Mbouŋ to Yes Israela 16:5-11 in Mutu

⁵ You naghita Yoova naghaze ye inimale taan poia eez to tipuli payou pa naneep pani. Irau nambool pa mbeb eta maau. Pasa, you naneep ila ye nima.

⁶ Mbeb naol to you nagham di ilat tiom, nene popoiadi moghon. Onoon kat, nepooŋ tiou to Yoova igham payou, nene poia kat, inimale naneep ila taan paghuna eez to tipuli payou.

⁷ You napait Yoova pa poia toni. Pasa, ye ighamgham pooz payou leso nataghon ataam poia. Mboŋ paam, ŋgar to ye ighuri ila lolog ne, ipatooŋ ataam payou.

⁸ Moghon moghon, matag iŋgalŋgal Yoova naghaze ye ineep toman ghou. Ye inepneep ila pa digeg waan ve ipapalot ghou. Tovenen mbeb eta irau igham ghou ruŋag iza ne maau.

⁹ Tauto tinig iza, ve lolog poia kat. Irau namatughez maau. Pasa, yom pale uŋgin ghou naneep pooi.

¹⁰ Irau upul murim payou, ve upul ghou namaat ve nazila ndug to mateeŋa ne maau. Pasa, you tamtoghon tiom. Lolog ineep tuŋia ilat tiom, ve nataghon ataam tiom. Irau upul patug imbuuz ila naal lolo ne maau.

¹¹ Yom upatooŋ ataam to nepooŋ poia payou. Ighaze naneep toman ghom, nene pale lolog poia kat. Ighaze you naneep ila pa nimam waan, nene pale nayamaan poia tiom itaghoni taghoni gha ila.

⁵ Yau naghita Yoova naghe i imin taan poia ee tau tipuli payau to naleep ila. Irau nambool pa gabua eta mako. Pasaa, yau naleep ila i niima.

⁶ Gabua naol tau yau nagham zi ilat tsio, ene popoiazi mon. Onoon kat, lepoogh tsiau tau Yoova igham payau ne, ene poia kat. Imin naleep ila taan paghuuna ee tau tipuli payau.

⁷ Yau napait Yoova pa poia tooni. Pasaa, i ighamgham pooz payau, leso nataghon eez poia. Mboŋ paam, ŋgar tau i ighuru ila lolog ne, itotoi eez payau.

⁸ Saawe isov, matag iŋgalŋgal naghe Yoova ileep tomani ghau. I ilepleep ila zigeg tapir ve ipapalot ghau. Tauvene gabua eta irau igham ghau narur ne mako.

⁹ Tauta tintinig ve lolog poia kat. Irau naroi mako. Pasaa, yo aat uŋgin ghau naleep poi.

¹⁰ Irau ughur murim payau, ve upul ghau namaat gha nazila mateegha niazi ne mako. Pasaa, yau tamtamon tsio. Lolog isaghav ghom ariaaŋ, ve nataghon eez tsio. Irau upul patag imbuuz ila naal loolo ne mako.

¹¹ Yo utotoi eez to lepoogh poia payau. Isaav ighe naleep tomani ghom, ene pale lolog poia le poia kat. Ighe naleep ila nimam tapir, ene aat nayamaan poia tsio taghon taghon gha ila.