Mbouŋ to Yes Israela 17:2-13 in Mutu

² Yom ughita mbeb tisob, ve uwatag ughaze you nataghon ŋgar deŋia ila matam. Tovenen uvool tiou ve upaghazoŋan ghou ila tamtoghon matadi ughaze you nagham sosor eta maau.

³ Yom uŋgabiiz poian ghou, ve utoov ghou. Ve unum utiir ghou pa mboŋ paam. Tauto uwatag katin lolog. Yom uŋgabiiz katin ghou, ve ughita ŋgar samia eta ineep ila lolog maau. Pasa, ŋgar tiou iyaryaaŋ naghaze avog igham sosor eta malep.

⁴ You nataghon ŋgar to ndiran pida tighamghami ne maau. Pasa, matag kisin saveeŋ tiom. Tovenen ndiran samsamia to tighamgham malmal, you napaghau taug pa ataam todi.

⁵ Sawa isob, nataghon ataam tiom moghon. Agheg iyel pani rita maau.

⁶ O Maaron, you nawatag: Moghon moghon, yom uloŋlooŋ suŋuuŋ tiou. Tovenen nataŋ roran ghom naghaze uul ghou. Ughur taliŋam payou, ve ulooŋ aliŋag tonene.

⁷ Yom lolom ineep tuŋia ila to tamtoghon tiom ve uluul di. Tovenen ugham uraat gharatooŋadi tintina ve uul ghou. Yes to tiyooŋ ilat tiom, nimam waan pale igham mulin di ila koiadi nimadi, ve tineep pooi.

⁸ Uŋgin poian ghou inimale uŋgin taum matam. Upoon ghou inimale tatareek ipakud ndinatu.

⁹ Pasa, ndiran samsamia tizuaria di tighaze le tiwaghamun ghou. Koiagŋa tiluvut ghou, ve tighaze tirab ghou namaat.

¹⁰ Lolodi isamin tamtoghon maau. Ve tipapait taudi izadi toman aliŋadi tiina.

¹¹ Yes titaghon ghou tinim tiluvut ghou wa. Ve matadi deŋia payou tighaze tikokor ghou, ve tiza payou nazila taan.

¹² Yes tinimale laion to pitoola, ve ighaze isaas motin mbeb, leso ighani. Yes tinimale laion paghu to iyooŋ ila su lolo ve isasaŋan.

¹³ Yoova, umundig urab koiagŋa lak! Uyoon unum sigeu payou, upoon di, ve utatan tapiridi. Ukas di pa buza tiom, ve ugham mulin ghou ila ndiran samsamia tonene nimadi. Leso naneep pooi.

² Yo ughita gabua naol isov, ve yo uwatagh ughe yau nataghon ŋgar tau iduduuŋ ila yo matam. Tauvene uvool tsiau ve upaghazoŋai ghau ila tamtamon matazi ughe yau nagham sosor eta mako.

³ Yo ugabiiz poghani ghau, ve utoov ghau. Ve ulam utiir ghau pa mboŋ paam. Tauta uwatagh katin lolog. Yo ugabiiz katin ghau, ve ughita ŋgar saghati eta igheen ila lolog mako. Pa ŋgar tsiau iyaryaaŋ naghe avog igham sosor eta sov.

⁴ Yau nataghon ŋgar tau zeran siriv tighamghamu ne mako. Pasaa, matag kisin saveeŋ tsio. Tauvene zeran sasaghati tau tighamgham malmal na, yau napaghau taug pa eez toozi.

⁵ Saawe isov, nataghon eez tsio mon. Agheg isapir pani rigta mako.

⁶ O Maaron, yau nawatagh: Saawe isov, yo uloŋlooŋ suŋuuŋ tsiau. Tauvene nataŋ rarai ghom naghe uul ghau. Ughur taliŋam payau, ve ulooŋ aliŋag tane.

⁷ Yo lolom isaghav tamtamon tsio ariaaŋ ve uluul zi. Tauvene ugham uraat ŋgeretazi tintiina to uul ghau. Yes tau tiyooŋ ilat tsio na, nimam tapir aat igham mulin zi ila koiazŋa nimazi, ve tileep poi.

⁸ Uŋgin poghani ghau imin yo uŋgin taum matam. Upoon ghau imin tatareek ipagud natŋa.

⁹ Pa zeran sasaghati tizuari zi tighe tivaghamun ghau. Koiagŋa tilivutin ghau, ve tighe tirav ghau namaat.

¹⁰ Lolozi isaghatin tamtamon mako. Ve tipapait tauzi ezazi toman aliŋazi tiina.

¹¹ Yes titaghon ghau tilam gha tilivutin ghau wa. Ve tidaad matazi payau tighe tisik ghau nazi taan.

¹² Yes timin laion tau pitoola ve ighe iraŋgat gabua leso ighani. Yes timin laion paaghu tau iyooŋ ila su loolo ve isasaŋan.

¹³ Yoova, uburig urav koiagŋa lak! Uyooz umin sigheu payau, upoon zi, ve utatan tapirizi. Ukas zi pa mbuzaagh tsio, ve ugham mulin ghau pa zeran sasaghati tane. Leso naleep poi.