Mbouŋ to Yes Israela 27:3-14 in Mutu

³ Ighaze ndaaba katindi tinim tiluvut ghou pa tigham malmal, irau lolog imbumbu ve namatughez padi maau. Ighaze malmal imundig, ve koiagŋa tiŋarua ghou tinim, you pale nanumeer Maaron ve nayoon ariaŋa.

⁴ Mbeb ee moghon to you lolog pani kat. Tauto naghaze naghason Yoova pani. Sawa isob to naneep izi taan, you naghaze le naneep toman Yoova ila rumai toni lolo, ve naghita poia toni. You naghaze naneep ila rumai toni lolo, leso naghasoni pa ipatooŋ tau ve ŋgar toni payou.

⁵ Ighaze pataŋani tiina eta ivot payou, ye pale iŋgin ghou naneep pooi ila nima samba. Pale iŋgooz ghou ila rumai toni lolo. Ve ye pale isur ghou nazala raŋ to sala we, leso koiagŋa tigham mbeb eta payou sob.

⁶ Onoon, aazne, koiagŋa tinim tiluvut ghou. Eemoghon namatughez maau. Pasa, Yoova pale iuul ghou ve nalib padi. Tovenen tinig iza, ve nalool ve napait iza. Nagham watooŋrau pani ila rumai toni lolo, ve nambou ve narab gita pa napait iza.

⁷ Yoova, ighaze nataŋ roran ghom pa ulaaŋ, ulooŋ taŋiiz tiou. Lolom isamin ghou ve uul ghou. Pasa, you mbesooŋa tiom.

⁸ Yom usaav payou ughaze: “Unum usuŋ payou, leso napatooŋ taug payom.” Tauto lolog naghaze nalat tiom, ve upatooŋ taum payou.

⁹ You mbesooŋa tiom. Uŋgooz matam payou malep. Atem yabyab ve uzurun ghou malep. Maaron, muuŋ ve inim, yom moghon to Volaaŋa tiou. Tovenen upul ghou, ve upul murim payou malep.

¹⁰ Ighaze tamaŋ ve tinaŋ tipul muridi payou, nene pale Yoova tau igham ghou ve iŋgin ghou.

¹¹ Yoova, upaghazoŋan ghou pa ataam tiom. Umuuŋ payou ve upatooŋ ghou pa ataam deŋia. Pasa, koiagŋa katindi tisasaŋan ghou.

¹² Upul ghou nala nimadi malep! Pasa, yes tiŋgal saveeŋ kaarom naol payou, ve tighamgham saveeŋ matughezaaŋ payou.

¹³ Eemoghon you naghur ila naghaze yes irau tiwaghamun ghou maau. You pale naneep matag iyaryaar, ve naghita poia to Yoova.

¹⁴ Tovenen yom to ughur ila to Yoova, you nasaav payom naghaze: “Unumeer Yoova, ve ughur matam pani. Umatughez malep. Lolom ee moghon, uyoon ariaŋa, ve usaŋan pa ulaaŋ toni.”

³ Isaav ighe zaaba katini tilam tilivutin ghau to tigham malmal, ene irau lolog bubu ve naroi pazi mako. Isaav ighe malmal iburig ve koiagŋa tiŋarui ghau tilam, yau aat nanumeer Maaron ve nayooz ariaaŋ.

⁴ Gabua eemon geeg ta yau lolog pani kat. Tauta naghe naghason Yoova pani. Saawe isov tau naleep izi taan, yau naghe le naleep toman Yoova ila rumei tooni loolo, ve naghita poia tooni. Yau naghe naleep ila rumei tooni loolo, leso naghasoni to itotoi tauu ve ŋgar tooni payau.

⁵ Isaav ighe pataŋani tiina eta ivot payau, i aat iŋgin ghau naleep poi ila niima saamba. I pale iŋgooz ghau ila rumei tooni loolo. Ve i pale isur ghau nazala maetaaz ta saaŋa we, leso koiagŋa tigham gabua eta payau sov.

⁶ Onoon, aazne, koiagŋa timeke tilam tilivutin ghau. Eemon naroi mako. Pasaa, Yoova pale iuul ghau ve naliiv zi. Tauvene nayoor eeza toman tintinig. Nagham watooŋrau pani ila rumei tooni loolo, ve nambou ve narav gita to napait eeza.

⁷ Yoova, ighe nataŋ rarai ghom pa uleeŋ, na ulooŋ taŋiiz tsiau. Lolom isaghatin ghau ve uul ghau. Pa yau besooŋa tsio.

⁸ Yo usaav payau ughe: “Ulam usuŋ payau, leso natotoi taug payo.” Tauta lolog naghe nalat tsio, ve upatooŋ taum payau.

⁹ Yau besooŋa tsio. Uŋgooz naghom payau sov. Atem yavyav ve umbuzir payau sov. Maaron, muuŋ ve ilam, yo mon ta Uleeŋa tsiau. Tauvene upul ghau, ve ughur murim payau sov.

¹⁰ Isaav ighe tamaŋ ve tinaŋ tighur murizi payau, ene pale Yoova tauu igham ghau ve iŋgin ghau.

¹¹ Yoova, upaghazoŋai ghau pa eez tsio. Umuuŋ payau ve utotoi ghau pa eez duduuŋa. Pa koiagŋa katini tisasaŋan ghau.

¹² Upul ghau nala nimazi sov! Pa yes tiŋgalŋgal saveeŋ karom naol payau, ve tighamgham saveeŋ paroiŋ payau.

¹³ Eemon yau naghur ila naghe yes irau tivaghamun ghau mako. Yau aat naleep matag yaryaare, ve naghita poia to Yoova.

¹⁴ Tauvene yo tau ughur ila to Yoova na, yau nasaav payo naghe: “Unumeer Yoova, ve ughur matam pani. Uroi sov. Lolom eemon, uyooz ariaaŋ, ve usaŋan pa uleeŋ tooni.”