ene tiina le tiina kat. Yes tau tiroi payo ve titaghon eez tsio na, yo ughur lezi gabua popoia katini isasaŋan zi. Yes tau tinumeer ghom ve tiyoŋyooŋ ilat tsio na, yo pale ugham poghani zi ila eval tiina matazi.