Mbouŋ to Yes Israela 145:3-11 in Mutu

³ Yoova iza tiina kat. Ighaze tapaiti, nene deŋia. Tapiri toman ŋgar ve poia toni, nene tiina le tiina kat. Ighaze tagham ŋgar pani, nene pale taraua maau.

⁴ Uraat ariaŋadi ve ŋgar popoia to ughamgham di, tamtoghon pale tisavia varu pa ndinatudi, ve ndinatudi pale anadi tisavia pa papaghu todi, ve iseeŋga tovene gha ila.

⁵ Pale tipait izam, ve tisavia ŋgurubam tiina to ipambood ghom. Ve uraat tiom gharatooŋadi to mata ite kat ne paam, you moghon moghon naghamgam ŋgar padi.

⁶ Yom upatooŋ tapirim ila uraat tiom ariaŋadi to tigham tamtoghon timatughez. Tauto pale tisavia varu. Ve uraat tiom tintina, you pale nanim kamos padi.

⁷ Poia tiom, nene tiina kat. Tovenen tamtoghon pale matadi iŋgalŋgali, ve tivovotia varu. Pale timbou toman lolodi poia, ve tipait ghom pa ŋgar tiom deŋia.

⁸ Yoova ighamgham poian ghiit, ve lolo isasamin ghiit. Ye ate yabyab rikrikia maau. Poia toni, nene tiina kat. Ye lolo ineep tuŋia inim toit, ve iuluul ghiit irau sawa isob.

⁹ Yoova ighamgham ŋgar poia pa tamtoghon tisob. Ve lolo isasamin mbeb tisob to ye ighur di.

¹⁰ O Yoova, mbeb to yom ughur di, pale tisob lolodi poia payom ve tipait ghom. Ve tamtoghon tiom to lolodi ineep tuŋia ilat tiom ne paam, pale tipait ghom pa poia tiom.

¹¹ Pale tisavia pooz tiom tighaze nene mbeb tiina ve poia. Ve tivotia varum tighaze tapirim tiina le tiina kat.

³ Yoova eeza tiina kat. Isaav ighe tapaiti, ene iduduuŋ. Tapiri tomania ŋgar ve poia tooni, ene tiina le tiina kat. Ighe tagham ŋgar pani, ene aat tarao mako.

⁴ Uraat ariaŋazi ve ŋgar popoia tau ughamgham zi na, tamtamon pale tisavia vaaru pa natuzŋa, ve natuzŋa pale anazi tisavia pa paaghu toozi, ve iseeŋga tauvene gha ila.

⁵ Pale tipait ezam, ve tisavia mbonarim tiina tau ipabood ghom na. Ve uraat tsio ŋgeretazi tau maata ite kat na, yau monmon naghamgam ŋgar pani.

⁶ Yo utotoi tapirim ila uraat tsio ariaŋazi tau igham tamtamon tiroi. Tauta pale tisavia vaaru. Ve uraat tsio tintiina, yau aat nasinaia.

⁷ Poia tsio, ene tiina kat. Tauvene tamtamon pale matazi iŋgalŋgali ve tivovotia vaaru. Pale timbou toman lolozi poia, ve tipait ghom pa ŋgar tsio duduuŋa.

⁸ Yoova ighamgham poghani ghiit, ve loolo isasaghatin ghiit. I aate yavyav rekrekia mako. Poia tooni, ene tiina kat. I loolo isaghav ghiit ariaaŋ, ve iuluul ghiit irau saawe.

⁹ Yoova ighamgham ŋgar poia pa tamtamon tisov. Ve loolo isasaghatin gabua naol isov tau i ighur zi na.

¹⁰ O Yoova, gabua naol isov tau yo ughur zi na, pale tisov lolozi poia payo ve tipait ghom. Ve tamtamon tsio tau lolozi isaghav ghom ariaaŋ na, yes pale tipait ghom pa poia tsio.

¹¹ Pale tisavia pooz tsio tighe ene gabua tiina ve poia. Ve tivotia varum tighe yo tapirim tiina le tiina kat.