1 O Yoova, naghur taug nalat tiom, ve nasuŋ ghom.
2 Maaron tiou, you nanumeer ghom. Upul koiagŋa titatan ghou malep. Pa vene, tipakur di tighaze tilib payou, ve tigham ghou mayag.
3 Tamtoghon tisob to tinaam pa ulaaŋ tiom, yes irau tighur matadi payom sorok ve mayadi ne maau. Eemoghon tamtoghon to tipul muridi payom, yes pale mayadi.
4 Yoova, upatooŋ ataam tiom payou. Upaghazoŋan ŋgar tiou pani, leso nataghoni kat.
5 Ugham pooz payou, leso laghooŋ tiou deŋia itaghon saveeŋ tiom. Ve upaghazoŋan ghou pa ŋgar tiom. Pasa, yom Maaron tiou ve Volaaŋa tiou. Mboŋmaagh le ravrav izi, you naghurghur matag payom.
6 Yoova, muuŋ ve inim, lolom isamin tamtoghon ve uluul di. Ve lolom ineep tuŋia ila to tamtoghon tiom, ve poia tiom izaza todi. Matam iŋgal ŋgar tiom tonanan.
7 Sosor ve ŋgar to didiaaŋ to you pain ghou ve naghamgham di, matam iŋgal di malep. Yoova, yom poiam, ve lolom ineep tuŋia ila to tamtoghon tiom ve uluul di itaghon saveeŋ mbuaaŋ tiom. Tovenen matam iŋgal ghou ve uul ghou!
8 Yoova ŋgar toni, nene poia ve deŋia moghon. Tovenen ndiran to tiyel pa ŋgar toni, ye ipasaluŋgan di pa ataam toni.
9 Ve yes to titatan taudi ve tinumeer Maaron moghon, ye igheghereb di ve ipatooŋ ataam toni padi, leso titaghon ŋgar deŋia.
10 Yes to matadi kisin saveeŋ mbuaaŋ todi toman Yoova, ve titaghon ataam to ye ighuri pa tamtoghon toni, ye lolo ineep tuŋia ila todi ve iuluul di itaghon saveeŋ mbuaaŋ toni.
11 O Yoova, you nagham sosor naol. Eemoghon izam tiina pa ŋgar tiom to lolom isasamin yei tamtoghon. Tovenen ureu sosor tiou.
12 Tamtoghon tisob to timatughez pa Yoova ve tighaze titaghon ŋgar toni, ye pale ipatooŋ di pa ataam. Leso tiwatag sa ataam to yes irau titaghoni.
13 Ndiran tovene, nepooŋadi pale poia kat. Ve ndinatudi paam, pale tineep pooi izi taan to Yoova igham pa tamtoghon toni.
14 Yes to timatughez pa Yoova ve titaghon ŋgar toni, tinim ndita kat. Tovenen ye ivovotia ŋgar toni yoŋgaaŋ padi, ve ipatooŋ di pa ataam to yesŋa tilup di tinim ee moghon itaghon saveeŋ mbuaaŋ toni.