Mbouŋ to Yes Israela 21:1-7 in Mutu

¹ O Yoova, kinik tiei lolo poia kat. Pasa, yom upaloti pa taum tapirim. Yom uuli pa malmal le ilib pa koia. Tauto tini iza kat.

² Mbeb to ye lolo pani ve ighason ghom pani, yom uŋguruuta maau. Yom ugham pani wa.

³ Yom ula uvot toni, ve upakuri pa mbeb popoia naol. Ve ughur moghar ndamooda milmilia izala daba. Moghar tonowen, tigharaata pa gol to poia kat.

⁴ Ye ighason ghom pa uŋgin poiani ila sawa to malmal, leso imaat sob, ve ineep pooi itaghoni taghoni gha ila. Ve yom ulooŋ suŋuuŋ toni.

⁵ Yom uuli le ilib pa malmal, tauto iza ivot inim tiina. Ve upambooda pa tapirim ve poia tiom. Tauto varu ilaan irau ndug ndug, ve tamtoghon tipaiti tighaze ye iza tiina kat.

⁶ Onoon kat, poia tiom pale izaza toni itaghoni taghoni gha ila. Ve yom uneep tomani. Tauto lolo poia le poia kat.

⁷ Kinik tiei inumeer Yoova. Tovenen mbeb eta irau ighami itap ne maau. Pasa, Maaron Tiina To Ilib Pa Ndimaronŋa Tisob Ne, lolo ineep tuŋia ila toni, ve iuluuli itaghon saveeŋ mbuaaŋ toni.

¹ Mbouŋ to David O Yoova, kinik tsiei loolo poia kat. Pasaa, yo upaloti pa taum tapirim. Yo uule pa malmal le iliiv koiŋa. Tauta tintini kat.

² Gabua tau i loolo pani ve ighason ghom pani na, yo uŋguruuta mako. Yo ugham pani wa.

³ Yo ula uvot tooni, ve upakuru pa gabua popoia naol. Ve ughur moghar ndamoonda milmilia izala daaba. Moghar tawe, tigharaata pa gol tau poia kat.

⁴ I ighason ghom to uŋgini poi ila saawe to malmal, leso imaat sov, ve ileep poia taghon taghon gha ila. Ve yo ulooŋ suŋuuŋ tooni.

⁵ Yo uule gha iliiv malmal, tauta eeza ivot imin tiina. Ve upaboode pa tapirim ve poia tsio. Tauta vaaru ilaan irau nugh nugh, ve tamtamon tipaiti tighe i eeza tiina kat.

⁶ Onoon kat, poia tsio pale izazaa tooni taghon taghon gha ila. Ve yo uleep tomania. Tauta loolo poia le poia kat.

⁷ Kinik tsiei inumeer Yoova. Tauvene gabua eta irau ighamu itap ne mako. Pasaa, Maaron Tiina Tau Iliiv Zimaronŋa Tisov na, loolo isaghavu ariaaŋ, ve iuluule itaghon saveeŋ mbuaaŋ tooni.