Mbouŋ to Yes Israela 144:3-15 in Mutu

³ Yei tamtoghon to taan, ninim sa mbeb poia, to matam iŋgalŋgal ghei? Vena to ughamgham ŋgar tiina payei?

⁴ Yei tamtoghon nineep ris ve nisob, ninimale yaghuramai to ivotvot ila avomai. Nepooŋamai tuku inimale ai yavyaava to ighaze ndag izila, nene irau tighita muul maau.

⁵ O Yoova, ukaak sambam paroŋania ve uzi unum. Utut lolooz, ve ugham yab imundig toman mbuasa.

⁶ Ugham lalaav iŋgal koiagŋa, ve ireu di. Uvaneg pane tiom ndinatu tiŋarua di, leso tighau tila.

⁷ Pataŋani to aazne igham ghou, nene inimale yawaaŋa ivot toman tapiri ve ighaze izugua ghou nalaleg. Tovenen uzuzuun nimam izi, ve uit ghou naza. Uul ghou, ve ugham mulin ghou ila ndug ndug to tighur koi payou ne nimadi.

⁸ Ndiran tonowen, avodi kaarom. Yes tiit nimadi waan iza, ve tipariaaŋ saveeŋ mbuaaŋ todi tighaze: “Onoon sambam.” Eemoghon titaghon saveeŋ todi maau.

⁹ O Maaron, you pale nambou mbouŋ paghu payom. Pale narab gita, ve nambou pa napait ghom.

¹⁰ Pasa, yom uluul yes kinik to yei Israela. Tauto tilib pa malmal. Muuŋ, yom ugham mulin mbesooŋa tiom David pa buza to mateeŋ.

¹¹ Upaghau buza mata payou, ve ugham mulin ghou ila yes ndug ndug to tighur koi payou ne nimadi. Ndiran tonowen, avodi kaarom. Yes tiit nimadi waan iza, ve tipariaaŋ saveeŋ mbuaaŋ todi tighaze: “Onoon sambam.” Eemoghon titaghon saveeŋ todi maau.

¹² Maaron, ughur poia tiom iza tiei. Leso ndinatumai papaghu titub pooi tinimale ai to itub pooi iza iza le inim tiina kat. Ve ugham ndinatumai ndiliva paghunadi kat tinimale gungun to kinik ruum toni to ŋgeretuŋadi popoia.

¹³ Ugham aniiŋ katindi tivot ila uum tiei, leso ruum tiei to ghuruuŋ aniiŋ tivon pa aniiŋ naol naol. Ve ugham sipsip ve mekmek tiei timasa tinim ndiŋndiŋ ndiŋndiŋ.

¹⁴ Ve makau tiei paam. Moroghooŋ eta igham di malep. Ugham di titub pooi ve tipoop poia, leso tinim naol. Taum uŋgin ndug tiei. Leso tamtoghon tireu sirsiir tiei, ve tiŋguaaz tamtoghon tiei sob. Ve nilooŋ taŋiiz eta izi maran tiei malep.

¹⁵ Tamtoghon to ighaze ŋgar tovene ivot padi, nene pale lolodi poia kat. Onoon kat, tamtoghon to timbesmbees pa Maaron todi Yoova, yes pale lolodi poia. Pasa, poia toni pale iza todi tovene.

³ Yei tamtamon to taan, nimin saa kaut poia, ta matam iŋgalŋgal ghei? Ve mindai ta ughamgham ŋgar tiina payei?

⁴ Yei tamtamon, lepoogh tsiei to taan, ene imin yaghur. Nileep rig, ve nisov. Lepoogh tsiei, ene tuuku imin ai yavyaava tau ighe aaz izila, ene irau tighita muul mako.

⁵ O Yoova, ukaak sambam saamba ve uzilam. Utut loloz, ve ugham yav iburig tomania mbuasa.

⁶ Ugham lalaav iŋgal koiagŋa ve ireu zi. Uvaneghia paneegh tsio natŋa iŋarui zi, leso tighau tila.

⁷ Pataŋani tau aazne igham ghau ne, ene imin yaa ivot toman tapiri ve ighe izugh ghau gha nalaleg. Tauvene uzuzuun nimam izi, ve undai ghau nazaa. Uul ghau, ve ugham mulin ghau ila nugh nugh tau tighur koi payau ne nimazi.

⁸ Zeran tawe, avozi karom. Yes tiit nimazi tapir izaa, ve tipariaaŋ saveeŋ mbuaaŋ toozi tighe: “Onoon sambam.” Eemon titaghon saveeŋ toozi mako.

⁹ O Maaron, yau aat nambou mbouŋ paaghu payo. Pale narav gita, ve nambou to napait ghom.

¹⁰ Pasaa, yo uluul yes kinik to yei Israela. Tauta tiliiv pa malmal. Muuŋ, yo ugham mulin besooŋa tsio David.

¹¹ Upaghau mbuzaagh maata payau, ve ugham mulin ghau ila yes nugh nugh tau tighur koi payau ne nimazi. Zeran tawe, avozi karom. Yes tiit nimazi tapir izaa ve tipariaaŋ saveeŋ mbuaaŋ toozi tighe: “Onoon sambam.” Eemon titaghon saveeŋ toozi mako.

¹² Maaron, ughur poia tsio izaa tsiei. Leso natmaiŋa paghpaaghu titum poi imin ai tau itum poi izaa izaa le imin tiina kat. Ve ugham natmailivaŋa paghunazi kat imin rir to kinik ruum tooni tau ŋgeretazi popoia na.

¹³ Ugham aniiŋ katini ivot ila uum tsiei, leso ruum tsiei to ghuruuŋ aniiŋ tivon pa aniiŋ maata maata. Ve ugham sipsip ve mekmek tsiei timasa timin ndiŋndiŋ ndiŋndiŋ.

¹⁴ Ve makau tsiei paam. Moroghooŋ eta igham zi sov. Ugham zi titum poi ve tipoop poia, leso timin naol. Uŋgin nugh tsiei. Leso tamtamon tireu sirsiir tsiei, ve tiŋguaaz tamtamon tsiei sov. Ve nilooŋ taŋiiz eta izi maaran tsiei sov.

¹⁵ Tamtamon tau ighe ŋgar tauvene ivot pazi, ene pale lolozi poia kat. Tauvene yes tau Maaron toozi Yoova na, pale lolozi poia. Pasaa, poia tooni tauvene pale izazaa toozi.