Mbouŋ to Yes Israela 22:10-27 in Mutu

¹⁰ Sawa to tinaŋ ipoop ghou, tighur ghou nalat nanim lem, leso uŋgin ghou. Tauto sawa tonowen ve inim, you nanumeer ghom naghaze yom Maaron tiou.

¹¹ Tovenen uneep saguan payou malep. Pasa aazne, pataŋani tiina ighaze ivot payou. Ve leg tamtoghon eta to iuul ghou maau.

¹² Ughita. Koiagŋa katindi tinim tiluvut ghou. Tapiridi tintina tinimale makau nditamoot to Basan to bide tapiridi.

¹³ Yes tinimale laion to tikakaak avodi ve livodi imasis iŋarua ghou. Ve lolodi ŋuria tighaze tisaas ghou ve tighan ghou.

¹⁴ Tovenen tapirig isob kat, nanimale ya to ineep ila uur lolo ve tiliŋi ilale. Tuag tisob goloŋia. Tovenen nayamaan taug naghaze irau nagham mbeb eta maau. Ve matughezaaŋ tiina igham ghou, ve lolog imbumbu naghaze paam namaat.

¹⁵ Ŋgarsuag imamaas ve irau natoon ŋazubag maau. Yom upul ghou nagheen izala ghavuur, ve paam namaat.

¹⁶ Koiagŋa katindi tinim tiluvut ghou tinimale ŋgavuun ketooŋ, ve timorau agheg ve nimag.

¹⁷ Ve tuag tisob timareer. Tovenen koiagŋa tiyoon ve timbatut ghou, ve lolodi poia kat. Pasa, nasami wa.

¹⁸ Yes tighaze pa namaat wa. Tauto tighaze tirei nonogiiŋa tiou toman mbeb tiou pida irau di. Tovenen tiŋgozŋgooz, leso tighita sei to pale igham sa mbeb.

¹⁹ Yoova, uneep saguan payou malep. Ulaaŋa tiou, unum rikia ve uul ghou!

²⁰ Upoon ghou pa buza to mateeŋ. Upaghau ghou pa ŋgavuun samsamia tonene. Pa vene, tiwaghamun ghou.

²¹ Ugham mulin ghou ila laion tonene avo, ve upaghau ghou pa makau sagsagŋa tonene ndoŋadi. Aa, ghara naghita naghaze yom ulooŋ ghou!

²² Tovenen you pale navotia mbeb to ugham payou ne pa nditag. Sawa to tamtoghon tiom tilup di pa suŋuuŋ, you pale nala toman di, ve napait izam.

²³ Yam to amatughez pa Yoova ve ataghon ŋgar toni, apaiti. Yam siŋ to Yakop, apait Yoova iza pa tapiri ve poia toni. Yam Israela asob, aroron ve amatughez pani.

²⁴ Pasa, yes to timbadbaad pataŋani ve tighur matadi pa Yoova, ye irau ighita pataŋani todi inimale mbeb sorok ne maau. Pale iuul di. Irau iveleg di, ma ipul muri padi ne maau. Tovenen sawa to titaŋ rorani pa ledi ulaaŋ, ye pale ilooŋ taŋiiz todi ve iuul di.

²⁵ Yoova, ighaze tamtoghon tiom tilup di pa suŋuuŋ tiina, you pale nalool ve napait izam ila matadi, ve napakur ghom pa ŋgar to ugham payou. You pale nataghon saveeŋ mbuaaŋ tiou, ve nagham watooŋrau payom ila yes to timatughez payom ve titaghon ŋgar tiom ne matadi.

²⁶ Watooŋrau to nagham pa napait Yoova, yes mbolaaŋa pale tighan pida le apodi isuŋ. Ve yes to tizuaria di pa Yoova, pale tipaiti. Ye tau pale igham poian di, ve tineep pooi itaghoni taghoni gha ila.

²⁷ Tamtoghon irau taan dige to naol ne, pale matadi iŋgal Yoova, ve titoor ŋgar todi imuul ila pani. Ndug naol pale tisob tiput aghedi pani ve tipaiti.

¹⁰ Saawe tau tinaŋ ipoop ghau, tighur ghau nalat namin yo lem, leso uŋgin ghau. Tauta saawe tawe ve ilam, yau nanumeer ghom naghe yo Maaron tsiau.

¹¹ Tauvene uleep soghan payau sov. Pa aazne, pataŋani tiina ighe ivot payau. Ve leg tamtamon eta to iuul ghau mako.

¹² Ughita. Koiagŋa katini tilam tilivutin ghau. Tapirizi tiina imin makau zitamoot to Basan tau bide tapirizi na.

¹³ Yes timin laion tau tikakaak avozi ve livozi imasis ilam payau. Ve lolozi ŋuria tighe tiraŋgat ghau ve tighan ghau.

¹⁴ Tauvene tapirig isov kat, imin yaa tau igheen ila uur loolo ve tiliŋi ilale. Tuag tisov goloŋia. Tauvene nayamaan taug naghe irau nagham gabua eta mako. Ve roiŋ tiina igham ghau ve lolog imin waar mbuaaŋ. Naghe paita namaat tane.

¹⁵ Ŋgarsuag igorgor kat. Yo upul ghau ve nagheen ila ŋgaupup loolo ve naghe paita namaat tane.

¹⁶ Koiagŋa katini tilam tilivutin ghau imin ŋgavuun umbaal ve tivaraŋgatin agheg ma nimag.

¹⁷ Ve tuag isov peria. Tauvene koiagŋa tiyooz ve timarar ghau, ve lolozi poia kat. Pasaa, nasaghat wa.

¹⁸ Yes tighe pa namaat wa. Tauta tighe tivalagh nonoghiiŋa tsiau tomania gabua tsiau siriv irau zi. Tauvene tipayooz mbuur, leso tighita sei ta pale igham saa gabua.

¹⁹ Yoova, uleep soghan payau sov. Uleeŋa tsiau, ulam rekia ve uul ghau!

²⁰ Upoon ghau pa mbuzaagh to mateegh. Upaghau ghau pa ŋgavuun sasaghati tane. Mako pale tivaghamun ghau.

²¹ Ugham mulin ghau pa laion tane aavo, ve upasali ghau pa makau sagsagŋa tane zoŋazi. Aa, ŋgarig gha naghita naghe yo ulooŋ ghau!

²² Tauvene yau aat navotia gabua tau yo ugham payau ne pa zetagŋa. Saawe tau tamtamon tsio tilup zi pa suŋuuŋ, yau aat nala tomani zi ve nayoor ezam.

²³ Yam tau aroi pa Yoova ve ataghon ŋgar tooni na, apakuru. Yam siŋ to Yakop, apait Yoova eeza pa tapiri ve poia tooni. Yam Israela asov, aroron ve aroi pani.

²⁴ Pa yes tau tibadbaad pataŋani ve tighur matazi pa Yoova na, i irau ighita pataŋani toozi imin kaut sorok ne mako. Pale iuul zi. Irau ivelegh zi, ma ighur muuri pazi ne mako. Tauvene saawe tau titaŋ raraini pa lezi uleeŋ, i aat ilooŋ taŋiiz toozi ve iuul zi.

²⁵ Yoova, isaav ighe tamtamon tsio tilup zi pa suŋuuŋ tiina, yau aat nayoor ezam ila naghozi, ve napait ghom pa ŋgar tau yo ugham payau na. Yau pale nataghon saveeŋ mbuaaŋ tsiau, ve nagham watooŋrau payo ila yes tau tiroi payo ve titaghon ŋgar tsio na matazi.

²⁶ Watooŋrau tau nagham pa paitooŋ Yoova na, yes mbolaaŋa pale tighan sirivu, le apozi isuŋ. Ve yes tau tizuari zi pa Yoova na, pale tipaiti. I tauu pale igham poghani zi ve tileep poia taghon taghon gha ila.

²⁷ Tamtamon irau taan ziige ta naol ne pale matazi iŋgal Yoova, ve titoor ŋgar toozi imuul ila pani. Nughmariŋ pale tisov tiput aghezi pani ve tipaiti.