Mbouŋ to Yes Israela 19:5-14 in Mutu

⁵ Ndag pusukia iza inimale ŋgeu to ivai paghu, ve ipul ruum toni ve ivot toman tini iza. Ve inimale tamtoghon to landooŋ to igharaat tau leso ilaan toman lolo poia.

⁶ Ndag iza pa taan dige eez, ve ila ilib pa dige ite. Ve mbeb eta irau iyooŋ pa mata ne maau.

⁷ Saveeŋ isob to Yoova igham pait, nene poia kat ve deŋia moghon. Ve ipariaaŋ ghiit ve igham tapiriid ivot muul. Ataam to Yoova ighuri pa tamtoghon toni, ineep tuŋia tovene. Irau itoora muul maau. Ve ipatooŋ yes to ledi ŋgar tiina maau ne, le ŋgar todi ivot.

⁸ Tutuuŋ to Yoova ighur di, nene deŋiadi moghon, ve tigham ghiit lolood poia kat. Tutuuŋ to Yoova inim ghazooŋa pait, ve igham ghiit taghilaal.

⁹ Ŋgar to tamatughez pa Yoova ve tataghon ŋgar toni, nene poia. Ŋgar tovene iŋgalaaŋ ila ye mata, ve ineep tovene itaghoni taghoni gha ila. Ve gabizooŋ to Yoova, nene deŋia ve onoon moghon.

¹⁰ Tamtoghon tighita yaam gol tighaze nene mbeb tiina, ve lolodi pani. Eemoghon Yoova saveeŋ toni ilib kat pa gol katindi to ŋgalaŋadi ne. Ve bagil suru tovene paam, poia ve poiawaat ila avood. Eemoghon Yoova saveeŋ toni, nene poia kat le ilib pa bagil suru.

¹¹ Yoova, you mbesooŋa tiom. Saveeŋ tiom ipaghau ghou pa pataŋani naol. Yes to titaghon saveeŋ tiom, nene pale tigham ledi atia tiina.

¹² Sei irau ighilaal sosor toni le isob? Maau. O Yoova, sosor naol to naghilaal di maau ve nagham di, lolom isamin ghou ve upul di.

¹³ You mbesooŋa tiom. Sosor to naghilaal di, upaghau ghou padi. Lolog pa ŋgar tovene igham pooz payou malep. Leso nagham sosor tiina eta sob, ve ŋgar tiou deŋia ila matam.

¹⁴ Tovenen you naghaze le saveeŋ to ivot ila avog, ve ŋgar to ineep ila lolog, isob deŋia ila matam, ve igham ghom lolom poia. O Yoova, yom Volaaŋa tiou ve uponpoon ghou unumale yaam tiina.

⁵ Aaz pisikia izaa imin ŋeer tau ivai paaghu, ve ipul ruum tooni ve ivot toman tintini. Ve imin tamtamon to landooŋ tau igharaat ghi to ilaan toman loolo poia.

⁶ Aaz izaa pa taan ziige ee, ve imalaaŋ ila izi pa ziige ite. Ve gabua eta irau iyooŋ pa maata ne mako.

⁷ Saveeŋ isov tau Yoova igham pait, ene poia kat ve iduduuŋ mon. Ve ipariaaŋ ghiit ve igham tapiriin ivot muul. Eez tau Yoova ighuru pa tamtamon tooni na, igheen tuŋia tauvene. Irau itoora muul mako. Ve ipaghazoŋai yes tau lezi ŋgar tiina mako na, le ŋgar toozi ivot.

⁸ Tutuuŋ naol tau Yoova ighur zi pait, ene duduŋazi mon, ve tigham ghiit loloon poia kat. Tutuuŋ to Yoova imin ghazooŋa pait, ve igham ghiit taghilaal.

⁹ Ŋgar to taroi pa Yoova ve tataghon ŋgar tooni, ene poia. Ŋgar tauvene, ene iŋgalaaŋ ila i maata, ve igheen tauvene taghon taghon gha ila. Ve gabizooŋ to Yoova, ene iduduuŋ ve onoon mon.

¹⁰ Tamtamon tighita maet gol tighe ene gabua tiina, ve lolozi pani. Eemon Yoova saveeŋ tooni iliiv kat pa gol katini tau ŋgalaŋazi na. Ve tok suuru tauvene paam, poia ve imonmoon ila avoon. Eemon Yoova saveeŋ tooni, ene poia kat le iliiv tok suuru.

¹¹ Yoova, yau besooŋa tsio. Saveeŋ tsio ipaghau ghau pa pataŋani naol. Yes tau titaghon saveeŋ tsio, ene aat tigham lezi atuya tiina.

¹² Sei irau ighilaal sosor tooni isov? Mako. O Yoova, sosor naol tau naghilaal zi mako ve nagham zi na, lolom isaghatin ghau ve upul zi.

¹³ Yau besooŋa tsio. Sosor tau naghilaal zi na, upaghau ghau pazi. Pa lolog pa ŋgar tauvene igham pooz payau mako. Leso nagham sosor tiina eta sov, ve ŋgar tsiau iduduuŋ ila yo matam.

¹⁴ Tauvene yau naghe le saveeŋ tau ivot ila avog, ve ŋgar tau igheen ila lolog ne, isov iduduuŋ ila yo matam, ve igham ghom lolom poia. O Yoova, yo Uleeŋa tsiau ve uponpoon ghau imin maet tiina.