Mbouŋ to Yes Israela 147:2-19 in Mutu

² Yoova ighamgham uraat pa igharaat mulin Yerusalem. Ve yes Israela to koiadi tigham di tila tineep irau ndug ndug, ye iyouyou di timuul tinim.

³ Tamtoghon to pataŋani ivot padi le lolodi isami kat, ye irabrab atedi, ve igharaat pataŋani todi, leso lolodi poia.

⁴ Muuŋ kat, lolo ighur pa pitum piiz to pale ighur di tivot. Ve ye tau iwaat pitum eŋaeŋa izadi le tisob.

⁵ Tiina toit, ye ariaŋa ve iza tiina. Ve ŋgar toni tovene paam, tiina le tiina kat. Ighaze takaal pughu, pale taraua maau.

⁶ Yes to titatan taudi, ve timbadbaad pataŋani, Yoova iuluul di leso tineep pooi. Eemoghon ndiran samsamia, ye itatan di ve ivazag di tizila taan.

⁷ Ambou toman tinimim iza, ve apait Yoova pa poia toni. Arab gita, ve apakur Maaron toit.

⁸ Ye igham yaghur tae imbotoon tata, ve igham uman izi pa ipambees taan, ve igham kikiliiŋ itub izala lolooz.

⁹ Ye ipanpan mbeb naol naol to su. Ighaze man kool ndinatu titaŋ pa aniiŋ, nene ye to igham aniiŋ padi.

¹⁰ Tamtoghon tinumeer hos to bide tapiridi, ve yes ndaaba to tiyoon ariaŋa pa malmal. Eemoghon mbeb tovene irau igham Yoova lolo poia ve tini iza ne maau.

¹¹ Tamtoghon to timatughez pani ve titaghon ŋgar toni, tauto tighami lolo poia. Ye tini iza pa yes to tinumeera tighaze ye lolo ineep tuŋia ila to tamtoghon toni ve iuluul di.

¹² Yam Yerusalema, apakur Yoova! Yam tamtoghon to Zion, apait Maaron tiam.

¹³ Pasa, ataam to didiiŋ to iluvut ndug tiam, ye ipariaaŋ di le tuŋia. Ve ighurghur poia toni izaza tiam.

¹⁴ Ye iŋginŋgin ndug tiam, tauto aneep pooi. Ve ighamgham amim aniiŋ wit to popoia kat. Tauto aghan le isooŋ gham.

¹⁵ Ighaze ye lolo pa mbeb eta ivot izi taan, nene aliŋa izi inim, ve mbeb tonenen ivot. Saveeŋ toni ilaan, ve igham uraat rikia moghon.

¹⁶ Ye igham ndug ighavurvuraaŋ le ipisosooŋ inimale sipsip oro. Ve sawa to ndug iyauŋ, ye igham waam izi le ipatuuk inim ais.

¹⁷ Ye igham ais patu patu titaptap tizi taan. Ighaze igham ndug iyauŋ kat, sei to pale ineep potla? Eta maau.

¹⁸ Ghoro isaav, ve ais tonowen itoora inim ya, ve ireer muul itaghon ye aliŋa. Ye igham yaghur toni tuntunu ilaagh, ve ya tireer muul.

¹⁹ Muuŋ, ye ivotia saveeŋ toni ila to Yakop, ve ipatoot yes Israela pa tutuuŋ toni toman ataam toni to gabizooŋ mbeb.

² Yoova ighamgham uraat to igharaat mulin Yerusalem. Ve yes Israela tau koiazŋa tigham zi tila tileep irau nugh nugh na, i iyauyau zi timuul tilam.

³ Tamtamon tau pataŋani ivot pazi le ireu lolozi kat, na i iravrav atezi, ve igharaat pataŋani toozi leso lolozi poia.

⁴ Muuŋ geeg, loolo ighur pa pitum piiz tau pale ighur zi tivot. Ve i tauu iwaat pitum eŋaeŋa ezazi le tisov.

⁵ Tiina toit, i saksaki ve eeza tiina. Ve ŋgar tooni tauvene paam, ene tiina le tiina kat. Ighe tail puughu, ene aat tarao mako.

⁶ Yes tau titatan tauzi ve tibadbaad pataŋani na, Yoova iuluul zi leso tileep poia. Eemon zeran sasaghati, i itatan zi ve ivaghaaz zi tizila taan.

⁷ Ambou toman tintinmim, ve apait Yoova pa poia tooni. Arav gita, ve apakur Maaron toit.

⁸ I igham taitai itav sambam saamba, ve igham uman izi to ipabees taan, ve igham kikiliiŋ itum izala loloz.

⁹ I ipanpan gabua maata maata to su. Isaav ighe man kool natŋa titaŋ pa aniiŋ, ene i ta igham aniiŋ pazi.

¹⁰ Tamtamon lolozi poia ve tinumeer hos tau bide tapirizi, ve yes zaaba tau tiyooz ariaaŋ pa malmal. Eemon gabua tauvene irau igham Yoova loolo poia ve tintini ne mako.

¹¹ Tamtamon tau tiroi pani ve titaghon ŋgar tooni, tauta tighamu loolo poia. I tintini pa yes tau tinumeera tighe i loolo isaghav tamtamon tooni ve iuul zi.

¹² Yam Yerusalema, apakur Yoova! Yam tamtamon to Zion, apait Maaron tsiam.

¹³ Pasaa, ataman to didiiŋ tau ilivut nugh tsiam na, i ipariaaŋ zi le tuŋia. Ve ighurghur poia tooni izazaa tsiam.

¹⁴ I iŋginŋgin nugh tsiam, tauta aleep poia. Ve ighamgham lemim aniiŋ wit tau popoia kat. Tauta aghan le isooŋ gham.

¹⁵ Isaav ighe i loolo pa gabua eta ivot izi taan, ene aliiŋa izilam ve gabua tana ivot. Saveeŋ tooni ilaan ve igham uraat rekia mon.

¹⁶ I igham naghavghavu izi ikau nugh le ipisosooŋ imin sipsip ooro. Ve igham uwam izi le itav taan imin avav.

¹⁷ I igham ais paatu paatu titaptap tizi taan. Isaav ighe i igham nugh iyauŋ kat, sei ta pale ileep muuri? Eta mako.

¹⁸ Ra isaav, ve ais tawe ireer muul itaghon i aliiŋa. I igham yaghur tooni tuntunu ilaan, ve yaa tireer muul.

¹⁹ Muuŋ, i ivotia saveeŋ tooni ila to Yakop, ve ipaghazoŋai yes Israela pa tutuuŋ tooni tomania eez tooni to gabizooŋ gabua.