Mbouŋ to Yes Israela 25:1-14 in Mutu

¹ O Yoova, naghur taug nalat tiom, ve nasuŋ ghom.

² Maaron tiou, you nanumeer ghom. Upul koiagŋa titatan ghou malep. Pa vene, tipakur di tighaze tilib payou, ve tigham ghou mayag.

³ Tamtoghon tisob to tinaam pa ulaaŋ tiom, yes irau tighur matadi payom sorok ve mayadi ne maau. Eemoghon tamtoghon to tipul muridi payom, yes pale mayadi.

⁴ Yoova, upatooŋ ataam tiom payou. Upaghazoŋan ŋgar tiou pani, leso nataghoni kat.

⁵ Ugham pooz payou, leso laghooŋ tiou deŋia itaghon saveeŋ tiom. Ve upaghazoŋan ghou pa ŋgar tiom. Pasa, yom Maaron tiou ve Volaaŋa tiou. Mboŋmaagh le ravrav izi, you naghurghur matag payom.

⁶ Yoova, muuŋ ve inim, lolom isamin tamtoghon ve uluul di. Ve lolom ineep tuŋia ila to tamtoghon tiom, ve poia tiom izaza todi. Matam iŋgal ŋgar tiom tonanan.

⁷ Sosor ve ŋgar to didiaaŋ to you pain ghou ve naghamgham di, matam iŋgal di malep. Yoova, yom poiam, ve lolom ineep tuŋia ila to tamtoghon tiom ve uluul di itaghon saveeŋ mbuaaŋ tiom. Tovenen matam iŋgal ghou ve uul ghou!

⁸ Yoova ŋgar toni, nene poia ve deŋia moghon. Tovenen ndiran to tiyel pa ŋgar toni, ye ipasaluŋgan di pa ataam toni.

⁹ Ve yes to titatan taudi ve tinumeer Maaron moghon, ye igheghereb di ve ipatooŋ ataam toni padi, leso titaghon ŋgar deŋia.

¹⁰ Yes to matadi kisin saveeŋ mbuaaŋ todi toman Yoova, ve titaghon ataam to ye ighuri pa tamtoghon toni, ye lolo ineep tuŋia ila todi ve iuluul di itaghon saveeŋ mbuaaŋ toni.

¹¹ O Yoova, you nagham sosor naol. Eemoghon izam tiina pa ŋgar tiom to lolom isasamin yei tamtoghon. Tovenen ureu sosor tiou.

¹² Tamtoghon tisob to timatughez pa Yoova ve tighaze titaghon ŋgar toni, ye pale ipatooŋ di pa ataam. Leso tiwatag sa ataam to yes irau titaghoni.

¹³ Ndiran tovene, nepooŋadi pale poia kat. Ve ndinatudi paam, pale tineep pooi izi taan to Yoova igham pa tamtoghon toni.

¹⁴ Yes to timatughez pa Yoova ve titaghon ŋgar toni, tinim ndita kat. Tovenen ye ivovotia ŋgar toni yoŋgaaŋ padi, ve ipatooŋ di pa ataam to yesŋa tilup di tinim ee moghon itaghon saveeŋ mbuaaŋ toni.

¹ Mbouŋ to David O Yoova, naghur taug nalat tsio, ve nasuŋ payo.

² Maaron tsiau, yau nanumeer ghom. Upul koiagŋa titatan ghau sov. Pale tipakur zi tighe tiliiv ghau, ve tigham ghau mayag.

³ Tamtamon tisov tau tisaŋan ghom pa uleeŋ na, irau tighur matazi payo sorok ve mayazi ne mako. Eemon yes tau tighur murizi payo na, yes pale mayazi.

⁴ Yoova, utotoi eez tsio payau. Upaghazoŋai ŋgar tsiau pani, leso nataghon duduŋaini.

⁵ Ugham pooz payau, leso laghooŋ tsiau iduduuŋ pa saveeŋ tsio. Ve upaghazoŋai ghau pa ŋgar tsio. Pasaa, yo Maaron tsiau ve Uleeŋa tsiau. Mboŋoozo ila le ravrav izi, yau naghurghur matag payo.

⁶ Yoova, muuŋ ve ilam, yo lolom isaghatin tamtamon ve uluul zi. Ve lolom isaghav tamtamon tsio ariaaŋ ve poia tsio izazaa toozi. Matam iŋgal ŋgar tsio tana.

⁷ Sosor ve ŋgar to taliiŋzizi tau yau kukuag ve naghamgham zi na, matam iŋgal zi sov. Yoova, yo poiam, ve lolom isaghav tamtamon tsio ariaaŋ ve uluul zi itaghon saveeŋ mbuaaŋ tsio. Tauvene matam iŋgal ghau ve uul ghau!

⁸ Yoova ŋgar tooni, ene poia ve iduduuŋ mon. Tauvene zeran tau tisapir pa ŋgar tooni na, i ipapaduduuŋ zi pa eez tooni.

⁹ Ve yes tau titatan tauzi ve tinumeer Maaron mon na, i ighegherev zi ve itotoi eez tooni pazi, leso titaghon ŋgar duduuŋa.

¹⁰ Yes tau matazi kisin saveeŋ mbuaaŋ toozi tomania Yoova, ve titaghon eez tau i ighuru pa tamtamon tooni na, i loolo isaghav zi ariaaŋ ve iuluul zi itaghon saveeŋ mbuaaŋ tooni.

¹¹ O Yoova, yau nagham sosor katini kat. Eemon yo ezam tiina pa ŋgar tsio tau lolom isasaghatin yei tamtamon. Tauvene ureu sosor tsiau.

¹² Tamtamon tisov tau tiroi pa Yoova ve tighe titaghon ŋgar tooni na, i pale itotoi eez pazi. Leso tiwatagh eez sindei tau yes aat titaghoni.

¹³ Zeran tauvene, lepoogh toozi pale poia kat. Ve natuzŋa paam, pale tileep poia izi taan tau Yoova igham pa tamtamon tooni.

¹⁴ Yes tau tiroi pa Yoova ve titaghon ŋgar tooni na, timin i zeetŋa duduuŋ. Tauvene i ivovotia ŋgar tooni yoŋgaaŋa pazi, ve ipaghazoŋai zi pa eez to yesŋa tivalupu zi timin eemon itaghon saveeŋ mbuaaŋ tooni.