Mbouŋ to Yes Israela 146:1-6 in Mutu

¹ Aleluia, tapait Yoova! You naghaze napait Yoova toman lolog.

² Sawa isob to naneep izi taan, you pale napait Yoova. Pale nambou pa Maaron tiou, ve napakuri tovene ila ila le sawa tiou isob.

³ Anumeer yes daba ve pooza malep. Yes tamtoghon to taan moghon. Irau tigham mulin gham pa pataŋani tiam maau.

⁴ Sawa to avuvudi isob ve timaat, yes pale timuul tizila taan. Ghoro ŋgar to muuŋ matadi iŋgali tighaze tighami, nene pale inim mbeb sorok. Irau ighur anoŋa maau.

⁵ Eemoghon tamtoghon to ighaze inumeer Maaron to Yakop, ve ighamgham ulaaŋ ila toni, ye pale lolo poia. Pasa, yes to tinumeer Maaron todi Yoova, ve tighur matadi pani pa ulaaŋ, nene pale poia toni iza todi.

⁶ Yoova ighur sambam, taan, ve te, toman mbeb tisob to tineep ila. Ve saveeŋ toni isob, ye pale mata iŋgali, ve itaghoni irau sawa isob.

¹ Aleluia, tapait Yoova! Yau naghe napakur Yoova toman lolog!

² Saawe isov tau naleep izi taan, yau aat napait Yoova. Pale namboumbou pa Maaron tsiau, ve napapakuru tauvene ila ila le irau saawe tsiau isov.

³ Anumeer yes daaba ve pooza sov. Yes tamtamon to taan mon. Irau tigham mulin gham pa pataŋani tsiam mako.

⁴ Saawe tau avuvuzi isov ve timaat, yes aat timuul tizila taan. Mako ŋgar tau muuŋ matazi iŋgali tighe tighamu na, imin kaut sorok. Irau ighur anooŋa mako.

⁵ Eemon tamtamon tau ighe inumeer Maaron to Yakop, ve ighamgham uleeŋ ila tooni, i aat loolo poia. Pasaa, yes tau tinumeer Maaron toozi Yoova ve tighurghur matazi pani pa uleeŋ, ene aat poia to Maaron izazaa toozi.

⁶ Yoova ighur sambam, taan, ve te, tomania gabua naol isov tau tileep ve tigheen ila na. Ve saveeŋ mbuaaŋ tooni isov, i pale maata iŋgali ve itaghoni irau saawe.