Mbouŋ to Yes Israela 141:1-8 in Mutu

¹ O Yoova, you nataŋ roran ghom naghaze uul ghou rikia! Ughur taliŋam payou ve ulooŋ aliŋag.

² You nakaak nimag iza, ve nasuŋ ghom naghaze ughita suŋuuŋ tiou tonene inimale naunauŋ vuzi poia to tituni ila naghom, ve inimale watooŋrau to tighamghami pa rabrab.

³ Yoova, uŋgin poian avog ve yamag. Leso saveeŋ samia eta ivot ila avog sob.

⁴ Ve upul ghou lolog igham pa ŋgar samia eta malep. Pa vene, ndiran samsamia tiweu ghou ve nala toman di pa ŋgar todi tonowen. Upalot ghou. Leso nayoon ariaŋa. Lolog pa nala toman di, ve yeiŋa nilup ghei pa ghanghaniiŋ maau.

⁵ Ighaze ŋgeu deŋia eta ilos ghou, ma iyaan ghou pa ipasaluŋgan ghou, nene ipatooŋa ighaze ye lolo payou kat. Ŋgar tovene, you irau ateg yabyab pani maau. Nene igham ghou lolog poia kat inimale tiliŋ ŋgoreeŋ poia izala dabag. Eemoghon ndiran samsamia, moghon moghon suŋuuŋ tiou iŋaŋarua ghom naghaze utatan ŋgar todi tonowen.

⁶ Sawa to tighur atia iŋarua ndiran samsamia, ve tipiyaav di tizila ndug kazimuŋa to sila we, nene pale tighilaal tighaze: Saveeŋ to muuŋ nasavia padi pa napasaluŋgan di, nene saveeŋ poia ve saveeŋ onoon.

⁷ Ndiran tonowen, irau titavia di maau. Pale tigham tuadi, ve tiwasuruvan di itaghon ndug to mateeŋa, tinimale ai to tipaal di le mazuvu mazuvu, ve tiwasuruvan di.

⁸ Maaron tiou Yoova, you naghur matag payom pa ulaaŋ, ve nayooŋ ilat tiom. Upul ghou nasami malep.

¹ Mbouŋ to David O Yoova, yau nataŋ rarai ghom naghe uul ghau rekia! Ughur taliŋam payau ve ulooŋ aliŋag.

² Yau nait nimag izaa pa suŋuuŋ, ve naghe yo ughita suŋuuŋ tsiau tane imin naunauŋ vaazi poia tau titunu ila naghom, ve imin watooŋrau tau tighamghamu pa ravrav.

³ Yoova, uŋgin poghania avog ve yamag. Leso saveeŋ saghati eta ivot ila avog sov.

⁴ Ve upul ghau lolog ighaar pa ŋgar saghati eta sov. Pa aat napaak zeran sasaghati pa ŋgar toozi ma vene. Upalot ghau nayooz ariaaŋ. Mako pale nala tomani zi pa ghanghaniiŋ toozi ma vene.

⁵ Isaav ighe ŋeer duduuŋa eta ilos ghau, ma iyaon ghau to ipaduduuŋ ghau, ene itotoi ighe i loolo payau. Ŋgar tauvene, irau ateg yavyav pani mako. Ene igham ghau lolog poia kat imin tiliŋ ŋgoreeŋ poia izala dabag. Eemon zeran sasaghati, monmon suŋuuŋ tsiau iŋaŋarui ghom naghe utatan ŋgar toozi tawe.

⁶ Saawe tau tighur atuya iŋarui zeran sasaghati, ve tisuruuv zi tizila nugh sapsapu, ene pale tighilaal tighe: Saveeŋ tau muuŋ nasasavia pazi to napaduduuŋ zi, ene saveeŋ poia ve saveeŋ onoon.

⁷ Zeran tawe, irau titavi zi mako. Pale tigham tuazi, ve tivasuruvai zi itaghon nugh to mateegha, imin ai tau tipaalo le izi imin ŋgiriis.

⁸ Maaron tsiau Yoova, yau naghur matag payo pa uleeŋ, ve nayooŋ ilat tsio. Upul ghau nasaghat sov.