Mbouŋ to Yes Israela 18:20-46 in Mutu

²⁰ You nataghon ŋgar to deŋia ila Yoova mata. Tauto ye lolo payou ve igham poian ghou. Nimag isosor pa mbeb eta maau. Tauto ye igham leg atia poia.

²¹ Pasa, moghon moghon, you nataghon ataam to Yoova. Irau nagham ŋgar samia ve napul murig pa Maaron tiou ne maau.

²² Pasa, matag kisin tutuuŋ toni tisob. Tutuuŋ toni to tineep pataghaaŋ, you napul murig padi maau.

²³ Tauto leg sosor eta ila mata maau. You naŋgin poian taug, tauto nagham mbeb eta isosor maau.

²⁴ You naghamgham ŋgar deŋia ve ŋgar ŋgalaaŋa moghon ila Yoova mata. Tauto ye lolo payou ve igham leg atia poia.

²⁵ Yoova, ighaze tamtoghon eta lolo ineep tuŋia ilat tiom ve itaghon ataam tiom, nene pale lolom ineep tuŋia ila toni paam ve uuli irau sawa isob. Tamtoghon to ighaze le sosor eta maau ve ŋgar toni isob popoia moghon, nene pale yom upamuul ŋgar poia pani paam.

²⁶ Ve ighaze ŋgeu eta ighamgham ŋgar ŋgalaaŋa moghon, nene pale yom paam ugham ŋgar ŋgalaaŋa pani. Eemoghon yes to ledi ŋgar tiina pa ghamuuŋ kaarom ve ŋgar samia, yom lem ataam naol pa uyat ŋgar todi tonowen.

²⁷ Tamtoghon to titatan taudi, yom ughamgham mulin di pa pataŋani todi. Eemoghon yes to tipapait taudi ve tiveleg ghom, yom utatan di tizi tinim mbeb sorok.

²⁸ Yoova, Maaron tiou, yom ugham ghazooŋa tiom isul ghou, ve undiir ndoroom ighau payou, leso naneep pooi.

²⁹ Yom upapalot ghou. Tauto you irau naparab toman koiagŋa le nalib padi. Maaron tiou inepneep toman ghou. Tovenen you irau nayatov ghou le namalaaŋ pa didiiŋ ariaŋa to iluvut koiagŋa ndug todi, ve nalooŋ nala.

³⁰ Ataam to Maaron, nene poia le poia kat. Ve saveeŋ toni, nene onoon moghon. Irau taghur ila kat. Tamtoghon tisob to tiyooŋ ila toni, ye inim sigeu padi.

³¹ Yoova moghon to Maaron tau. Ite paam maau. Ye moghon to iponpoon ghiit inimale yaam tiina.

³² Ye ipapalot ghou pa tau tapiri, tauto nayoon ariaŋa. Ve ye iŋgin ghou pa laghooŋ tiou, ve ipatooŋ ataam payou.

³³ Ye igham agheg tuŋia ila taan, ve nalaan ariaŋa nanimale mekmek sagsag. Tovenen sawa to nalaagh ila ndug sapsapi, irau agheg kirikia ve natap maau.

³⁴ Ye ipatooŋ ghou pa ŋgar to ghamuuŋ malmal, ve ipalot nimag. Tauto you irau nandaad pane ariaŋa to tigharaata pa mbaras.

³⁵ Yoova, yom unum sigeu payou, ve ugham mulin ghou ila koiagŋa nimadi. Ve nimam waan, tauto ipapalot ghou. Yom uluul ghou, tauto izag inim tiina.

³⁶ Yom ugharaat poian agheg ina. Tauto agheg kirikia maau, ve nayoon tuŋia pa malmal.

³⁷ You nalaan taghon koiagŋa nala le navot todi. Ve narab di tisob timatmaat. Eta ineep muul maau.

³⁸ You narab di le tisob titaptap tizi agheg pughu. Eta irau imundig muul pa igham malmal payou ne maau.

³⁹ Pasa, yom upapalot ghou pa taum tapirim. Tauto nayoon ariaŋa pa malmal. Yom ughur koiagŋa tinim nimag ve nalib padi.

⁴⁰ Yom ugham di titoor di, ve tighau tila. Yes to tighur koi payou ne, you napasob di le tisob kat.

⁴¹ Yes tipoi pa ulaaŋ. Eemoghon eta iuul di maau. Taŋiiz todi iŋarua Yoova paam. Eemoghon ye ilooŋ di maau.

⁴² You narab mbirisan di, le tinim ghavuur to yaghur iviviira gha ilale. Ve navazag di tinimale tiiŋ to ineep ila ataam.

⁴³ Sawa to tamtoghon timundig ve tizoor aliŋag, yom uvool tiou, ve ugham mulin ghou ila nimadi. Ve ughur ghou nanim daba pa ndug ndug. Tamtoghon to taan pida to you nawatag di maau, aazne tineep ila sambag, ve timbesmbees payou.

⁴⁴ Ighaze tilooŋ aliŋag, nene rikia moghon ve titaghoni. Ndug ndug tinim ve tiput aghedi payou toman matughezaaŋ tiina.

⁴⁵ Pasa, tighilaal tighaze tirau mbeb eta maau. Tauto matughezaaŋ tiina igham di, ve tipul ruum todi ariaŋadi to tiyoŋyooŋ ila lolodi, ve tinim tiou.

⁴⁶ Onoon kat, Yoova inepneep! Ye iponpoon ghou inimale yaam tiina. Ye Volaaŋa tiou. Tovenen you napakuri ve napait iza.

²⁰ Yau nataghon ŋgar tau iduduuŋ ila Yoova maata. Tauta i loolo payau ve igham poghani ghau. Nimag igham sosor eta mako. Tauta i igham leg atuya poia.

²¹ Pasaa, saawe isov, yau nataghon eez to Yoova. Irau nagham ŋgar saghati ve naghur murig pa Maaron tsiau ne mako.

²² Pasaa, matag kisin tutuuŋ tooni tisov. Tutuuŋ tooni tau tigheen pataghaaŋ na, naghur murig pazi mako.

²³ Tauta leg sosor eta ila i maata mako. Yau naŋgin taug poi, tauta nagham gabua eta isosor mako.

²⁴ Yau naghamgham ŋgar duduuŋa ve ŋgar ŋgalaaŋa mon ila Yoova maata. Tauta i loolo payau ve igham leg atuya poia.

²⁵ Yoova, isaav ighe tamtamon eta loolo isaghav ghom ariaaŋ ve itaghon eez tsio, yo pale lolom isaghavu paam ve uule irau saawe. Tamtamon tau ighe le sosor eta mako ve ŋgar tooni isov popoia mon, ene pale yo upamuul ŋgar poia pani paam.

²⁶ Ve isaav ighe ŋeer eta ighamgham ŋgar ŋgalaaŋa mon, ene pale yo paam ugham ŋgar ŋgalaaŋa pani. Eemon yes tau lezi ŋgar tiina pa ghamuuŋ karom ve ŋgar saghati, na yo lem eez naol to uyat ŋgar toozi tawe.

²⁷ Tamtamon tau titatan tauzi na, yo ughamgham mulin zi pa pataŋani toozi. Eemon yes tau tipapait tauzi ve tivelegh ghom na, yo utatan zi tizi timin kaut sorok.

²⁸ Yoova, Maaron tsiau, yo ugham ghazooŋa tsio isul ghau, ve uziir ndoroom ighau payau, leso naleep poi.

²⁹ Yo upapalot ghau. Tauta yau irau naparav tomania koiagŋa le naliiv zi. Maaron tsiau ilepleep tomani ghau. Tauvene yau irau nayaat maloŋon didiiŋ ariaaŋa tau ilivut koiagŋa nugh toozi, ve naloŋ nala.

³⁰ Maaron eez tooni, ene poia le poia kat. Ve saveeŋ tooni, ene onoon mon. Irau taghur ila kat. Tamtamon tisov tau tiyooŋ ila tooni na, i imin sigheu pazi.

³¹ Yoova mon ta Maaron tauu. Ite paam mako. I mon ta iponpoon ghiit imin maet tiina.

³² I ipapalot ghau pa tauu tapiri, tauta nayooz tuŋia. Ve i iŋginŋgin ghau pa laghooŋ tsiau, ve itotoi eez payau.

³³ I igham agheg tuŋia ila taan, ve nalaan ariaaŋ imin mekmek sagsag. Tauvene saawe tau nalaagh ila nugh sapsapu, irau agheg pusukia ve natap mako.

³⁴ I itotoi ŋgar to ghamuuŋ malmal payau, ve ipalot nimag. Tauta yau irau nadaad paneegh ariaaŋa tau tigharaata pa mbaras.

³⁵ Yoova, yo umin sigheu payau, ve ugham mulin ghau ila koiagŋa nimazi. Ve nimam tapir, tauta ipapalot ghau. Yo uluul ghau, tauta ezag imin tiina.

³⁶ Yo ugharaat poghania agheg niia. Tauta agheg pusukia mako, ve nayooz tuŋia pa ghamuuŋ malmal.

³⁷ Yau nalaan taghon koiagŋa nala le nazaa toozi. Ve naravuur zi le tisov kat. Eta ileep muul mako.

³⁸ Yau narav zi le tisov titaptap tizi agheg puughu. Eta irau iburig muul to igham malmal payau ne mako.

³⁹ Pasaa, yo upapalot ghau pa taum tapirim. Tauta nayooz ariaaŋ pa malmal. Yo ughur koiagŋa tila nimag ve naliiv zi.

⁴⁰ Yo ugham zi titoor zi, ve tighau tila. Yes tau tighur koi payau ne, yau napasov zi le tisov kat.

⁴¹ Yes tipoi pa uleeŋ. Eemon eta iuul zi mako. Taŋiiz toozi iŋarui Yoova paam. Eemon i ilooŋ zi mako.

⁴² Yau narav mbirisai zi, le timin ŋgaupup tau yaghur ivuvuura gha ilale. Ve navaghaaz zi imin tiiŋ tau igheen ila eeze.

⁴³ Saawe tau tamtamon tiburig ve tizoor aliŋag, yo uvool tsiau, ve ugham mulin ghau ila nimazi. Ve ughur ghau namin daaba pa nugh nugh. Tamtamon to taan siriv tau yau nawatagh zi mako na, aazne tileep ila sambag ve tibesbees payau.

⁴⁴ Ighe tilooŋ aliŋag, ene rekia mon ve titaghoni. Nugh nugh tilam ve tiput aghezi payau toman roiŋ tiina.

⁴⁵ Pasaa, tighilaal tighe tirau gabua eta mako. Tauvene roiŋ tiina igham zi, ve tipul ruum toozi ariaŋazi tau tiyoŋyooŋ ila lolozi na, ve tilam tsiau.

⁴⁶ Onoon kat, Yoova ilepleep! I iponpoon ghau imin maet tiina. I Uleeŋa tsiau. Tauvene yau napakuru ve napait eeza.