Mbouŋ to Yes Israela 2:1-9 in Mutu

¹ Pughu vena to ndug ndug atedi yabyab ve tighaze tipamundigin malmal? Tamtoghon tikaal ataam pa tigham didiaaŋ pasa? Ŋgar todi irau ighur maau. Tighami sorok.

² Yes kinik to taan tigham aghedi tighaze tigham malmal. Ve yes pooza tilup di, ve tikaal ataam pa tizoor Yoova ŋgar toni ve titatan ŋgeu to ye ighuri inim kinik.

³ Yes tighaze: “Yo! Takuup ravraav toman sen todi to tikau ghiit pani ne, ve tapiyaav di tila. Leso tiŋgin ghiit muul sob.”

⁴ Eemoghon Yoova ineep ila ina to ghamuuŋ pooz izi ndug sambam, ve iŋiŋ padi. Ye mata velegin ŋgar todi.

⁵ Ghoro isaav ariaŋa padi toman ate yabyab. Ate malmal, ve ipamatughezan di. Ighaze:

⁶ “You naghur tamtoghon tiou eez igham naghog ve inim kinik. Ye ineep izi lolooz tiou patabuaŋ Zion, ve ighamgham pooz.”

⁷ Kinik to iit Israela isaav tovene: “You pale navotia saveeŋ to Yoova imbua toman ghou. Ye isaav payou ighaze: ‘You natug yom. Yom tamam to you. Aazne, you naghur ghom pa uraat.

⁸ Ughason ghou, ghoro you nagham ndug ndug tinim lem. Tamtoghon to tineep irau taan dige to naol ne pale tinim lem, ve uŋgin di.

⁹ Pooz tiom pale ariaŋa kat, inimale titi to kinik to tigharaata pa ain. Yom pale urab matin kinik tisob tapiridi. Pale tisami tinimale uur to tirabi le berberia.’”

¹ Puughu mindai ta nugh nugh timbu saveeŋ tighe tipaburigin malmal? Tamtamon tiliil eez to tigham taliiŋzizi pasaa? Ŋgar toozi tawe, tighamu sorok. Irau ighur mako.

² Yes kinik to taan tigham aghezi tighe tigham malmal. Ve yes pooza tilup zi, ve tiil eez to tizoor Yoova ŋgar tooni ve titatan ŋeer tau i ighuru imin kinik.

³ Yes tighe: “Aiyo! Takuup ravraav tomania sen toozi tau tikau ghiit pani ne, ve tasik zi tila. Leso tiŋgin ghiit muul sov.”

⁴ Eemon Yoova, i ileep ila niia to ghamuuŋ pooz izi nugh sambam, ve iŋiŋ pazi. Ve maata veleghin ŋgar toozi.

⁵ Ra isaav ariaaŋ pazi toman aate yavyav, ve iparoi zi toman naagho isaghat.

⁶ Ighe: “Yau naghur tamtamon tsiau ee igham naghog ve imin kinik. I ileep izi loloz tsiau patabuyaaŋ Zion, ve ighamgham pooz.”

⁷ Kinik to iit Israela isaav tauvene: “Yau aat navotia saveeŋ tau Yoova imbua tomani ghau. I isaav payau ighe: ‘Yau natug yo. Yo tamam ta yau. Aazne, yau naghur ghom pa uraat.

⁸ Ughason ghau, o yau nagham nughmariŋ timin lem. Tamtamon tau tileep irau taan ziige ta naol ne pale timin lem, ve uŋgin zi.

⁹ Pooz tsio pale ariaaŋa kat, imin titi to kinik tau tigharaata pa ain na. Yo aat urav matin kinik tisov tapirizi, imin uur tau tiravu le imbiriis ŋanŋania.’”