Mbouŋ to Yes Israela 18:10-32 in Mutu

¹⁰ Ye ineep izala aŋela toni ariaŋa ndimo, ve iroov inim, inimale yaghur to le bage imbaada ve iroov inim.

¹¹ Ye ipoon tau pa ndoroom, leso inim le ina to yoŋgaaŋ. Yaghur tae asosooŋa ikaui, ve iŋgooz tau ila lolo.

¹² Ye ineep tonowe toman ŋguruba tiina, ve igham ndug milia. Tauto lalaav kiliŋkiliŋia izi, ve ais patu patu toman yab ŋgiliŋi titaptap tizi pa taan.

¹³ Yoova ineep izi sambam, ve isaav toman aliŋa tiina kat, inimale lalaav avolutu. Maaron Tiina To Ilib Pa Ndimaronŋa Tisob Ne aliŋa ivot. Ve yab ŋgiliŋi toman ais patu patu titaptap tizi.

¹⁴ Ye igham lalaav iŋgal koia inimale pane natu toni. Tauto matughezaaŋ tiina igham di, ve tiwaghaughau.

¹⁵ Yoova, sawa to upatooŋ mbalmbali tiom padi, yaghur tiina ivot pa uzum, ve iviviir te ila saguan, le magargaar ivot ighazooŋ. Ve taan pughu to ineep izila sila kat ne ivot peria. Mbeb eta ipoona muul maau.

¹⁶ Ghoro Yoova ineep sala, ve izuzuun nima izi inim ikis ghou, ve indae ghou naza pa mazovan bibiliiŋa lolo.

¹⁷ Koiagŋa tapiridi tintina, ve you narau di maau. Yes tighur koi payou kat. Eemoghon Yoova iuul ghou, ve ipas ghou ila nimadi.

¹⁸ Sawa to naneep ila pataŋani lolo, yes tipamundigin malmal payou. Eemoghon Yoova ipoon ghou ve ipalot ghou.

¹⁹ Ye ipas ghou navot pa pataŋani tiou, ve ighur ghou nala naneep izi ndug poia. Pasa, ye lolo payou kat. Tauto igham mulin ghou ve naneep pooi.

²⁰ You nataghon ŋgar to deŋia ila Yoova mata. Tauto ye lolo payou ve igham poian ghou. Nimag isosor pa mbeb eta maau. Tauto ye igham leg atia poia.

²¹ Pasa, moghon moghon, you nataghon ataam to Yoova. Irau nagham ŋgar samia ve napul murig pa Maaron tiou ne maau.

²² Pasa, matag kisin tutuuŋ toni tisob. Tutuuŋ toni to tineep pataghaaŋ, you napul murig padi maau.

²³ Tauto leg sosor eta ila mata maau. You naŋgin poian taug, tauto nagham mbeb eta isosor maau.

²⁴ You naghamgham ŋgar deŋia ve ŋgar ŋgalaaŋa moghon ila Yoova mata. Tauto ye lolo payou ve igham leg atia poia.

²⁵ Yoova, ighaze tamtoghon eta lolo ineep tuŋia ilat tiom ve itaghon ataam tiom, nene pale lolom ineep tuŋia ila toni paam ve uuli irau sawa isob. Tamtoghon to ighaze le sosor eta maau ve ŋgar toni isob popoia moghon, nene pale yom upamuul ŋgar poia pani paam.

²⁶ Ve ighaze ŋgeu eta ighamgham ŋgar ŋgalaaŋa moghon, nene pale yom paam ugham ŋgar ŋgalaaŋa pani. Eemoghon yes to ledi ŋgar tiina pa ghamuuŋ kaarom ve ŋgar samia, yom lem ataam naol pa uyat ŋgar todi tonowen.

²⁷ Tamtoghon to titatan taudi, yom ughamgham mulin di pa pataŋani todi. Eemoghon yes to tipapait taudi ve tiveleg ghom, yom utatan di tizi tinim mbeb sorok.

²⁸ Yoova, Maaron tiou, yom ugham ghazooŋa tiom isul ghou, ve undiir ndoroom ighau payou, leso naneep pooi.

²⁹ Yom upapalot ghou. Tauto you irau naparab toman koiagŋa le nalib padi. Maaron tiou inepneep toman ghou. Tovenen you irau nayatov ghou le namalaaŋ pa didiiŋ ariaŋa to iluvut koiagŋa ndug todi, ve nalooŋ nala.

³⁰ Ataam to Maaron, nene poia le poia kat. Ve saveeŋ toni, nene onoon moghon. Irau taghur ila kat. Tamtoghon tisob to tiyooŋ ila toni, ye inim sigeu padi.

³¹ Yoova moghon to Maaron tau. Ite paam maau. Ye moghon to iponpoon ghiit inimale yaam tiina.

³² Ye ipapalot ghou pa tau tapiri, tauto nayoon ariaŋa. Ve ye iŋgin ghou pa laghooŋ tiou, ve ipatooŋ ataam payou.

¹⁰ I ileep izala aŋela tooni ariaaŋa nduume, ve iroov ilam. Yaghur ibaado, ve ikaleel gha ilam.

¹¹ I ipoon tauu pa ndoroom, leso imin le niia to yoŋgaaŋ. Taitai gabgabuai ikauu, ve iŋgooz tauu ila loolo.

¹² I ileep ta sewe toman mbonari tiina, ve igham nugh ighani milmilia. Tauta lalaav iŋgalŋgal izi, ve ais paatu paatu tomania yav ŋgilaaŋi titaptap tizi pa taan.

¹³ Yoova ileep izi sambam, ve isaav toman aliiŋa tiina kat, imin lalaav luutu. Maaron Tiina Tau Iliiv Zimaronŋa Tisov na aliiŋa ivot. Ve yav ŋgilaaŋi tomania ais paatu titaptap tizi.

¹⁴ I igham lalaav iŋgal koiŋa imin paneegh natŋa tooni. Tauta roiŋ tiina igham zi, ve tighawaar mbiriis.

¹⁵ Yoova, saawe tau yo utotoi aatyavyav tsio pazi, yaghur tiina ivot pa uzum, ve ivuvuur te ila soghan, le sausau ivot ighazooŋ. Ve taan puughu tau igheen izila siiŋa kat na ivot peria. Gabua eta ipoona muul mako.

¹⁶ Ra Yoova ileep saaŋa, ve izuzuun niima izilam ikis ghau, ve indai ghau nazaa pa mazavan belbeluuŋa loolo.

¹⁷ Koiagŋa tapirizi tiina, ve yau narau zi mako. Yes tighur koi payau kat. Eemon Yoova iuul ghau, ve ipas ghau ila nimazi.

¹⁸ Saawe tau naleep ila pataŋani loolo, yes tipaburigin malmal payau. Eemon Yoova ipoon ghau ve ipalot ghau.

¹⁹ I ipas ghau navot pa pataŋani tsiau, ve ighur ghau nala naleep izi nugh poia. Pasaa, i loolo payau kat. Tauta igham mulin ghau ve naleep poi.

²⁰ Yau nataghon ŋgar tau iduduuŋ ila Yoova maata. Tauta i loolo payau ve igham poghani ghau. Nimag igham sosor eta mako. Tauta i igham leg atuya poia.

²¹ Pasaa, saawe isov, yau nataghon eez to Yoova. Irau nagham ŋgar saghati ve naghur murig pa Maaron tsiau ne mako.

²² Pasaa, matag kisin tutuuŋ tooni tisov. Tutuuŋ tooni tau tigheen pataghaaŋ na, naghur murig pazi mako.

²³ Tauta leg sosor eta ila i maata mako. Yau naŋgin taug poi, tauta nagham gabua eta isosor mako.

²⁴ Yau naghamgham ŋgar duduuŋa ve ŋgar ŋgalaaŋa mon ila Yoova maata. Tauta i loolo payau ve igham leg atuya poia.

²⁵ Yoova, isaav ighe tamtamon eta loolo isaghav ghom ariaaŋ ve itaghon eez tsio, yo pale lolom isaghavu paam ve uule irau saawe. Tamtamon tau ighe le sosor eta mako ve ŋgar tooni isov popoia mon, ene pale yo upamuul ŋgar poia pani paam.

²⁶ Ve isaav ighe ŋeer eta ighamgham ŋgar ŋgalaaŋa mon, ene pale yo paam ugham ŋgar ŋgalaaŋa pani. Eemon yes tau lezi ŋgar tiina pa ghamuuŋ karom ve ŋgar saghati, na yo lem eez naol to uyat ŋgar toozi tawe.

²⁷ Tamtamon tau titatan tauzi na, yo ughamgham mulin zi pa pataŋani toozi. Eemon yes tau tipapait tauzi ve tivelegh ghom na, yo utatan zi tizi timin kaut sorok.

²⁸ Yoova, Maaron tsiau, yo ugham ghazooŋa tsio isul ghau, ve uziir ndoroom ighau payau, leso naleep poi.

²⁹ Yo upapalot ghau. Tauta yau irau naparav tomania koiagŋa le naliiv zi. Maaron tsiau ilepleep tomani ghau. Tauvene yau irau nayaat maloŋon didiiŋ ariaaŋa tau ilivut koiagŋa nugh toozi, ve naloŋ nala.

³⁰ Maaron eez tooni, ene poia le poia kat. Ve saveeŋ tooni, ene onoon mon. Irau taghur ila kat. Tamtamon tisov tau tiyooŋ ila tooni na, i imin sigheu pazi.

³¹ Yoova mon ta Maaron tauu. Ite paam mako. I mon ta iponpoon ghiit imin maet tiina.

³² I ipapalot ghau pa tauu tapiri, tauta nayooz tuŋia. Ve i iŋginŋgin ghau pa laghooŋ tsiau, ve itotoi eez payau.